Hezekile
39 “Wena ke, nyana womntu, profeta ngoGogi,+ uthi, ‘Ithi iNkosi enguMongami uYehova: “Ndilutshaba lwakho Gogi, nkosi* eyintloko yakwaMesheki nakwaTubhali.+ 2 Ndiza kukujika, ndikukhokele ndize ndikunyuse kweyona mimandla ithe qelele yasemntla,+ ndikuzise ezintabeni zakwaSirayeli. 3 Ndiza kusibetha siwe isaphetha esandleni sakho sasekhohlo, ndiziwise neentolo ezisesandleni sakho sasekunene. 4 Uza kuwa ezintabeni zakwaSirayeli,+ wena nayo yonke imikhosi yakho nezizwana eziza kube zikunye nawe. Ndiza kukwenza ube kukutya kwazo zonke iintlobo zeentaka ezitya inyama namarhamncwa asendle.”’+
5 “‘Uza kuwa esigangeni,+ kuba mna ndithethile,’ itsho iNkosi enguMongami uYehova.
6 “‘Ndiza kuthumela umlilo kwaMagogi nakwabo bahlala kwiziqithi ezikhuselekileyo,+ batsho bazi ukuba ndinguYehova. 7 Ndiza kulazisa igama lam elingcwele phakathi kwabantu bam amaSirayeli, ibe andizukuphinda ndiliyeke lingcoliswe igama lam elingcwele; iintlanga ziza kutsho zazi ukuba ndinguYehova,+ Lowo Ungcwele kwaSirayeli.’+
8 “‘Ngokuqinisekileyo iyeza, ibe iza kwenzeka,’ itsho iNkosi enguMongami uYehova. ‘Yiyo le imini ebendithetha ngayo. 9 Abemi bezixeko zakwaSirayeli baza kuphuma babase imililo ngezixhobo, ngamakhaka amancinci namakhulu, ngezaphetha neentolo, ngamagqudu* nemikhonto. Baza kubasa ngazo imililo+ iminyaka esixhenxe. 10 Akuzukufuneka batheze nkuni endle okanye baqokelele nkuni zakubasa emahlathini, kuba baza kubasa imililo ngezixhobo zokulwa.’
“‘Baza kuboxuthela izinto abo boxuthe izinto zabo, baze bathimbe izinto zabo babebathimbela,’ itsho iNkosi enguMongami uYehova.
11 “‘Ngaloo mini uGogi+ ndiza kumnika apho kwaSirayeli intlambo yabo badlula ngasempuma elwandle ibe ngamangcwaba akhe, yaye aza kuyivala indlela egqitha apho. Baza kumngcwabela apho uGogi nabo bonke abantu bakhe, yaye baza kuyibiza ngokuba yiNtlambo YaseHamon-Gogi.*+ 12 Indlu kaSirayeli iza kubangcwaba iinyanga ezisixhenxe ukuze licoceke ilizwe.+ 13 Baza kungcwatywa ngabantu bonke belizwe, ibe abo bantu baza kuduma ngemini yokuzizukisa kwam,’+ itsho iNkosi enguMongami uYehova.
14 “‘Kuza kuthunywa amadoda ukuba atyhutyhe ilizwe engcwaba izidumbu ezishiyekileyo phezu komhlaba, ukuze alicoce ilizwe. Aza kuqhubeka ezikhangela kangangeenyanga ezisixhenxe. 15 Xa abantu abadlula elizweni bebona ithambo lomntu, baza kumisa uphawu ecaleni kwalo, baze abo bangcwabayo balingcwabe kwiNtlambo YaseHamon-Gogi.+ 16 Kuza kubakho isixeko apho esibizwa ngokuba yiHamona.* Baza kulicoca ngaloo ndlela ke ilizwe.’+
17 “Wena ke, nyana womntu, ithi iNkosi enguMongami uYehova: ‘Yithi kuzo zonke iintlobo zeentaka nakuwo onke amarhamncwa, “Qokelelanani nize. Qokelelanani macala onke kumbingelelo wam endinilungiselele wona, umbingelelo omkhulu ezintabeni zakwaSirayeli.+ Niza kutya inyama nisele negazi.+ 18 Niza kutya inyama yamakroti nisele negazi leenkosi zomhlaba. Aba baziinkunzi zeegusha, amatakane eegusha, iibhokhwe neenkunzi zeenkomo; bonke bazizilwanyana ezityetyisiweyo zaseBhashan. 19 Niza kuzingxala ngamanqatha nize nisele igazi nide ninxile embingelelweni endiza kunenzela wona.”’
20 “‘Etafileni yam niza kuhlutha ngamahashe nabaqhubi beenqwelo, ngamakroti nazo zonke iintlobo zamadoda okulwa,’+ itsho iNkosi enguMongami uYehova.
21 “‘Ndiza kuzizukisa phakathi kweentlanga, yaye zonke iintlanga ziza kuwubona umgwebo endiwuphumezileyo namandla* endiwabonakalisileyo phakathi kwazo.+ 22 Ukususela ngaloo mini indlu kaSirayeli iza kwazi ukuba ndinguYehova uThixo wayo. 23 Iintlanga ziza kutsho zazi ukuba indlu kaSirayeli yathinjwa ngenxa yesono sayo, kuba yayingathembekanga kum.+ Ngoko ndabufihla ubuso bam kuyo+ ndaza ndayinikela kwiintshaba zayo,+ yaza yonke yawa likrele. 24 Ndenza kuyo ngokokungacoceki kwayo nangokwezono zayo, ndaza ndabufihla ubuso bam kuyo.’
25 “Ngoko ke ithi iNkosi enguMongami uYehova: ‘Ndiza kubabuyisela abathinjiweyo bakaYakobi,+ ndibe nenceba kwindlu kaSirayeli;+ ibe ndiza kulithethelela ngokupheleleyo igama* lam elingcwele.+ 26 Emva kokuhlaziswa kwabo ngenxa yako konke ukungathembeki kwabo kum,+ baza kuhlala bekhuselekile elizweni labo, kungekho mntu uboyikisayo.+ 27 Xa ndibabuyisa bevela kwizizwana ndize ndibaqokelele ndawonye bevela nasemazweni eentshaba zabo,+ ndiza kubonisa ukuba ndingcwele phakathi kwabo emehlweni eentlanga ezininzi.’+
28 “‘Baza kutsho bazi ukuba ndinguYehova uThixo wabo xa ndibathumela ekuthinjweni phakathi kweentlanga, ndize ndiphinde ndibabuyisele kwilizwe labo, ndingashiyi namnye wabo ngasemva.+ 29 Andizukuphinda ndibufihle ubuso bam kubo,+ kuba ndiza kuthululela umoya wam phezu kwendlu kaSirayeli,’+ itsho iNkosi enguMongami uYehova.”