Hezekile

48 “Ngawo la ke amagama ezizwe, ukususela kumda osemntla: Umhlaba wakwaDan+ ugudle indlela esuka eHetelon, edlula eLebho-hamati*+ isiya eHatsare-enan, ngakumda waseDamasko ngasemntla, ecaleni kweHamati;+ lo mhlaba usuka kumda wasempuma uyokutsho kowasentshona. 2 Umhlaba wakwa-Ashere+ usemdeni wakwaDan, ukususela kumda wasempuma ukuya kowasentshona. 3 Umhlaba wakwaNafetali+ usemdeni wakwa-Ashere, ukususela kumda wasempuma ukuya kowasentshona. 4 Umhlaba wakwaManase+ usemdeni wakwaNafetali, ukususela kumda wasempuma ukuya kowasentshona. 5 Umhlaba wakwaEfrayim usemdeni wakwaManase,+ ukususela kumda wasempuma ukuya kowasentshona. 6 Umhlaba wakwaRubhen usemdeni wakwaEfrayim,+ ukususela kumda wasempuma ukuya kowasentshona. 7 Umhlaba wakwaYuda usemdeni wakwaRubhen,+ ukususela kumda wasempuma ukuya kowasentshona. 8 Kumda wakwaYuda, ukususela kumda wasempuma ukuya kowasentshona, umnikelo enimele niwubekele bucala umele ube ziikubhite* eziyi-25 000 ububanzi,+ buze ubude bawo bulingane nobomhlaba wezizwe ukususela kumda wasempuma ukuya kowasentshona. Indawo engcwele iza kuba sesiphakathini sawo.

9 “Umhlaba enimele niwunikele kuYehova uza kuba ziikubhite eziyi-25 000 ubude neziyi-10 000 ububanzi. 10 Lo ke uza kuba ngumnikelo ongcwele wababingeleli.+ Uza kuba ziikubhite eziyi-25 000 ngasemntla, eziyi-10 000 ngasentshona, eziyi-10⁠000 ngasempuma neziyi-25 000 ngasemzantsi. Indawo engcwele kaYehova iza kuba sesiphakathini sawo. 11 Iza kuba yeyababingeleli abangcwalisiweyo koonyana bakaTsadoki,+ ababewenza umsebenzi endandibathume wona baza abandishiya xa amaSirayeli nabaLevi bandishiyayo.+ 12 Baza kufumana isiqwenga somhlaba kumnikelo obekelwe bucala njengeyona nto ingcwele kumda wabaLevi.

13 “Ecaleni komhlaba wababingeleli, abaLevi baza kufumana umhlaba oziikubhite eziyi-25 000 ubude neziyi-10 000 ububanzi. (Xa uwonke uza kuba ziikubhite eziyi-25 000 ubude neziyi-10 000 ububanzi.) 14 Bamele bangawuthengisi, batshintshiselane ngawo okanye banikise nangentwana yalo mhlaba ukhethekileyo, kuba uyinto engcwele kuYehova.

15 “Umhlaba oshiyekileyo oziikubhite eziyi-5 000 ububanzi ngakumda oziikubhite eziyi-25 000 uza kusetyenziselwa izinto eziqhelekileyo zesixeko,+ izindlu namadlelo. Isixeko simele sibe sesiphakathini sawo.+ 16 Nantsi ke imilinganiselo yesixeko: Umda wasemntla ziikubhite eziyi-4 500, umda wasemzantsi ziikubhite eziyi-4 500, umda wasempuma ziikubhite eziyi-4 500 nomda wasentshona ziikubhite eziyi-4 500. 17 Amadlelo esixeko aza kuba ziikubhite eziyi-250 ngasemntla, eziyi-250 ngasemzantsi, eziyi-250 ngasempuma neziyi-250 ngasentshona.

18 “Ubude bomhlaba oshiyekileyo buza kungqamana nomnikelo ongcwele,+ iikubhite eziyi-10 000 ngasempuma neziyi-10⁠000 ngasentshona. Lo mhlaba uza kungqamana nomnikelo ongcwele, ibe imveliso yawo iza kuba kukutya kwabo basebenza esixekweni. 19 Uza kulinywa ngabo bonke abantu bezizwe zakwaSirayeli abasebenza esixekweni.+

20 “Xa uwonke umnikelo ziikubhite eziyi-25 000 macala omane. Nimele niwubekele bucala ube ngumnikelo ongcwele kunye nelifa lesixeko.

21 “Umhlaba oshiyekileyo macala omabini omnikelo ongcwele nelifa lesixeko, uza kuba ngowenkosi.+ Uza kuba kwimida yomnikelo eziikubhite eziyi-25 000 ngasempuma nasentshona. Uza kungqamana naloo mida, ibe uza kuba ngowenkosi. Umnikelo ongcwele nendawo engcwele yetempile ziza kuba sesiphakathini sawo.

22 “Ilifa labaLevi nelifa lesixeko liza kuba phakathi komhlaba wenkosi. Umhlaba wenkosi uza kuba phakathi komda wakwaYuda+ nowakwaBhenjamin.

23 “Yona ke imida yeentlanga ezishiyekileyo imi ngale ndlela: Umhlaba wakwaBhenjamin usuka kumda wasempuma ukuyokutsho kowasentshona.+ 24 Umhlaba wakwaSimeyon ungqamene nomda wakwaBhenjamin,+ ukusuka kumda wasempuma ukuyokutsho kowasentshona. 25 Umhlaba wakwaIsakare+ ungqamene nomda wakwaSimeyon, ukusuka kumda wasempuma ukuyokutsho kowasentshona. 26 Umhlaba wakwaZebhulon ungqamene nomda wakwaIsakare,+ ukusuka kumda wasempuma ukuyokutsho kowasentshona.+ 27 Umhlaba wakwaGadi ungqamene nomda wakwaZebhulon,+ ukususela kumda wasempuma ukuya kowasentshona. 28 Umda wasemzantsi ongqamene nowakwaGadi usuka kwaTamare+ ukuyokutsho kumanzi aseMeribhati-kadeshe+ naseNtlanjeni,*+ uyokutsho kuLwandle Olukhulu.*

29 “Lilo eli ilizwe enifanele nilahlulele izizwe zakwaSirayeli libe lilifa lazo,+ ngokwezabelo zazo,”+ itsho iNkosi enguMongami uYehova.

30 “Zizo ezi iindawo zokuphuma zesixeko: Icala lasemntla liza kuba ziikubhite eziyi-4 500.+

31 Iigeyithi zesixeko ziza kuthiywa ngokwamagama ezizwe zakwaSirayeli. Iigeyithi ezintathu ezisemntla yigeyithi yakwaRubhen, eyakwaYuda neyakwaLevi.

32 Icala lasempuma liza kuba ziikubhite eziyi-4 500 ubude, libe neegeyithi ezintathu: igeyithi yakwaYosefu, eyakwaBhenjamin neyakwaDan.

33 Icala lasemzantsi liza kuba ziikubhite eziyi-4 500, libe neegeyithi ezintathu: igeyithi yakwaSimeyon, eyakwaIsakare neyakwaZebhulon.

34 Icala lasentshona liza kuba ziikubhite eziyi-4 500 ubude, libe neegeyithi ezintathu: igeyithi yakwaGadi, eyakwa-Ashere neyakwaNafetali.

35 “Ewonke la macala aza kuba ziikubhite eziyi-18 000. Yaye ukususela ngaloo mini eso sixeko siza kubizwa ngokuthi UYehova Ulapho.”+