Eyesibini YeziKronike
31 Ngokukhawuleza nje emva kwetheko, onke amaSirayeli awayelapho aphuma aya ezixekweni zakwaYuda, aziqhekeza iintsika ezingcwele,+ agawula iipali ezingcwele,*+ adiliza iindawo eziphakamileyo+ nezibingelelo+ kulo lonke elakwaYuda nelakwaBhenjamin, adiliza nezakwaEfrayim nakwaManase+ ade azitshayela zonke. Emva koko onke amaSirayeli abuyela ezixekweni zawo, ngamnye kwilifa lakhe.
2 UHezekiya wamisela amaqela ababingeleli+ nawabaLevi,+ ngalinye kwelababingeleli nelabaLevi ngokomsebenzi walo,+ ukuze benze iminikelo etshiswayo nemibingelelo yobuhlobo, basebenze, babulele baze badumise kwiigeyithi zeeyadi* zikaYehova.+ 3 Kwanikelwa enye yempahla kakumkani ukuze kwenziwe iminikelo etshiswayo,+ kunye neminikelo yakusasa neyangokuhlwa,+ neminikelo etshiswayo yeeSabatha,+ eyokuthwasa kweenyanga+ neyamatheko,+ ngendlela ekubhalwe ngayo kuMthetho kaYehova.
4 Ngapha koko, wayalela abantu baseYerusalem ukuba bakhuphe iqela lababingeleli nelabaLevi,+ ukuze babambelele nkqi* kumthetho kaYehova. 5 Uthe nje wakukhutshwa loo myalelo, amaSirayeli anikela isivuno sokuqala sokutya okuziinkozo, iwayini entsha, ioli,+ ubusi nayo yonke imveliso yamasimi,+ bazisa izishumi zayo yonke into.+ 6 Nabantu bakwaSirayeli nabakwaYuda ababehlala kwizixeko zakwaYuda, bazisa izishumi zeenkomo nezeegusha nezishumi zezinto ezingcwele+ ezazingcwaliselwe uYehova uThixo wabo. Bazizisa yaye bazinikela zaziimfumba ngeemfumba. 7 Ngenyanga yesithathu+ bazisa iminikelo emininzi, bagqiba ngenyanga yesixhenxe.+ 8 Ukufika kukaHezekiya neenkokheli baza babona ezo mfumba, bamdumisa uYehova baza babasikelela abantu bakhe amaSirayeli.
9 UHezekiya wabuza ababingeleli nabaLevi ngezo mfumba, 10 waza uAzariya umbingeleli oyintloko wendlu kaTsadoki wathi kuye: “Oko abantu baqalayo ukuzisa iminikelo endlini kaYehova,+ bebesitya bonele kude kushiyeke ukutya okuninzi, kuba uYehova ubasikelele abantu bakhe ibe le mfumba ingaka zizinto ezishiyekileyo.”+
11 UHezekiya wathi mabalungise oovimba*+ abasendlini kaYehova, ngoko babalungisa. 12 Babengayeki ukuzisa iminikelo, izishumi+ nezinto ezingcwele. UKonaniya umLevi wamiselwa ukuba ajonge yonke le mpahla, engumphathi, yena uShimeyi umntakwabo elisekela. 13 UYehiyele, uAzaziya, uNahati, uAsaheli, uYerimoti, uYozabhadi, uEliyeli, uIsemakiya, uMahati noBhenaya babengamagosa bencedisa uKonaniya noShimeyi umntakwabo, njengokuba babeyalelwe nguKumkani uHezekiya, ibe uAzariya wayejongene nendlu kaThixo wokwenene. 14 UKore unyana kaImna umLevi ongunogada wasegeyithini engasempuma,+ wayejongene neminikelo yokuzithandela+ kaThixo wokwenene, yaye wayesaba iminikelo kaYehova+ nezona zinto zingcwele.+ 15 UKore wayephethe uEden, uMiniyamin, uYeshuwa, uShemaya, uAmariya noShekaniya, ezixekweni zababingeleli,+ kwizikhundla zokuthembeka, ukuba bababele ngokulinganayo abantakwabo,+ omkhulu nomncinci. 16 Babela nabantwana abangamakhwenkwe abasusela kwiminyaka emithathu ukuya phezulu, ababebhaliswe ngokomnombo wokuzalwa ababesiza bezokusebenza endlini kaYehova yonke imihla, besebenza bengamaqela.
17 Ababingeleli babhaliswa ngokweminombo yokuzalwa kwabo ngokwezindlu zootata babo,+ babhaliswa ngolo hlobo nabaLevi abasusela kwiminyaka eyi-20 ukonyuka,+ babhaliswa ngokwemisebenzi yamaqela abo.+ 18 Umnombo wokuzalwa wawudibanisa bonke abantwana babo, abafazi babo, oonyana babo, neentombi zabo, ibandla labo lonke (kuba bazigcina bengcwaliselwe oko kungcwele ngenxa yesikhundla sabo sokuthembeka) 19 nayo yonke inzala ka-Aron, ababingeleli ababehlala kumhlaba onamadlelo, ongqonge izixeko zabo.+ Kuzo zonke izixeko, kwakukho amadoda awayebizwe ngamagama, ukuba abele ukutya onke amadoda aphakathi kwababingeleli nabo bonke abantu ababhaliswe ngokomnombo wabaLevi.
20 UHezekiya wenza le nto kulo lonke elakwaYuda, yaye waqhubeka esenza izinto ezilungileyo nezifanelekileyo, ethembekile kuYehova uThixo wakhe. 21 Wonke umsebenzi awawenzayo ukuze afune uThixo wakhe, enoba ngowendlu kaThixo wokwenene+ okanye ubhalwe eMthethweni okanye ngumyalelo, wayewenza ngentliziyo yakhe yonke ibe waphumelela.