Hezekile

36 “Wena ke, nyana womntu, profeta ngeentaba zakwaSirayeli uthi, ‘Nina zintaba zakwaSirayeli, yivani ilizwi likaYehova. 2 Ithi iNkosi enguMongami uYehova: “Utshaba luthe ngani, ‘Heke! Kwaneendawo eziphakamileyo zakudala ziye zaba zezethu!’”’+

3 “Ngoko ke profeta uthi, ‘Ithi iNkosi enguMongami uYehova: “Ngenxa yokuba beye baniphanzisa baza banihlasela macala onke, naza naba lilifa leentlanga ezisindileyo,* nabantu beqhubeka bethetha ngani, bengcolisa amagama enu,+ 4 ngoko ke, nina zintaba zakwaSirayeli, yivani ilizwi leNkosi enguMongami uYehova! Ithi iNkosi enguMongami uYehova kwiintaba, iinduli, imisinga, iintlambo, amabhodlo+ nezixeko ezishiyiweyo eziye zaphangwa kwaza kwahlekiswa ngazo ziintlanga ezisindileyo ezizijikelezileyo;+ 5 ithi iNkosi enguMongami uYehova kuzo: ‘Ndiza kuzikhalimela iintlanga ezisindileyo ne-Edom iyonke, ndinomsindo,+ kuba ziye zanemihlali zaza ­zangcolisa amagama enu,+ zalenza elazo ilizwe lam, zaliphanga zaza zathatha namadlelo alo.’”’+

6 “Ngoko profeta ngelizwe lakwaSirayeli, uthi kwiintaba, iinduli, imisinga neentlambo, ‘Ithi iNkosi enguMongami uYehova: “Jonga! Ndiza kuzikhalimela ngomsindo iintlanga, kuba ziye zanihlazisa.”’+

7 “Ngoko ithi iNkosi enguMongami uYehova: ‘Ndisiphakamisile isandla sam ndifunga ukuba iintlanga ezinijikelezileyo ziza kulithwala ihlazo lazo.+ 8 Kodwa nina zintaba zakwaSirayeli, niza kuhluma amasebe nize nivelisele abantu bam uSirayeli isiqhamo,+ kuba sele beza kubuya. 9 Kuba ndinani, yaye ndiza kunixhasa; niza kulinywa kuze kutyalwe imbewu kuni. 10 Ndiza kubandisa abantu benu, yonke indlu kaSirayeli, nezixeko ziza kuba nabantu,+ namabhodlo aphinde akhiwe.+ 11 Ndiza kubandisa abantu benu nemfuyo yenu;+ baza kuqhama bande. Ndiza kwenza kuhlale abantu kuni njengakuqala,+ ndinenze nichume ngakumbi kunangaphambili,+ nitsho nazi ukuba ndinguYehova.+ 12 Ndiza kwenza abantu bam amaSirayeli bahambe phezu kwenu, banithathe nibe lilifa labo;+ yaye anisoze niphinde noxuthe abantwana babo.’”+

13 “Ithi iNkosi enguMongami uYehova: ‘Ngenxa yokuba besithi kuni, “Nililizwe eliqwenga abantu neloxutha abantwana bezizwe zenu,”’ 14 ‘ngoko anisoze niphinde niqwenge abantu okanye noxuthe abantwana bezizwe zenu,’ itsho iNkosi enguMongami uYehova. 15 ‘Andizukuniyeka nithukwe ziintlanga okanye nenziwe intlekisa ngabantu,+ ibe anizukuphinda nizikhubekise izizwe zenu,’ itsho iNkosi enguMongami uYehova.”

16 Laphinda lafika ilizwi likaYehova kum, lisithi: 17 “Nyana womntu, xa indlu kaSirayeli yayihlala elizweni layo, yalingcolisa ngeendlela zayo nangezenzo zayo.+ Iindlela zayo zazifana kum nokungacoceki komfazi osexesheni.+ 18 Ngoko ndawukhuphela kuyo umsindo wam ngenxa yegazi eyalichithayo kwelo lizwe+ nangenxa yokulingcolisa kwayo ngezithixo zayo ezenyanyekayo.*+ 19 Ngoko ndayisasaza phakathi kweentlanga, ndayithi saa emazweni.+ Ndayigweba ngokweendlela zayo nangokwezenzo zayo. 20 Kodwa ekufikeni kwayo kwezo ntlanga, abantu balingcolisa igama lam elingcwele+ ngokuthi, ‘Aba ngabantu bakaYehova, kodwa kwanyanzeleka balishiye ilizwe lakhe.’ 21 Ngoko ndiza kukhathazeka ngegama lam elingcwele, elingcoliswe yindlu kaSirayeli phakathi kweentlanga.”+

22 “Ngoko yithi kwindlu kaSirayeli, ‘Ithi iNkosi enguMongami uYehova: “Andiyenzeli nina le nto, ndlu kaSirayeli, kodwa ndiyenzela igama lam elingcwele, eniye nalingcolisa phakathi kweentlanga.”’+ 23 ‘Ngokuqinisekileyo ndiza kulenza ngcwele igama lam elikhulu,+ eliye langcoliswa phakathi kweentlanga, lingcoliswa nini aba phakathi kwazo; ibe iintlanga ziza kutsho zazi ukuba ndinguYehova,+ xa ndibonakala ukuba ndingcwele phakathi kwenu phambi kwamehlo azo,’ itsho iNkosi enguMongami uYehova. 24 ‘Ndiza kunibuyisa ezintlangeni, ndize ndiniqokelele emazweni onke, ndinizise elizweni lenu.+ 25 Ndiza kunifefa ngamanzi acocekileyo, nicoceke;+ ndiza kunicoca kuko konke ukungcola kwenu+ nakwizithixo zenu ezenyanyekayo.+ 26 Ndiza kuninika intliziyo entsha+ ndize ndinifake umoya omtsha.+ Ndiza kuyikhupha intliziyo yelitye kuni,+ ndininike intliziyo yenyama.* 27 Ndiza kufaka kuni umoya wam, ndinenze nihambe ngemiyalelo yam,+ ibe niza kuzigcina nize nizithobele izigwebo zam. 28 Emva koko niza kuhlala elizweni endalinika ookhokho benu; niza kuba ngabantu bam, mna ndibe nguThixo wenu.’+

29 “‘Ndiza kunisindisa ekungcoleni kwenu konke, ndinenze nibe nokutya okuziinkozo okuninzi, yaye andizukunizisela ndlala.+ 30 Ndiza kuyenza iqhame imithi, ichume nemveliso emasimini, ukuze ningaphindi nihlazeke phakathi kweentlanga ngenxa yendlala.+ 31 Ngoko niza kuzikhumbula iindlela zenu ezimbi nezenzo zenu ezingalunganga, yaye niza kuzenyanya ngenxa yezono zenu nezenzo zenu ezenyanyekayo.+ 32 Kodwa nantsi into enimele niyazi: Andiyenzeli nina le nto,’+ itsho iNkosi enguMongami uYehova. ‘Kunoko, yibani neentloni nize nihlazeke ngenxa yeendlela zenu, ndlu kaSirayeli.’

33 “Ithi iNkosi enguMongami uYehova: ‘Ngemini endiya kunicoca ngayo kuzo zonke iziphoso zenu, ndiza kwenza izixeko zibe nabantu,+ namabhodlo aphinde akhiwe.+ 34 Ilizwe elaliphanzile emehlweni abo bonke abantu abadlulayo, liza kuphinda lilinywe. 35 Abantu baza kuthi: “Ilizwe elaliphanzile lisuke laba njengomyezo wase-Eden,+ nezixeko ezazingamabhodlo, ziphanzile yaye zichithiwe, ngoku zikhuselekile yaye zinabantu.”+ 36 Iintlanga ezinijikelezileyo eziza kube zishiyekile ziza kutsho zazi ukuba mna Yehova ndizakhile izinto ebezichithiwe, yaye ndizityalile izinto ebezitshabalele. Mna Yehova ndiyithethile ndaza ndayenza loo nto.’+

37 “Ithi iNkosi enguMongami uYehova: ‘Ndiza kuyivumela nendlu kaSirayeli ukuba indicele ndandise abantu bayo babe baninzi njengomhlambi. 38 Njengomhlambi wabantu abangcwele, njengomhlambi weYerusalem ngamaxesha etheko layo,+ izixeko ebezingamabhodlo ziza kugcwala yimihlambi yabantu,+ batsho bazi ukuba ndinguYehova.’”