Yoshuwa
11 Ngokukhawuleza nje emva kokuba uYabhin ukumkani waseHatsore eyivile loo nto, wathumela umyalezo kuYobhabhi ukumkani waseMadon,+ wathumela kukumkani waseShimron, kukumkani waseAkeshafi,+ 2 kookumkani ababekummandla weentaba ongasemntla, ababekumathafa* angasemazantsi eKinereti, abo babeseShefela, ababekumathambeka aseDore+ ngasentshona, 3 kumaKanan+ angasempuma nangasentshona, kuma-Amori,+ kumaHiti, kumaPerizi, kumaYebhusi akummandla weentaba nakumaHivi+ asemazantsi kwentaba yeHermon+ ekumhlaba waseMizpa. 4 Ngoko baphuma nayo yonke imikhosi yabo, bebaninzi kakhulu oku kwesanti eselunxwemeni lolwandle, benamahashe amaninzi kakhulu neenqwelo zokulwa ezininzi. 5 Bonke aba kumkani bavuma ukudibana, baza beza kumisa inkampu ngakumanzi aseMerom ukuze balwe namaSirayeli.
6 UYehova wathi kuYoshuwa: “Sukuboyika,+ kuba malunga neli xesha ngomso, ndiza kubanikela bonke ukuba babulawe ngamaSirayeli. Nize niwaqhawule imisipha amahashe abo,+ zona iinqwelo zabo zokulwa nizitshise ngomlilo.” 7 UYoshuwa nawo onke amajoni akhe, babaqubula bebahlasela ngakumanzi aseMerom. 8 UYehova wabanikela kumaSirayeli,+ aza aboyisa, abaleqa bada bayokufika eSidon Enkulu,+ eMisrefoti-mayim+ nakwiNtlambo YaseMizpe engasempuma, yaye ababulala akwabikho namnye usindayo.+ 9 Emva koko uYoshuwa wenza kanye njengokuba uYehova wayemyalele; wawaqhawula imisipha amahashe abo waza wazitshisa neenqwelo zokulwa.+
10 Ngaphezu koko, uYoshuwa wajika wayokuthimba iHatsore waza waxabela nokumkani wayo ngekrele,+ kuba iHatsore yayikade iyintloko yazo zonke ezi zizwe. 11 Ngoko babulala bonke abantu ababelapho ngekrele, babatshabalalisa.+ Babulala yonke into ephefumlayo.+ Emva koko wayitshisa iHatsore ngomlilo. 12 UYoshuwa wathimba zonke izixeko zaba kumkani waza waboyisa bonke ngekrele.+ Wabatshabalalisa,+ kanye njengokuba uMoses umkhonzi kaYehova wayeyalele. 13 Kodwa ke, amaSirayeli akazange azitshise izixeko ezazisezindulini ngaphandle kweHatsore. Yiyo yodwa uYoshuwa awayitshisayo. 14 AmaSirayeli azithathela zonke izinto zezi zixeko kunye nemfuyo.+ Kodwa ababulala ngekrele bonke abantu, abatshabalalisa.+ Akukho mntu owashiywa ephila.+ 15 Kanye njengokuba uYehova wayeyalele uMoses umkhonzi wakhe, uMoses wayalela uYoshuwa,+ yena uYoshuwa wathobela. Akukho nto uYoshuwa angazange ayenze kuzo zonke izinto uYehova awayeziyalele uMoses.+
16 UYoshuwa walithimba lonke eli lizwe, wathimba ummandla weentaba, yonke iNegebhi,+ lonke ilizwe laseGoshen, iShefela,+ iArabha+ nommandla weentaba wakwaSirayeli neShefela yawo, 17 ukususela kwiNtaba IHalaki, ehamba iyokufika eSehire naseBhahali-gadi,+ kwiThafa LaseLebhanon esemazantsi eNtaba IHermon,+ yaye wabathimba bonke ookumkani bazo, waboyisa waza wababulala. 18 UYoshuwa walwa naba kumkani ixesha elide. 19 Asikho esinye isixeko esaye senza uxolo namaSirayeli ngaphandle kwamaHivi awayehlala eGibheyon.+ Zonke ezinye izixeko, amaSirayeli azoyisa emfazweni.+ 20 NguYehova owayeka abantu bezo zixeko baba nenkani+ ukuze balwe namaSirayeli, aze yena abatshabalalise, angabi nalusizi.+ Babemele batshatyalaliswe kanye njengokuba uYehova wayeyalele uMoses.+
21 Ngelo xesha uYoshuwa wawatshabalalisa ama-Anaki+ awayehlala kummandla weentaba, eHebron, eDebhiri, eAnabhi nakuwo wonke ummandla weentaba wakwaYuda nakuwo wonke ummandla weentaba wakwaSirayeli. UYoshuwa wawatshabalalisa kunye nezixeko zawo.+ 22 Akakho ama-Anaki awashiyekayo kwilizwe lamaSirayeli, ngaphandle+ kwaseGaza,+ eGati+ naseAshdode.+ 23 Ngoko uYoshuwa walithatha lonke elo lizwe, kanye njengokuba uYehova wayethembise uMoses,+ waza walinika amaSirayeli ukuba libe lilifa lawo, wawahlulela lona ngokwezizwe zawo.+ Emva koko zaphela iimfazwe kwelo lizwe.+