7 “Abufani na nokusebenza ngokunyanzelwa ubomi bomntu emhlabeni?
Yona imihla yakhe ayifani na neyomntu oqeshiweyo?+
2 Njengekhoboka ulangazelela umthunzi,
Njengomqeshwa ulinda umvuzo wakhe.+
3 Ngoko kuzo zonke ezi nyanga ubomi bam bube lilize,
Ndixhwalekile ubusuku nobusuku.+
4 Xa ndilala ndiyazibuza, ‘Ndiza kuvuka nini?’+
Kaloku ndigushugushuza ubusuku bonke de kuse.
5 Umzimba wam wonke ugcwele iimpethu namagada;+
Ulusu lwam lonke lunezikhoko nobubomvu.+
6 Iintsuku zam zikhawuleza ngaphezu komatshini wokuluka,+
Ibe ziphela kungekho themba.+
7 Khumbula ukuba ubomi bam ngumoya nje,+
Ibe soze ndiphinde ndonwabe.
8 Abo bandibonayo ngoku soze baphinde bandibone;
Uza kuthi undikhangela ndibe ndimkile.+
9 Njengokunyamalala kwelifu,
Umntu owehlela engcwabeni akaphinde aphume.+
10 Akaphinde abuyele endlini yakhe,
Akazukuphinda akhunjulwe endaweni yakhe.+
11 Nam ke andizukuzibamba.
Ndiza kuyiphalaza intlungu yam,
Ndikhalaze ndixhwalekile!+
12 Ndilulwandle na okanye isilwanyana saselwandle,
Le nto ude undibekele unogada?
13 Xa ndisithi, ‘Umandlalo wam uza kundithuthuzela;
Ibhedi yam iza kupholisa intlungu yam,’
14 Usuke undoyikise ngamaphupha,
Undothuse ngemibono,
15 Ndide ndikhethe ukufuthaniseleka,
Ndikhethe kwaukufa kunalo mzimba.+
16 Ndiyabenyanya ubomi bam;+ andisafuni kuphila.
Ndiyeke, kuba imihla yam injengomoya.+
17 Uyintoni na umntu le nto ude umhoye kangaka,
Le nto ude uzixakekise ngaye?+
18 Kutheni umhlola ntsasa nganye,
Ude umvavanye ngalo lonke ixesha?+
19 Kutheni ungakhe undifulathele nje,
Undiyeke ndiginye oku kwamathe?+
20 Ukuba ndonile, ikumosha ngantoni loo nto, wena ubona yonke into abayenzayo abantu?+
Undileqa ngantoni?
Ndingumthwalo na kuwe?
21 Kutheni ungandixoleli izono zam
Uvele ungasihoyi isiphoso sam?
Kuba sele ndiza kulala eluthulini,+
Uthi undifuna ndibe ndingasekho.”