LEVITIKUS

1 UYehova wabiza uMoses waza wathetha naye esententeni yokuhlangana,+ wathi: 2 “Thetha namaSirayeli,* uthi kuwo, ‘Ukuba nabani na kuni uzisa umnikelo osisilwanyana sasekhaya kuYehova, nifanele nizise umnikelo lowo wenu niwuthatha emhlambini weenkomo nasemhlambini weegusha.+

3 “‘Ukuba umnikelo wakhe ngumnikelo otshiswayo othathwe emhlambini weenkomo, ufanele azise inkunzi ephilileyo.+ Ufanele ayizise ngokuzithandela+ kumnyango wentente yokuhlangana phambi koYehova. 4 Umele abeke isandla sakhe phezu kwentloko yaloo mnikelo utshiswayo, ibe uza kwamkelwa umnikelo egameni lakhe ukuze zihlawulelwe izono zakhe.

5 “‘Emva koko elo thole liyinkunzi yenkomo limele lixhelwe phambi koYehova, bona oonyana baka-Aron, ababingeleli,+ baza kuzisa igazi baze balifefe kuwo onke amacala esibingelelo+ esikumnyango wentente yokuhlangana. 6 Umnikelo otshiswayo umele uhlinzwe uze unqunqwe.+ 7 Oonyana baka-Aron, ababingeleli, bamele babeke umlilo phezu kwesibingelelo+ baze babeke iinkuni emlilweni. 8 Baza kuyibeka kakuhle inyama enqunqiweyo,+ kunye nentloko namanqatha, phezu kweenkuni ezisemlilweni ophezu kwesibingelelo. 9 Amathumbu namanqina awo aza kuhlanjwa ngamanzi, yaye umbingeleli umele aqhumise ngazo zonke ezo zinto esibingelelweni, zibe ngumnikelo otshiswayo, umnikelo otshiswa ngomlilo olivumba elimnandi kuYehova.+

10 “‘Ukuba umnikelo wakhe otshiswayo yigusha okanye ibhokhwe,+ imele ibe yinkunzi ephilileyo.+ 11 Imele ixhelelwe kwicala elingasemntla kwesibingelelo phambi koYehova, ibe oonyana baka-Aron, ababingeleli, baza kufefa igazi layo kumacala onke esibingelelo.+ 12 Iza kunqunqwa, aze umbingeleli ayibeke kunye nentloko namanqatha ayo phezu kweenkuni ezikumlilo ophezu kwesibingelelo. 13 Wona amathumbu namanqina uza kuwahlamba ngamanzi, aze umbingeleli azibeke zonke, aqhumise ngazo esibingelelweni. Ngumnikelo otshiswayo lowo, umnikelo otshiswa ngomlilo olivumba elimnandi kuYehova.

14 “‘Kodwa ukuba uzisa iintaka zibe ngumnikelo otshiswayo kuYehova, uza kuthatha kumahobe asendle okanye kumantshontsho amahobe afuywayo.+ 15 Umbingeleli uza kuyizisa esibingelelweni loo ntaka, ayivule inxeba entanyeni aze aqhumise ngayo esibingelelweni, kodwa lona igazi layo limele livuziswe ecaleni kwesibingelelo. 16 Umele akhuphe indlelo* neentsiba zayo aze azilahle ecaleni kwesibingelelo, ngasempuma, kwindawo yothuthu.*+ 17 Uza kuyihlinza emaphikweni kodwa angayahluli kubini. Emva koko uza kuqhumisa ngayo esibingelelweni phezu kweenkuni ezisemlilweni. Ngumnikelo otshiswayo lowo, umnikelo otshiswa ngomlilo olivumba elimnandi kuYehova.

2 “‘Ukuba umntu uzisa umnikelo wokutya+ kuYehova, loo mnikelo umele ube ngumgubo ocoliweyo, aze agalele ioli nentlaka yokuqhumisa phezu kwawo.+ 2 Umele awuzise koonyana baka-Aron, ababingeleli, aze umbingeleli akhe isandla sigcwale kulo mgubo ucoliweyo uneoli nentlaka yokuqhumisa, aqhumise ngalo mgubo+ awukhileyo esibingelelweni, umele wonke umnikelo, ube ngumnikelo otshiswa ngomlilo olivumba elimnandi kuYehova. 3 Umnikelo wokutya oye washiyeka uza kuba ngoka-Aron noonyana bakhe,+ ube yeyona nto ingcwele+ yomnikelo kaYehova otshiswa ngomlilo.

4 “‘Ukuba uye wazisa umnikelo wokutya obhakwe eontini, ufanele wenziwe ngomgubo ocoliweyo ogalelwe ioli, uze ube ngamaqebengwana arawundi angenagwele, okanye izonka ezisicaba ezingenagwele eziqatywe amafutha.+

5 “‘Ukuba umnikelo wakho ngoweenkozo ibe wenzelwe epanini,+ umele ube ngowomgubo ocoliweyo ongenagwele ogalelwe ioli. 6 Ufanele uqhekezwe, uze ugalele ioli phezu kwaloo maqhekeza.+ Lowo ngumnikelo wokutya.

7 “‘Ukuba umnikelo wakho ngumnikelo wokutya owenziwe ngembiza, mawenziwe ngomgubo ocoliweyo oneoli. 8 Ufanele uzise umnikelo wokutya owenziwe ngezi zinto kuYehova, uwunike umbingeleli aze yena awusondeze esibingelelweni. 9 Yena umbingeleli uza kuthatha intwana yaloo mnikelo wokutya, imele wonke umnikelo+ aze aqhumise ngayo esibingelelweni, ibe ngumnikelo otshiswa ngomlilo olivumba elimnandi kuYehova.+ 10 Umnikelo wokutya oye washiyeka uza kuba ngoka-Aron noonyana bakhe, ube yeyona nto ingcwele yomnikelo kaYehova otshiswa ngomlilo.+

11 “‘Anifanele nizise kuYehova umnikelo wokutya onegwele,+ kuba animele niqhumise kuYehova ngegwele nangencindi yeziqhamo* njengomnikelo otshiswa ngomlilo.

12 “‘Ningazizisa kuYehova zibe ngumnikelo wesivuno sokuqala,+ kodwa azimele zisiwe esibingelelweni njengevumba elimnandi.

13 “‘Yonke iminikelo yakho yeenkozo imele inongwe ngetyiwa. Ingaze yenzeke into yokuba ungayifaki ityiwa yesivumelwano sikaThixo wakho kumnikelo wakho weenkozo. Yonke iminikelo yakho yizise inetyiwa.+

14 “‘Ukuba uzisa kuYehova umnikelo oziinkozo osisivuno sokuqala,* mayibe ngumgrayo weenkozo ezintsha ezigcadwe ngomlilo, ube ngumnikelo oziinkozo osisivuno sokuqala.*+ 15 Uze ugalele ioli nentlaka yokuqhumisa phezu kwawo. Lowo ngumnikelo wokutya. 16 Umbingeleli uza kuqhumisa ngawo, umele wonke umnikelo,+ oko kukuthi intwana yomgrayo oneoli nayo yonke intlaka yokuqhumisa, ibe ngumnikelo otshiswa ngomlilo kuYehova.

3 “‘Ukuba umnikelo wakhe ngumbingelelo wobuhlobo,*+ ibe uwuthatha emhlambini weenkomo, nokuba yinkunzi okanye yimazi, ufanele ube sisilwanyana esiphilileyo phambi koYehova. 2 Umele abeke isandla entlokweni yomnikelo wakhe, uze uxhelelwe kumnyango wentente yokuhlangana, yaye oonyana baka-Aron, ababingeleli, baza kufefa igazi lawo kuwo onke amacala esibingelelo. 3 Uza kuzisa inxalenye yombingelelo wobuhlobo ube ngumnikelo otshiswa ngomlilo oya kuYehova:+ umhlehlo+ ogqume amathumbu, amanqatha onke asemathunjini, 4 izintso zombini nenqatha lazo elingasesinqeni. Uza kuwususa nomhlehlo ophezu kwesibindi kunye nezintso.+ 5 Baza kuqhumisa ngazo oonyana baka-Aron esibingelelweni, phezu komnikelo otshiswayo ophezu kweenkuni ezisemlilweni,+ zibe ngumnikelo otshiswa ngomlilo olivumba elimnandi kuYehova.+

6 “‘Ukuba umnikelo wakhe uwuthatha emhlambini weegusha okanye weebhokhwe yaye ngumbingelelo wobuhlobo oya kuYehova, umele azise inkunzi okanye imazi ephilileyo.+ 7 Ukuba umnikelo wakhe litakane legusha eliyinkunzi, uza kulizisa phambi koYehova. 8 Uza kubeka isandla phezu kwentloko yomnikelo wakhe, uze uxhelelwe phambi kwentente yokuhlangana. Oonyana baka-Aron baza kufefa igazi lawo kuwo onke amacala esibingelelo. 9 Uza kuthatha amanqatha kumbingelelo wobuhlobo, awazise abe ngumnikelo otshiswa ngomlilo oya kuYehova.+ Uza kuwususa wonke umsila otyebileyo ngakwithambo lomqolo, umhlehlo ogqume amathumbu nawo onke amanqatha asemathunjini, 10 izintso zombini nenqatha lazo elingasesinqeni. Uza kuwususa nomhlehlo ophezu kwesibindi kunye nezintso.+ 11 Umbingeleli uza kuqhumisa ngazo esibingelelweni zibe kukutya,* umnikelo otshiswa ngomlilo oya kuYehova.+

12 “‘Ukuba umnikelo wakhe yibhokhwe, uza kuyizisa phambi koYehova. 13 Uza kubeka isandla entlokweni yayo, ize ixhelelwe phambi kwentente yokuhlangana, yaye oonyana baka-Aron bamele bafefe igazi layo kuwo onke amacala esibingelelo. 14 Inxalenye aza kuyisa ibe ngumnikelo wakhe otshiswa ngomlilo oya kuYehova ngumhlehlo ogqume amathumbu, onke amanqatha asemathunjini,+ 15 izintso zombini nenqatha lazo elingasesinqeni. Uza kuwususa nomhlehlo ophezu kwesibindi kunye nezintso. 16 Umbingeleli uza kuqhumisa ngazo esibingelelweni zibe kukutya,* umnikelo otshiswa ngomlilo olivumba elimnandi. Onke amanqatha ngakaYehova.+

17 “‘Lo ngumthetho oza kuhlala uhleli kwizizukulwana zenu, kuzo zonke iindawo enihlala kuzo: Nimele ningalityi tu inqatha negazi.’”+

4 UYehova waqhubeka wathi kuMoses: 2 “Yithi kumaSirayeli, ‘Ukuba kwenzekile umntu wona ngempazamo,+ wenza nayiphi na into kwezo uYehova athe mazingenziwa, nantsi into emayenzeke:

3 “‘Ukuba umbingeleli othanjisiweyo*+ wonile+ waza wabazisela ityala abantu, umele azise inkunzi yethole lenkomo eliphilileyo ibe ngumnikelo wesono oya kuYehova ngenxa yesono asenzileyo.+ 4 Uza kuyizisa inkunzi yenkomo kumnyango wentente yokuhlangana+ phambi koYehova, abeke isandla phezu kwentloko yayo, aze ayixhele phambi koYehova.+ 5 Emva koko, umbingeleli othanjisiweyo*+ uza kuthatha inxalenye yegazi lale nkunzi alizise ententeni yokuhlangana. 6 Umbingeleli uza kuthi nkxu umnwe wakhe kule nxalenye yegazi+ aze atshize ngalo kasixhenxe+ phambi koYehova, phambi kwekhethini yendawo engcwele. 7 Eli gazi uza kuliqaba ezimpondweni zesibingelelo sesiqhumiso esiqholiweyo+ phambi koYehova, esisententeni yokuhlangana, aze lonke igazi elishiyekileyo lenkunzi yenkomo aligalele kwisiseko sesibingelelo somnikelo otshiswayo,+ esisemnyango wentente yokuhlangana.

8 “‘Uza kuwasusa onke amanqatha enkunzi yenkomo yomnikelo wesono, umhlehlo ogqume amathumbu, amanqatha onke asemathunjini, 9 izintso zombini nenqatha lazo elingasesinqeni. Uza kususa nomhlehlo ophezu kwesibindi kunye nezintso.+ 10 Kuza kwenziwa kanye ngendlela ekwenziwa ngayo kwinkunzi yenkomo eba ngumbingelelo wobuhlobo.+ Umbingeleli uza kuqhumisa ngala manqatha esibingelelweni somnikelo otshiswayo.

11 “‘Lona ufele lwenkomo nayo yonke inyama yayo, intloko, amanqina, amathumbu nomswane wayo,+ 12 yonke into eseleyo kwinkunzi yenkomo, umele ayikhuphele ngaphandle kwenkampu kwindawo ecocekileyo apho kugalelwa khona uthuthu,* aze ayitshise phezu kweenkuni ngomlilo.+ Mayitshiselwe apho kulahlwa khona uthuthu.

13 “‘Ukuba ke lonke ibandla lakwaSirayeli liye laba netyala ngenxa yokwenza impazamo,+ laza alabona ukuba lenze into uYehova athe mayingenziwa,+ 14 saziwa isono elisenzileyo, limele lizise ithole lenkomo eliyinkunzi libe ngumnikelo wesono, lilizise phambi kwentente yokuhlangana. 15 Amadoda amakhulu ebandla aza kubeka izandla zawo phezu kwentloko yenkunzi yenkomo phambi koYehova, kwaye loo nkunzi yenkomo iza kuxhelwa phambi koYehova.

16 “‘Emva koko umbingeleli othanjisiweyo* uza kuzisa inxalenye yegazi lenkunzi yenkomo ententeni yokuhlangana. 17 Umbingeleli umele awuthi nkxu umnwe wakhe egazini aze afefe ngalo kasixhenxe phambi koYehova phambi kwekhethini.+ 18 Emva koko uza kuqaba inxalenye yegazi ezimpondweni zesibingelelo+ esiphambi koYehova, esisententeni yokuhlangana, aze lonke igazi eliseleyo aligalele esisekweni sesibingelelo somnikelo otshiswayo, esikumnyango wentente yokuhlangana.+ 19 Uza kususa onke amanqatha awo, aze aqhumise ngawo esibingelelweni.+ 20 Makenze kule nkunzi yenkomo kanye njengokuba enzile kwinkunzi yenkomo yomnikelo wesono. Uza kwenza loo nto nakule, umbingeleli amhlawulele,+ aze ke axolelwe. 21 Uza kuyikhuphela inkunzi yenkomo ngaphandle kwenkampu aze ayitshise, kanye ngendlela ayitshise ngayo inkunzi yenkomo yokuqala.+ Lowo ke ngumnikelo wesono webandla.+

22 “‘Xa kone inkokheli,+ yathi ingaqondanga yenza enye yazo zonke izinto uYehova uThixo wayo ayalele ukuba zingenziwa, yaza ke yanetyala, 23 okanye iye yabona ukuba kukho isono esenzileyo, imele izise itakane lebhokhwe eliyinkunzi ephilileyo, libe ngumnikelo wayo. 24 Iza kubeka isandla sayo phezu kwentloko yelo takane lebhokhwe, ize ilixhelele apho uxhelelwa khona umnikelo otshiswayo phambi koYehova.+ Lowo ke ngumnikelo wesono. 25 Umbingeleli uza kuthi nkxu umnwe wakhe egazini lomnikelo wesono, aliqabe ezimpondweni+ zesibingelelo somnikelo otshiswayo, aze igazi elishiyekileyo aligalele esisekweni sesibingelelo somnikelo otshiswayo.+ 26 Uza kuqhumisa ngamanqatha awo onke esibingelelweni njengamanqatha ombingelelo wobuhlobo,+ aze ayihlawulele ngenxa yesono sayo, ize ke ixolelwe.

27 “‘Ukuba nabani na ebantwini belizwe uye wona engaqondanga ngokwenza enye yezinto uYehova ayalele ukuba zingenziwa waza wanetyala,+ 28 okanye uye wabona ukuba kukho isono asenzileyo, umele azise itakane lebhokhwe elilithokazi eliphilileyo, libe ngumnikelo ngenxa yesono asenzileyo. 29 Uza kubeka isandla sakhe phezu kwentloko yomnikelo wesono, aze umnikelo wesono awuxhelele kwindawo enye neyomnikelo otshiswayo.+ 30 Umbingeleli uza kuthi nkxu umnwe wakhe egazini lomnikelo wesono, aliqabe ezimpondweni zesibingelelo somnikelo otshiswayo, aze igazi elishiyekileyo aligalele esisekweni sesibingelelo.+ 31 Uza kususa onke amanqatha awo,+ kanye ngendlela asuswa ngayo amanqatha ombingelelo wobuhlobo,+ aqhumise ngawo esibingelelweni abe livumba elimnandi kuYehova, yaye umbingeleli uza kumhlawulela, aze ke axolelwe.

32 “‘Kodwa ukuba umnikelo wakhe wesono litakane legusha, ufanele azise ithokazi lalo eliphilileyo. 33 Uza kubeka isandla sakhe phezu kwentloko yomnikelo wesono, aze alixhele libe ngumnikelo wesono, kwindawo oxhelelwa kuyo umnikelo otshiswayo.+ 34 Umbingeleli uza kuthi nkxu umnwe wakhe egazini lomnikelo wesono, aliqabe ezimpondweni zesibingelelo somnikelo otshiswayo,+ aze igazi elishiyekileyo aligalele esisekweni sesibingelelo. 35 Uza kuwasusa onke amanqatha awo ngendlela asuswa ngayo amanqatha enkunzi yetakane legusha yombingelelo wobuhlobo, aqhumise ngawo esibingelelweni phezu kweminikelo kaYehova etshiswa ngomlilo,+ yaye umbingeleli uza kumhlawulela ngesono asenzileyo, aze ke axolelwe.+

5 “‘Ukuba umntu uye wabona okanye wazi ngesono esenziweyo, ulingqina.+ Ukuba emva kokuba eve isaziso* sokuba aze kuba lingqina ngeso sono aze angasixeli, sisono eso. Umele aphenduliswe ngesono sakhe.

2 “‘Okanye xa umntu echukumise into engacocekanga, nokuba sisidumbu serhamncwa, esesilwanyana sasekhaya okanye sesinye sezilwanyana ezinyakazelayo,+ uza kuba netyala enoba ebengazazi ukuba azicocekanga. 3 Okanye ukuba uthe ngenxa yokungazi wachukumisa nakuphi na ukungcola komntu,+ nantoni na engacocekanga enokumenza angacoceki, aze ayazi loo nto, uza kuba netyala.

4 “‘Okanye ukuba umntu ufunge ngokungxama ukuba uza kwenza into, nokuba ilungile okanye imbi, nokuba yintoni na, waza wabona ukuba ukhawuleze wafunga, uza kuba netyala.*+

5 “‘Ukuba uye wanetyala nakweyiphi na kwezo zinto, umele achaze+ ukuba wone kweyiphi. 6 Uza kuzisa nomnikelo wetyala kuYehova ngenxa yesono sakhe,+ ithokazi alithathe emhlambini nokuba lithokazi legusha okanye itakane lebhokhwe elilithokazi, libe ngumnikelo wesono. Emva koko umbingeleli uza kumhlawulela loo mntu ngesono sakhe.

7 “‘Kodwa ukuba loo mntu akanayo igusha, umele azise kuYehova amahobe amabini asendle okanye amantshontsho amabini amahobe afuywayo+ abe ngumnikelo wakhe wetyala, elinye libe ngumnikelo wesono lize elinye libe ngumnikelo otshiswayo.+ 8 Umele awazise kumbingeleli, aze umbingeleli azise elomnikelo wesono kuqala, alivule inxeba entanyeni, kodwa angayiqhawuli. 9 Uza kufefa inxalenye yegazi lomnikelo wesono ecaleni kwesibingelelo, kodwa igazi eliseleyo liza kukhanyelwa esisekweni sesibingelelo.+ Lowo ke ngumnikelo wesono. 10 Umbingeleli uza kulenza elinye ihobe libe ngumnikelo otshiswayo ngendlela ekuqhele ukwenziwa ngayo.+ Uza kusihlawulela isono sakhe, aze loo mntu axolelwe.+

11 “‘Ukuba akanawo namahobe amabini asendle okanye amantshontsho amabini amahobe afuywayo, umele azise isishumi se-efa*+ yomgubo ocoliweyo, ube ngumnikelo wesono. Akamele agalele oli kuwo okanye abeke intlaka yokuqhumisa phezu kwawo, kuba ngumnikelo wesono lowo. 12 Uza kuwuzisa kumbingeleli, aze umbingeleli akhe isandla sigcwale kuwo, uze loo mgubo usesandleni umele wonke umnikelo, aqhumise ngawo esibingelelweni phezu kweminikelo kaYehova etshiswa ngomlilo. Lowo ke ngumnikelo wesono. 13 Umbingeleli uza kumhlawulela ngesono sakhe asenzileyo, enoba sesiphi na kwezi, aze ke axolelwe.+ Okuseleyo kulo mnikelo kuza kuba kokombingeleli+ njengakumnikelo wokutya okuziinkozo.’”+

14 Waqhubeka wathi uYehova kuMoses: 15 “Ukuba umntu uthe ngempazamo wophula umthetho ongezinto ezingcwele zikaYehova,+ umele azise kuYeho­va inkunzi yegusha ephilileyo ethathwe emhlambini ibe ngumnikelo wetyala.+ Ixabiso layo leeshekele* zesilivere liqingqwa ngokweshekele yendawo engcwele.*+ 16 Yaye uza kuhlawula ngenxa yokwaphula umthetho ongezinto ezingcwele, aze ongeze isihlanu selo xabiso.+ Yonke loo nto uza kuyinika umbingeleli ukuze asihlawulele isono sakhe+ ngenkunzi yegusha yomnikelo wetyala, aze ke axolelwe.+

17 “Ukuba umntu uye wona ngokwenza nantoni na athe uYehova mayingenziwa, nokuba ebengazi, uza kuba netyala ibe uza kuphendula ngenxa yesono sakhe.+ 18 Umele azise inkunzi yegusha ephilileyo kumbingeleli ngokwexabiso eliqikelelwayo, ibe ngumnikelo wetyala.+ Emva koko umbingeleli uza kumhlawulela ngempazamo ayenze engaqondanga, aze ke axolelwe. 19 Lowo ke ngumnikelo wetyala. Loo mntu unetyala lokona uYehova.”

6 UYehova waqhubeka wathi kuMoses: 2 “Ukuba umntu uye wona waza akathembeka kuYehova+ ngokuqhatha ummelwane wakhe ngento ebeyigcinisiwe+ okanye esisibambiso, ngokubela ummelwane wakhe okanye amqhathe, 3 okanye ufumana into ebilahlekile aze azenze ongenalwazi ngayo, yaye ukuba ufunga exoka ngaso nasiphi na isono esinjalo anokusenza,+ nantsi into amakayenze: 4 Ukuba loo mntu uye wona waza waba netyala, umele ayibuyise into ayibileyo, into ayithathe ngenkohlakalo, into ayirhwaphilizileyo, into ebeyigcinisiwe okanye ebilahlekile waza wayifumana, 5 okanye nantoni na aye wayifungela exoka. Uza kuyibhatala yonke kumniniyo+ aze ongeze isihlanu sexabiso layo. Uza kuyinika umnikazi wayo ngemini afunyaniswe ngayo enetyala. 6 Uza kunika umbingeleli inkunzi yegusha ephilileyo ethathwe emhlambini eyeyexabiso elibekiweyo. Iza kuba ngumnikelo wetyala kuYehova.+ 7 Umbingeleli uza kuwunikela kuYehova loo mnikelo aze loo mntu acoceke, aze axolelwe ngayo nantoni na ayenzileyo emenze wanetyala.”+

8 UYehova waqhubeka esithi kuMoses: 9 “Yalela uAron noonyana bakhe uthi: Nanku umthetho womnikelo otshiswayo:+ Umnikelo otshiswayo uza kuhlala eziko phezu kwesibingelelo ubusuku bonke kude kuse. Umlilo uza kuhlala uvutha esibingelelweni. 10 Umbingeleli uza kunxiba impahla yakhe yokusebenza eyenziwe ngelinen,+ anxibe nempahla yangaphantsi yelinen.*+ Emva koko, uza kususa uthuthu*+ lomnikelo otshiswe ngomlilo phezu ­kwesibingelelo, aze alubeke ecaleni kwaso. 11 Akugqiba, uza kuyikhulula loo mpahla+ anxibe enye, aze ayokululahlela ngaphandle kwenkampu olo thuthu, kwindawo ecocekileyo.+ 12 Umlilo uza kugcinwa uvutha kwisibingelelo. Awumele ucime. Umbingeleli umele abase iinkuni+ kuso ntsasa nganye aze awubeke kakuhle umnikelo otshiswayo phezu kwazo, aqhumise phezu kwawo ngamanqatha ombingelelo wobuhlobo.+ 13 Umlilo uza kuhlala uvutha esibingelelweni. Awumele ucime.

14 “‘Nanku ke umthetho womnikelo wokutya:+ Nina bonyana baka-Aron, niza kuwuzisa phambi koYehova ngaphambi kwesibingelelo. 15 Omnye wabo uza kukha isandla sigcwale kumgubo ocoliweyo oneoli nentlaka yokuqhumisa. Emva koko uza kuqhumisa ngawo kwisibingelelo ube ngumnikelo omela wonke umnikelo uze ube livumba elimnandi kuYehova.+ 16 Into eseleyo iza kutyiwa nguAron noonyana bakhe.+ Baza kuyityela endaweni engcwele njengamaqebengwana angenagwele. Baza kuyityela ngaphakathi eyadini yentente yokuhlangana.+ 17 Loo mnikelo mawungabhakwa ngayo nantoni na enegwele.+ Usisabelo sabo endibanike sona kumnikelo wam otshiswa ngomlilo.+ Siyeyona nto ingcwele,+ njengomnikelo wesono nanjengomnikelo wetyala. 18 Bonke oonyana baka-Aron baza kuwutya.+ Sisibonelelo sabo eso esisuka kwiminikelo kaYehova etshiswa ngomlilo esiza kuhlala sihleli kwizizukulwana zenu.+ Yonke into eyichukumisayo* iza kuba ngcwele.’”

19 Kwakhona uYehova wathi kuMoses: 20 “Lo ngumnikelo uAron noonyana bakhe abaza kuwuzisa kuYehova ngomhla wokuthanjiswa kwakhe:+ isishumi se-efa*+ somgubo ocoliweyo ube ngumnikelo wokutya ekunikelwa ngawo rhoqo.+ Kusasa uza kunikela ihafu yawo aze ngokuhlwa anikele enye ihafu. 21 Uza kubhakwa ngeoli epanini.+ Uza kuwuzisa udityaniswe kakuhle neoli ungamaqhekeza abhakiweyo omnikelo wokutya olivumba elimnandi kuYehova. 22 Umbingeleli oza kuthanjiswa emva kwakhe ophuma koonyana bakhe+ uza kuwenza naye. Lo ngumthetho oza kuhlala ixesha elide: Wonke loo mnikelo uza kunikelwa kuYehova. 23 Wonke umnikelo wokutya wombingeleli ufanele ube ngumnikelo opheleleyo. Umele ungatyiwa.”

24 Waphinda wathi uYehova kuMoses: 25 “Yithi kuAron nakoonyana bakhe, ‘Lo ngumthetho womnikelo wesono:+ Endaweni ekuxhelelwa kuyo umnikelo otshiswayo,+ nomnikelo wesono uza kuxhelelwa apho phambi koYehova. Uyeyona nto ingcwele. 26 Uza kutyiwa ngumbingeleli owunikelayo ngenxa yesono.+ Uza kutyelwa endaweni engcwele eyadini yentente yokuhlangana.+

27 “‘Yonke into echukumisa inyama yawo iza kuba ngcwele, yaye xa nabani na etshiza izambatho ngegazi lawo, umele uyihlambele endaweni engcwele loo nto itshizwe ngegazi. 28 Isitya sodongwe obubiliswe ngaso umnikelo masaphulwe. Kodwa ukuba ubiliswe ngesitya sekopolo, simele sikhuculwe size sihlanjwe ngamanzi.

29 “‘Wonke umntu oyindoda phakathi kwababingeleli uza kuwutya.+ Uyeyona nto ingcwele.+ 30 Kodwa mawungatyiwa umnikelo wesono ukuba inxalenye yawo yegazi iye yaziswa ententeni yokuhlangana ukuze kuhlawulelwe endaweni engcwele.+ Ufanele utshiswe ngomlilo.

7 “‘Nanku ke umthetho womnikelo wetyala:+ Uyeyona nto ingcwele. 2 Umnikelo wetyala baza kuwuxhelela kwindawo abayixhelela kuyo iminikelo etshiswayo, ibe igazi lawo+ limele lifefwe macala onke esibingelelo.+ 3 Uza kuzisa onke amanqatha awo,+ kunye nomsila otyebileyo, umhlehlo ogqume amathumbu, 4 izintso zombini nenqatha lazo elingasesinqeni. Uza kuwususa nomhlehlo wesibindi kunye nezintso.+ 5 Umbingeleli uza kuqhumisa ngazo zonke ezo zinto esibingelelweni zibe ngumnikelo oya kuYehova otshiswa ngomlilo.+ Lowo ke ngumnikelo wetyala. 6 Wonke umntu oyindoda phakathi kwababingeleli uza kuwutya,+ ibe umele utyelwe endaweni engcwele. Uyeyona nto ingcwele.+ 7 Umthetho womnikelo wesono uyafana nowomnikelo wetyala. Lo mnikelo ngowombingeleli ohlawula ngawo.+

8 “‘Xa umbingeleli esizisa umnikelo otshiswayo wakhe nawuphi na umntu, isikhumba+ saloo mnikelo utshiswayo siza kuba sesaloo mbingeleli.

9 “‘Wonke umnikelo wokutya obhakwe eontini nowenzelwe embizeni okanye epanini,+ ngowaloo mbingeleli uwuzisileyo. Uza kuba ngowakhe.+ 10 Kodwa wonke umnikelo wokutya owomileyo+ okanye ogalelwe ioli+ uza kuba ngowoonyana bonke baka-Aron. Bonke baza kufumana ngokulinganayo.

11 “‘Nanku ke umthetho wombingelelo wobuhlobo+ onokuziswa ngumntu kuYehova: 12 Ukuba uzisa umbingelelo wombulelo,+ uza kuzisa namaqebengwana arawundi angenagwele agalelwe ioli, izonka ezisicaba ezingenagwele eziqatywe amafutha, namaqebengwana arawundi enziwe ngomgubo ocoliweyo oxovwe kakuhle waza wagalelwa ioli. 13 Uza kuzisa umnikelo wakhe kunye namaqebengwana arawundi esonka esinegwele nombingelelo wombulelo ongowemibingelelo yakhe yobuhlobo. 14 Umele athathe inxalenye enye kumnikelo ngamnye ibe ngumnikelo ongcwele oya kuYehova. Uza kuba ngowombingeleli ofefa igazi lemibingelelo yobuhlobo.+ 15 Inyama yombingelelo wombulelo ongowemibingelelo yobuhlobo iza kutyiwa ngaloo mini ayinikela ngayo. Umele angashiyi nto kuyo kude kuse.+

16 “‘Ukuba ke umbingelelo womnikelo wakhe ngowesifungo+ okanye ngumnikelo wokuzithandela,+ umele utyiwe ngomhla awuzisa ngawo umbingelelo wakhe, ibe okushiyekileyo kuwo kunokutyiwa ngosuku olulandelayo. 17 Kodwa nantoni na eshiyekileyo kwinyama yombingelelo ngomhla wesithathu mayitshiswe ngomlilo.+ 18 Kodwa ukuba kuye kwatyiwa nentwana le yenyama yombingelelo wakhe wobuhlobo ngomhla wesithathu, lowo uwuzisayo akazukwamkeleka. Awuzukubalelwa kuye, uyinto engcolileyo, yaye umntu otyayo kuwo uza kuphendula ngesono sakhe.+ 19 Inyama eye yadibana nayo nantoni na engacocekanga mayingatyiwa. Imele itshiswe ngomlilo. Wonke umntu ococekileyo angayitya inyama ecocekileyo.

20 “‘Nabani na ongacocekanga otya inyama yombingelelo wobuhlobo kaYehova, umele abulawe.+ 21 Ukuba umntu uchukumisa nantoni na engacocekanga, nokuba kukungacoceki komntu+ okanye isilwanyana esingacocekanga+ okanye nayiphi na into engacocekanga neyenyanyekayo,+ aze atye inyama yombingelelo wobuhlobo kaYehova, umele abulawe.’”

22 Waqhubeka uYehova wathi kuMoses: 23 “Yithi kumaSirayeli, ‘Ningatyi nawaphi na amanqatha+ enkunzi yenkomo, etakane legusha eliyinkunzi okanye awebhokhwe. 24 Amanqatha esilwanyana esifunyenwe sifile namanqatha esilwa­nyana esibulewe sesinye ningawasebenzisa nakweyiphi na enye into, kodwa ningaze niwatye.+ 25 Kuba nabani na otya amanqatha esilwanyana asizise saba ngumnikelo kuYehova otshiswa ngomlilo, umele abulawe.

26 “‘Ningatyi naliphi na igazi+ nakweyiphi na indawo enihlala kuyo, nokuba leleentaka okanye lelezilwanyana. 27 Nabani na otya naliphi na igazi+ umele abulawe.’”

28 Waphinda wathi uYehova kuMoses: 29 “Yithi kumaSirayeli, ‘Nabani na ozisa umbingelelo wakhe wobuhlobo kuYehova uza kuzisa inxalenye yombingelelo wakhe ube ngumnikelo oya kuYehova.+ 30 Uza kuzisa ngezandla zakhe amanqatha+ kunye nesifuba zibe ngumnikelo kuYehova otshiswa ngomlilo, yaye uza kuwutshangatshangisa ube ngumnikelo otshangatshangiswayo+ phambi koYehova. 31 Umbingeleli umele aqhumise ngaloo manqatha esibingelelweni,+ kodwa isifuba sona siza kuba sesika-Aron noonyana bakhe.+

32 “‘Umlenze wasekunene wemibingelelo yenu yobuhlobo niza kuwunika umbingeleli, ube ngumnikelo wakhe ongcwele.+ 33 Unyana ka-Aron ozisa igazi lemibingelelo yobuhlobo nenqatha uza kunikwa umlenze wasekunene.+ 34 Kaloku ndisithathile isifuba somnikelo otshangatshangiswayo nomlenze womnikelo ongcwele kwimibingelelo yobuhlobo yamaSirayeli, ndazinika uAron umbingeleli noonyana bakhe, yaye lo uza kuba ngumthetho oza kuhlala uhleli kumaSirayeli.+

35 “‘Le yinxalenye eyabekelwa ababingeleli, uAron noonyana bakhe, kwiminikelo kaYehova etshiswa ngomlilo, ngomhla awabazisa ngawo ukuba babe ngababingeleli bakaYehova.+ 36 Ngomhla awabathambisa ngawo, uYehova wayalela ukuba amaSirayeli abanike le nxalenye.+ Ngumthetho oza kuhlala uhleli kwizizukulwana zabo.’”

37 Nguwo lowo umthetho womnikelo otshiswayo,+ owomnikelo wokutya,+ owomnikelo wesono,+ owomnikelo wetyala,+ owombingelelo wokumiselwa+ nowombingelelo wobuhlobo,+ 38 kanye njengokuba uYehova wamyalelayo uMoses eNtabeni YaseSinayi+ mhla wayalela amaSirayeli ukuba azise iminikelo yawo kuYehova entlango yaseSinayi.+

8 UYehova waphinda wathi kuMoses: 2 “Thatha uAron noonyana bakhe,+ uthathe izambatho,+ ioli yokuthambisa,+ inkunzi yenkomo yomnikelo wesono, iinkunzi zeegusha ezimbini nengobozi yesonka esingenagwele,+ 3 uze ubizele bonke abantu kumnyango wentente yokuhlangana.”

4 UMoses wenza kanye njengokuba uYehova wayemyalele, abantu baya kumnyango wentente yokuhlangana. 5 Wathi uMoses ebantwini: “Nantsi ke into uYehova asiyalele ukuba siyenze.” 6 Ngoko uMoses wasondeza uAron noonyana bakhe waza wabahlamba ngamanzi.+ 7 Emva koko wanxibisa uAron umwunduzo,+ wambhinqisa umbhinqo,+ wamnxibisa isambatho esingenamikhono,+ wamnxibisa iefodi+ waza wayibopha ngebhanti elihonjisiweyo+ le-efodi, wayibopha nkqi ngalo. 8 Emva koko wamfaka isingxobo*+ waza wafaka iUrim neTumim+ kuso. 9 Wamthwalisa entloko iqhiya yamadoda+ waza wabeka ipleyiti ekhazimlayo yegolide ngaphambili kuloo qhiya, eluphawu olungcwele lokuzinikela,*+ kanye njengokuba uYehova wamyalelayo uMoses.

10 Emva koko uMoses wathatha ioli yokuthambisa, wathambisa intente engcwele kunye nezinto zonke ezikuyo,+ wazenza ngcwele. 11 Kwangayo watshiza isibingelelo kasixhenxe waza wathambisa isibingelelo nempahla yaso yonke nesitya nesiphatho saso ukuze azenze ngcwele. 12 Ekugqibeleni wagalela enye yayo entlokweni ka-Aron, wamthambisa ukuze abe ngcwele.+

13 Emva koko uMoses wasondeza oonyana baka-Aron, wabanxibisa imiwunduzo, wababhinqisa umbhinqo, wabathwalisa isigqubuthelo* entloko,+ kanye njengokuba uYehova wamyalelayo uMoses.

14 Emva koko wazisa inkunzi yenkomo yomnikelo wesono, waza uAron noonyana bakhe babeka izandla zabo phezu kwentloko yaloo nkunzi yenkomo yomnikelo wesono.+ 15 UMoses wayixhela, wathi nkxu umnwe wakhe egazini+ waza wathambisa iimpondo zesibingelelo ngalo, wasicoca isibingelelo esonweni, kodwa igazi elishiyekileyo waligalela esisekweni sesibingelelo, ukuze asenze ngcwele aze ahlawulele isono kuso. 16 Akugqiba wathatha onke amanqatha asemathunjini, umhlehlo wesibindi, izintso zombini namanqatha azo, waqhumisa ngazo esibingelelweni.+ 17 Yonke into eshiyekileyo kwinkunzi yenkomo, isikhumba sayo, inyama yayo nomswane wayo wazitshisa ngomlilo ngaphandle kwenkampu,+ kanye njengokuba uYehova wamyalelayo uMoses.

18 Wasondeza inkunzi yegusha yomnikelo otshiswayo, waza uAron noonyana bakhe babeka izandla zabo phezu kwentloko yaloo nkunzi yegusha.+ 19 Emva koko uMoses wayixhela waza wafefa igazi layo macala onke esibingelelo. 20 Wayinqunqa waza waqhumisa ngentloko, amalungu namanqatha* ayo. 21 Wahlamba amathumbu namanqina ngamanzi, waqhumisa ngayo yonke inkunzi yegusha esibingelelweni. Yaba ngumnikelo otshiswayo onevumba elimnandi. Yaba ngumnikelo otshiswa ngomlilo oya kuYehova, kanye njengokuba uYehova wamyalelayo uMoses.

22 Emva koko wasondeza inkunzi yegusha yesibini, inkunzi yegusha yokumisela,+ waza uAron noonyana bakhe babeka izandla zabo phezu kwentloko yaloo nkunzi yegusha.+ 23 UMoses wayixhela waza elinye igazi layo waliqaba endlebeni yasekunene ka-Aron nakubhontsi wesandla sakhe sasekunene nakubhontsi wonyawo lwakhe lwasekunene. 24 Ukugqiba kwakhe wasondeza oonyana baka-Aron, waza wabaqaba ngelinye igazi ezindlebeni zasekunene nakoobhontsi bezandla zasekunene nakoobhontsi beenyawo zasekunene, kodwa igazi elishiyekileyo walifefa macala onke esibingelelo.+

25 Emva koko wathatha amanqatha, umsila otyebileyo, amanqatha onke asemathunjini, umhlehlo wesibindi, izintso zombini namanqatha azo nomlenze wasekunene.+ 26 Wathatha iqebengwana elirawundi elingenagwele lalinye kwibhaskithi yamaqebengwana angenagwele eyayiphambi koYehova,+ iqebengwana elirawundi lesonka esineoli lalinye+ nesonka esisicaba sasinye. Wazibeka phezu kwamanqatha nomlenze wasekunene. 27 Akugqiba wabeka zonke ezo zinto ezandleni zika-Aron nasezandleni zoonyana bakhe waza wazitshangatshangisa zaba ngumnikelo otshangatshangiswayo phambi koYehova. 28 Wazithatha uMoses ezandleni zabo, waqhumisa ngazo esibingelelweni phezu komnikelo otshiswayo. Zaba ngumbingelelo wokumisela wevumba elimnandi. Lowo yaba ngumnikelo otshiswa ngomlilo oya kuYehova.

29 Emva koko uMoses wathatha isifuba sale nkunzi yegusha yokumisela wasitshangatshangisa saba ngumnikelo otshangatshangiswayo phambi koYehova.+ Saba sisahlulo sikaMoses, kanye njengokuba uYehova wamyalelayo.+

30 Emva koko uMoses wathatha intwana yeoli yokuthambisa+ nentwana yegazi elalisesibingelelweni, watshiza ngazo uAron nezambatho zakhe noonyana bakhe nezambatho zoonyana bakhe ababekunye naye. Ngaloo ndlela wamngcwalisa uAron nezambatho zakhe noonyana bakhe+ nezambatho zabo.+

31 Wathi uMoses kuAron noonyana bakhe: “Yibiliseni+ inyama ngakumnyango wentente yokuhlangana, nize niyityele apho nesonka esisengobozini, kanye njengokuba ndayalelwayo kwathiwa, ‘UAron noonyana bakhe baza kuyitya.’+ 32 Inyama eshiyekileyo nesonka esishiyekileyo niza kuzitshisa ngomlilo.+ 33 Ningaphumi emnyango wentente yokuhlangana iintsuku ezisixhenxe, de ziphele iintsuku zokumiselwa kwenu, kuba ukumiselwa kwenu nibe ngababingeleli kuza kuthatha iintsuku ezisixhenxe.+ 34 UYehova uyalele ukuba senze ngale ndlela senze ngayo namhlanje ukuze zihlawulelwe izono zenu.+ 35 Niza kuhlala kumnyango wentente yokuhlangana imini nobusuku iintsuku ezisixhenxe,+ niyenze imisebenzi eniyinikwe nguYehova,+ ukuze ningafi, kuba ndiyalelwe ngaloo ndlela.”

36 UAron noonyana bakhe bazenza zonke izinto ezaziyalelwe nguYehova ngoMoses.

9 Ngomhla wesibhozo+ uMoses wabiza uAron, oonyana bakhe namadoda amakhulu akwaSirayeli. 2 Wathi kuAron: “Thatha ithole lenkomo eliza kuba ngumnikelo wesono+ nenkunzi yegusha yomnikelo otshiswayo, zibe zeziphilileyo, uzizise phambi koYehova. 3 Kodwa kumaSirayeli uza kuthi, ‘Thathani inkunzi yebhokhwe yomnikelo wesono, ithole lenkomo, itakane legusha eliyinkunzi, ezinonyaka ubudala, eziphilileyo, nenze ngazo umnikelo otshiswayo, 4 inkunzi yenkomo nenkunzi yegusha, zibe ngumbingelelo wobuhlobo,+ kubingelelwe ngazo kuYehova, nomnikelo oziinkozo+ ogalelwe ioli, kuba namhlanje uYehova uza kubonakala kuni.’”+

5 Ngoko ke, bazithatha izinto uMoses awayeziyalele, bazizisa phambi kwentente yokuhlangana. Basondela bonke abantu, bema phambi koYehova. 6 UMoses wathi: “Nantsi into uYehova ayalele ukuba niyenze, ukuze nilubone uzuko lukaYehova.”+ 7 Emva koko wathi kuAron: “Sondela esibingelelweni uzise umnikelo wakho wesono+ nomnikelo wakho otshiswayo, uzihlawulele wena+ nendlu yakho, uzise umnikelo wabantu+ ubahlawulele,+ kanye njengokuba uYehova eyalele.”

8 Ngoko nangoko uAron wasondela esibingelelweni waza waxhela ithole lenkomo lomnikelo wakhe wesono.+ 9 Emva koko, oonyana baka-Aron bazisa igazi+ kuye, wathi nkxu umnwe kulo, waliqaba ezimpondweni zesibingelelo, waza elishiyekileyo waligalela esisekweni sesibingelelo.+ 10 Waqhumisa esibingelelweni ngamanqatha, izintso nomhlehlo wesibindi, ezingumnikelo wesono, kanye njengokuba uYehova wamyalelayo uMoses.+ 11 Yona inyama nofele wazitshisa ngomlilo ngaphandle kwenkampu.+

12 Emva koko, waxhela umnikelo otshiswayo, baza oonyana bakhe balizisa kuye igazi, wafefa ngalo macala onke esibingelelo.+ 13 Bamnika amalungu omnikelo otshiswayo nentloko, waqhumisa ngazo ezo zinto esibingelelweni. 14 Kwakhona wahlamba amathumbu namanqina, waqhumisa ngawo phezu komnikelo otshiswayo esibingelelweni.

15 Akugqiba wazisa umnikelo wabantu waza wathatha ibhokhwe yomnikelo wesono wayixhela ukuze enze umnikelo wesono ngayo, njengakumnikelo wokuqala. 16 Wazisa nomnikelo otshiswayo waza wawenza ngendlela ekuqhele ukwenziwa ngayo.+

17 Walandelisa ngokuzisa umnikelo wokutya,+ wagcwalisa isandla ngawo waza waqhumisa ngawo esibingelelweni, ukongeza kumnikelo otshiswayo wakusasa.+

18 Emva koko, waxhela inkunzi yenkomo nenkunzi yegusha yombingelelo wobuhlobo wabantu. Oonyana baka-Aron bamnika igazi, wafefa ngalo macala onke esibingelelo.+ 19 Kodwa amanqatha enkunzi yenkomo+ nomsila otyebileyo wenkunzi yegusha, umhlehlo, izintso nomhlehlo wesibindi,+ 20 bazibeka phezu kwesifuba senkomo nesegusha, waza yena waqhumisa ngazo esibingelelweni.+ 21 Izifuba nomlenze wasekunene uAron wazitshangatshangisa zaba ngumnikelo otshangatshangiswayo phambi koYehova, kanye njengokuba uMoses wayemyalele.+

22 Emva kokwenza umnikelo wesono nomnikelo otshiswayo nemibingelelo yobuhlobo, uAron waziphakamisela ngasebantwini izandla zakhe wabasikelela+ waza wehla esibingelelweni. 23 Ekugqibeleni uMoses noAron bangena ententeni yokuhlangana baza baphuma babasikelela abantu.+

Lwabonakala uzuko lukaYehova kubo bonke abantu,+ 24 kwaza kwaphuma umlilo uvela kuYehova,+ watshisa umnikelo otshiswayo namanqatha asesibingelelweni. Bathi bakuyibona loo nto abantu, bakhwaza bonke baza baqubuda.+

10 Ekuhambeni kwexesha, oonyana baka-Aron uNadabhi noAbhihu+ bathatha izitya zabo zomlilo, babeka amalahle avuthayo kuzo baza babeka isiqhumiso esiqholiweyo+ kuzo. Emva koko bazisa umlilo ongekho mthethweni kuYehova,+ into awayengabayalelanga ukuba bayenze. 2 Kwaphuma umlilo uvela kuYehova, wabatshisa+ bafa phambi koYehova.+ 3 Wathi uMoses kuAron: “Uthi uYehova, ‘Ndiza kungcwaliswa ngabo basondeleyo kum,+ yaye ndiza kuzukiswa phambi kwabantu bonke.’” Wathi cwaka uAron.

4 UMoses wabiza uMishayeli noElitsafan, oonyana bakaUziyeli,+ utatomncinci ka-Aron, wathi kubo: “Yizani apha, nisuse abantakwenu phambi kwendawo engcwele, nibase ngaphandle kwenkampu.” 5 Basondela ke baza babathwalela ngaphandle kwenkampu besenemiwunduzo yabo, kanye njengokuba wayetshilo uMoses.

6 UMoses wathi kuAron nakwabanye oonyana bakhe uEleyazare noItamare: “Ningaziyeki zingalungiswanga iintloko zenu, ningazikrazuli izambatho zenu,+ ukuze ningafi, nokuze umsindo kaThixo ungafikeli bonke abantu. Abazalwana benu bayo yonke indlu kaSirayeli baza kubalilela abo batshiswe nguYehova ngomlilo. 7 Ningaphumi emnyango wentente yokuhlangana okanye niza kufa, kuba ioli yokuthambisa kaYehova iphezu kwenu.”+ Benza ke yonke into awayebaxelele yona uMoses.

8 UYehova wathi kuAron: 9 “Xa nisiza kwintente yokuhlangana, wena noonyana bakho abakunye nawe, musani ukusela wayini okanye esinye isiselo esinxilisayo,+ ukuze ningafi. Ngumthetho oza kuhlala uhleli lowo kwizizukulwana zenu. 10 Oku kwenzelwa ukuze nahlule into engcwele kwengcolileyo nento engacocekanga kwecocekileyo,+ 11 nokuze nifundise oonyana bakaSirayeli yonke imithetho abayinikwe nguYehova ngoMoses.”+

12 Emva koko uMoses wathi kuAron nakoonyana bakhe abaseleyo, uEleyazare noItamare: “Thathani umnikelo wokutya okuziinkozo oseleyo kumnikelo kaYehova otshiswa ngomlilo, niwutye ungenagwele kufuphi nesibingelelo,+ kuba uyeyona nto ingcwele.+ 13 Nize niwutyele endaweni engcwele,+ kuba sisibonelelo sakho noonyana bakho kumnikelo kaYehova otshiswa ngomlilo, kuba ndiyalelwe ngaloo ndlela. 14 Niza kutya nesifuba somnikelo otshangatshangiswayo nomlenze womnikelo ongcwele,+ nizityele endaweni ecocekileyo, wena noonyana bakho neentombi zakho ezikunye nawe,+ kuba zisisibonelelo sakho noonyana bakho emibingelelweni yobuhlobo yamaSirayeli. 15 Baza kuzisa umlenze womnikelo ongcwele nesifuba somnikelo otshangatshangiswayo kunye neminikelo yamanqatha etshiswa ngomlilo, ukuze zitshangatshangiswe zibe ngumnikelo otshangatshangiswayo phambi koYehova, yaye ziza kuba sisibonelelo sakho noonyana bakho abakunye nawe esiza kuhlala sihleli,+ kanye njengokuba eyalele uYehova.”

16 UMoses wayikhangelisisa kakuhle ibhokhwe yomnikelo wesono,+ wafumanisa ukuba itshisiwe. Ngoko yamcaphukisa into eyenziwe nguEleyazare noItamare, oonyana baka-Aron abaseleyo, wathi: 17 “Kutheni ningawutyanga umnikelo wesono endaweni engcwele,+ ekubeni uyeyona nto ingcwele aninike yona ukuze niphendule ngesiphoso sabantu nokuze zihlawulelwe izono zabo phambi koYehova? 18 Jongani! Alingeniswanga igazi lawo kwindawo engcwele.+ Benifanele nakanjani niwutye endaweni engcwele, kanye njengokuba ndandiyalelwe.” 19 UAron waphendula wathi: “Jonga! Namhlanje bazise umnikelo wabo wesono nomnikelo wabo otshiswayo phambi koYehova,+ kodwa ndehlelwe zezi zinto. Ukuba bendiwutyile umnikelo wesono namhlanje, ngaba ebeza kuyithanda loo nto uYehova?” 20 Wathi akuyiva loo nto uMoses, waxola.

11 UYehova waphinda wathi kuMoses noAron: 2 “Yithini kumaSirayeli, ‘Nazi izilwanyana eziphilayo zasemhlabeni eninokuzitya:+ 3 Ningazitya zonke izilwanyana ezineempuphu ezicandeke ngokupheleleyo nezetyisayo.

4 “‘Nazi eningamele ­nizitye kwezetyisayo nezicandwe ii­mpuphu: inkamela, kuba iyetyisa kodwa azicandwanga ngokupheleleyo iimpuphu zayo. Ayicocekanga kuni.+ 5 Imbila,+ kuba iyetyisa kodwa azicandwanga ngokupheleleyo iimpuphu zayo. Ayicocekanga kuni. 6 Umvundla, kuba uyetyisa kodwa azicandwanga ngokupheleleyo iimpuphu zawo. Awucocekanga kuni. 7 Ihagu,+ kuba zicandwe ngokupheleleyo iimpuphu zayo kodwa ayetyisi. Ayicocekanga kuni. 8 Nize ningayityi tu inyama yazo, ningachukumisi nesidumbu sazo. Azicocekanga kuni.+

9 “‘Nazi izinto eziphila emanzini eninokuzitya: Nantoni na enamaphiko namaxolo, enoba iselwandle okanye isemlanjeni, ningayitya.+ 10 Kodwa nantoni na eselwandle nasemlanjeni engenamaphiko namaxolo, kwizinto ezinyakazelayo nazo zonke izinto eziphila emanzini, nimele nizenyanye. 11 Nimele nizenyanye, ningayityi tu inyama yazo,+ nenyanye nezidumbu zazo. 12 Zonke izinto ezingenamaphiko namaxolo eziphila emanzini ziyenyanyeka kuni.

13 “‘Nazi izilwanyana ezibhabhayo enimele nizenyanye. Nimele ningazityi kuba ziyenyanyeka: ukhozi,+ ukhozi olutya iintlanzi, ixhalanga elimnyama,+ 14 ukhetshe obomvu nabo bonke ookhetshe abamnyama, 15 lonke uhlobo lwamahlungulu, 16 inciniba, isikhova, ingabangaba, lonke uhlobo lookhetshe, 17 isikhova esincinci, ugwidi,* isikhova esineendlebe ezinde, 18 idada, ingcwangube, ixhalanga, 19 ingwamza, lonke uhlobo lookhwalimanzi, ubhobhoyi nelulwane. 20 Nimele nizenyanye zonke izinambuzane ezinamaphiko nemilenze emine.

21 “‘Kwizinambuzane ezinamaphiko nemilenze emine, nimele nitye kuphela ezinemilenze yokuxhuma entla kweenyawo. 22 Nazi ke eninokuzitya: lonke uhlobo lweenkumbi ezifudukayo, zonke iinkumbi ezityiwayo,+ iinyenzane neentethe. 23 Zonke izinambuzane ezinamaphiko nemilenze emine ziyenyanyeka kuni. 24 Ziza kunenza ningacoceki. Nabani na ochukumisa izidumbu zazo akazukucoceka kude kuhlwe.+ 25 Nabani na othwala izidumbu zazo umele azihlambe iimpahla zakhe.+ Uza kuba ngongacocekanga kude kuhlwe.

26 “‘Nasiphi na isilwanyana esineempuphu ezingacandekanga ngokupheleleyo nesingetyisiyo, asicocekanga kuni. Wonke umntu ozichukumisayo uza kuba ngongacocekanga.+ 27 Nasiphi na isilwanyana esihamba ngeentupha kwizilwanyana ezinemilenze emine, asicocekanga kuni. Wonke umntu ochukumisa izidumbu zazo akazukucoceka kude kuhlwe. 28 Othwala izidumbu zazo umele azihlambe izambatho zakhe,+ yaye uza kuba ngongacocekanga kude kuhlwe.+ Azicocekanga kuni.

29 “‘Nazi ke izilwanyana ezincinci ezingacocekanga kuni: intuku, impuku,+ lonke uhlobo lwamacikilishe, 30 untulo, icikilishe elikhulu, uqebeyi, icikilishe lasesantini nolovane. 31 Zonke ezo azicocekanga kuni.+ Wonke umntu ochukumisa izidumbu zazo akazukucoceka kude kuhlwe.+

32 “‘Nantoni na ewelwa sisidumbu sezi zinto ayizukucoceka, nokuba sisitya esenziwe ngomthi, sisambatho, lufele okanye lilaphu lokwenza ingxowa. Nasiphi na isixhobo esisetyenziswayo simele sifakwe emanzini, sibe sesingacocekanga kude kuhlwe, size ke sicoceke. 33 Ukuba ezo zilwanyana ziwele kwisitya sodongwe, nimele nisikroboze eso sitya, yaye nantoni na ebingaphakathi kuso iza kuba yengacocekanga.+ 34 Nakuphi na ukutya okuchatshazelwa ngamanzi akwezo zitya kuza kuba kokungacocekanga, yaye nasiphi na isiselo esikwezo zitya siza kuba sesingacocekanga. 35 Yonke into ewelwa zizidumbu zezi zilwanyana iza kuba yengacocekanga. Nokuba yionti okanye sisitovu, imele yaphulwe ibe ziingceba. Ayicocekanga, yaye iza kuhlala ingacocekanga kuni. 36 Kodwa ke, ukuba izidumbu zezo zilwanyana ziwela emthonjeni okanye equleni lamanzi, loo mthombo nelo qula ziza kuhlala zicocekile, kodwa nabani na ochukumisa isidumbu sezo zilwanyana uza kuba ngongacocekanga. 37 Ukuba eso sidumbu siwele kwimbewu yesityalo eseza kutyalwa, icocekile. 38 Kodwa ukuba inxalenye yesidumbu iwela kumanzi agalelwa kwimbewu, loo mbewu ayicocekanga kuni.

39 “‘Ukuba nasiphi na isilwanyana esityiwayo siyafa, nabani na ochukumisa isidumbu saso uza kuba ngongacocekanga kude kuhlwe.+ 40 Nabani na otya isidumbu seso silwanyana umele azihlambe iimpahla zakhe, abe ngongacocekanga kude kuhlwe.+ Nabani na othwele isidumbu saso, umele azihlambe iimpahla zakhe, aze abe ngongacocekanga kude kuhlwe. 41 Zonke izilwanyana ezinyakazelayo emhlabeni ziyenyanyeka.+ Mazingatyiwa. 42 Animele nitye nasiphi na isilwanyana esirhubuluzayo, esihamba ngemilenze emine, okanye esinyakazelayo esinemilenze emininzi, kuba ziyenyanyeka.+ 43 Ningazenzi nenyanyeke ngaso nasiphi na isilwanyana esinyakazelayo, ningazingcolisi nizenze abangacocekanga ngenxa yazo.+ 44 Kuba ndinguYehova uThixo wenu,+ yaye nimele nihlale ningcwele,+ kuba ndingcwele mna.+ Animele nizenze ningacoceki ngaso nasiphi na isidalwa esinyakazelayo emhlabeni. 45 Kuba ndinguYehova onikhuphe ezweni laseYiputa ukuze ndizingqine ndinguThixo wenu,+ yaye nimele nibe ngcwele,+ kuba ndingcwele.+

46 “‘Nguwo ke lowo umthetho ongezilwanyana, izilwanyana ezibhabhayo, zonke eziphila emanzini nazo zonke izilwanyana ezinyakazela emhlabeni, 47 ukuze kubekho umahluko phakathi kwento engacocekanga necocekileyo naphakathi kwezilwanyana ezityiwayo nezingatyiwayo.’”+

12 UYehova waphinda wathi kuMoses: 2 “Yithi kumaSirayeli, ‘Ukuba umfazi uye wamitha* waza wazala inkwenkwe, uza kuba ngongacocekanga iintsuku ezisixhenxe, kanye ngendlela aye angacoceki ngayo ngeentsuku zokuba sexesheni.+ 3 Ngosuku lwesibhozo loo nkwenkwe iza koluswa.+ 4 Umfazi uza kuqhubeka ezicoca iintsuku eziyi-33 ezilandelayo. Akafanele achukumise nantoni na engcwele, yaye akamele angene endaweni engcwele zide ziphele iintsuku zokuzicoca kwakhe.

5 “‘Ukuba uzele intombi, uza kuba ngongacocekanga iintsuku eziyi-14, kanye ngendlela aba yiyo xa esexesheni. Uza kuqhubeka ezicoca iintsuku eziyi-66 ezilandelayo. 6 Ekupheleni kweentsuku zokuzicoca kwakhe ngenxa yokuzala unyana okanye intombazana, uza kuzisa kumbingeleli emnyangweni wentente yokuhlangana itakane legusha eliyinkunzi elinonyaka omnye libe ngumnikelo otshiswayo.+ Uza kuzisa nentshontsho lehobe lasekhaya okanye ihobe lasendle libe ngumnikelo wesono. 7 Umbingeleli uza kuzisa iminikelo kuYehova ukuze amhlawulele lo mfazi aze ke acoceke kwithombo lakhe legazi. Lowo ngumthetho womfazi oye wazala inkwenkwe okanye intombazana. 8 Kodwa ukuba akakwazi ukunikela ngegusha, umele athathe amahobe amabini asendle okanye amantshontsho amabini amahobe afuywayo.+ Elinye loba lelomnikelo otshiswayo lize elinye libe lelomnikelo wesono, umbingeleli amhlawulele, aze ke acoceke.’”

13 UYehova waqhubeka wathi kuMoses noAron: 2 “Ukuba umntu uyadumba, uphuma ukhwekhwe okanye ibala emzimbeni, ekusenokwenzeka ukuba sisifo seqhenqa,*+ loo mntu umele aziswe kuAron umbingeleli okanye komnye woonyana bakhe abakwangababingeleli.+ 3 Umbingeleli uza kusihlolisisa eso sifo sisemzimbeni wakhe. Ukuba unwele olukwindawo enesifo luye lwajika lwaba mhlophe, ibe nesifo sibonakala sigqithele ngapha kolusu lwakhe, sisifo seqhenqa eso. Umbingeleli wosihlolisisa, aze athi loo mntu akacocekanga. 4 Kodwa ukuba ibala liye lamhlophe emzimbeni wakhe, ibe libonakala lingagqithanga ngapha kolusu, nonwele lungajikanga lwaba mhlophe, umbingeleli womhlalisa yedwa loo mntu unesifo iintsuku ezisixhenxe.+ 5 Ngosuku lwesixhenxe uza kumhlolisisa. Ukuba kubonakala ngathi eso sifo siphelile yaye khange sinwenwe emzimbeni waloo mntu, umbingeleli uza kuphinda amhlalise yedwa ezinye iintsuku ezisixhenxe.

6 “Umbingeleli ufanele aphinde amhlole loo mntu ngosuku lwesixhenxe, yaye ukuba isifo siyaphela yaye asinwenwanga, uza kuthi loo mntu ucocekile.+ Ibilukhwekhwe nje olo. Loo mntu uza kuzihlamba iimpahla zakhe aze acoceke. 7 Kodwa ukuba ukhwekhwe* luye lwanwenwa emzimbeni emva kokuvela phambi kombingeleli ukuze kubonwe enoba ucocekile na, uza kuza kwakhona* kumbingeleli. 8 Umbingeleli uza kuluhlolisisa ukhwekhwe. Ukuba luye lwanwenwa emzimbeni, uza kuthi loo mntu akacocekanga. Liqhenqa elo.+

9 “Ukuba umntu uba nesifo seqhenqa, umele asiwe kumbingeleli, 10 aze umbingeleli amhlolisise.+ Ukuba udumbile, nolusu lumhlophe yaye kukho unwele olujike lwaba mhlophe, kube kukho nesilonda,+ 11 uneqhenqa elinganyangekiyo. Umbingeleli uza kuthi loo mntu akacocekanga. Ufanele angamhlalisi yedwa+ kuba akacocekanga. 12 Ukuba iqhenqa liphume kulo lonke ulusu lwaloo mntu, kwaye likuwo wonke umzimba, ukuqala entloko ukuya kutsho elunyaweni, ngokokubona kombingeleli, 13 waza umbingeleli wabona ukuba linwenwele kulo lonke ulusu lwakhe, uza kuthi loo mntu obenesifo ucocekile.* Usuke nje waba mhlophe wonke yaye ucocekile. 14 Kodwa nanini na kuvela isilonda kulusu, uza kuba ngongacocekanga. 15 Xa umbingeleli ebona isilonda enyameni yaloo mntu, uza kuthi akacocekanga.+ Eso silonda asicocekanga. Liqhenqa elo.+ 16 Kodwa ukuba isilonda siphinda sibe mhlophe, uza kuya kumbingeleli. 17 Umbingeleli uza kumhlolisisa loo mntu,+ yaye ukuba isilonda siye sajika saba mhlophe, umbingeleli uza kuthi ucocekile.

18 “Ukuba umntu uphuma ithumba emzimbeni wakhe lize liphole, 19 kodwa kuloo ndawo ibinethumba kwabakho ukhwekhwe olumhlophe bubomvu, umele aye kumbingeleli. 20 Umbingeleli uza kulihlolisisa,+ yaye ukuba lugqithele ngapha kolusu, lwaza nonwele olukuloo ndawo lwajika lwamhlophe, uza kuthi loo mntu akacocekanga. Sisifo seqhenqa eso esiye saphuma kwithumba. 21 Kodwa ukuba umbingeleli uthe ekuhlolisiseni kwakhe, akabona lunwele lumhlophe kuloo ndawo inokhwekhwe, yaye alugqithelanga ngapha kolusu kwaye lubonakala luphela, uza kumhlalisa yedwa loo mntu iintsuku ezisixhenxe.+ 22 Kodwa ukuba luye lwanwenwa kakhulu emzimbeni, umbingeleli uza kuthi loo mntu akacocekanga. Sisifo eso. 23 Kodwa ukuba ibala likwindawo enye ibe alinwenwi, yimbulaphu yethumba leyo. Umbingeleli uza kuthi ucocekile.+

24 “Okanye ukuba emzimbeni unesilonda esingekapholi esibangelwe kukutsha, yaye siba nebala elimhlophe bubomvu okanye elimhlophe, 25 umbingeleli uza kulihlolisisa elo bala. Ukuba unwele olulapho lutshintshe lwamhlophe, kwaye ibala libonakala ligqithele ngapha kolusu, liqhenqa elo. Livele kwisilonda. Umbingeleli uza kuthi loo mntu akacocekanga. Sisifo seqhenqa eso. 26 Kodwa ukuba umbingeleli ekuhlolisiseni kwakhe akabonanga lunwele lumhlophe kwibala elo yaye aligqithelanga ngapha kolusu kwaye liyaphola, uza kumhlalisa yedwa loo mntu iintsuku ezisixhenxe.+ 27 Umbingeleli uza kumhlolisisa ngosuku lwesixhenxe, yaye ukuba kuye kwacaca ukuba ibala linwenwile, uza kuthi akacocekanga. Sisifo seqhenqa eso. 28 Kodwa ukuba ibala likwindawo enye ibe alinwenwi futhi liyaphola, kukudumba nje kwesilonda oko. Umbingeleli uza kuthi ucocekile, kuba yimbulaphu yesilonda leyo.

29 “Xa endodeni okanye emfazini kuvela isifo entloko okanye esilevini, 30 umbingeleli uza kusihlolisisa eso sifo.+ Ukuba sibonakala sigqithele ngapha kolusu, yaye kukho neenwele eziyephuyephu ezityheli, umbingeleli uza kuthi loo mntu akacocekanga. Sisifo esisentlonzini eso okanye ezindevini. Liqhenqa lasentloko okanye lasesilevini. 31 Kodwa ukuba umbingeleli uthe xa ehlolisisa isifo entloko, wabona ukuba asigqithelanga ngapha kolusu yaye azikho mnyama iinwele kuso, ufanele amhlalise yedwa loo mntu unesifo iintsuku ezisixhenxe.+ 32 Umbingeleli uza kusihlolisisa eso sifo ngosuku lwesixhenxe. Ukuba isifo asinwenwanga, futhi akukho zinwele zityheli, yaye sibonakala singagqithelanga ngapha kolusu, 33 loo mntu ufanele azichebe iinwele okanye iindevu zakhe, kodwa angayichebi indawo enesifo. Emva koko umbingeleli uza kumhlalisa yedwa iintsuku ezisixhenxe.

34 “Umbingeleli uza kuphinda ayihlolisise indawo enesifo ngosuku lwesixhenxe. Ukuba isifo esisentlonzini nasezindevini asinwenwanga, yaye sibonakala singagqithelanga ngapha kolusu, umbingeleli uza kuthi loo mntu ucocekile. Loo mntu ufanele ayihlambe impahla yakhe aze acoceke. 35 Kodwa ukuba kuyabonakala ukuba isifo siyanwenwa eluswini emva kokucocwa, 36 umbingeleli uza kumhlolisisa. Ukuba isifo siye sanwenwa eluswini, akukho mfuneko ngombingeleli ukukhangela iinwele ezityheli. Loo mntu akacocekanga. 37 Kodwa ukuba uthe xa esihlolisisa wabona ukuba asinwenwanga yaye kukhule iinwele ezimnyama, isifo siphelile. Loo mntu ucocekile ibe umbingeleli uza kuthi ucocekile.+

38 “Ukuba kuvela amabala emzimbeni wendoda okanye owomfazi, yaye loo mabala amhlophe, 39 umbingeleli uza kuwahlolisisa.+ Ukuba loo mabala aya ephela aze abe mhlophe, ngamaqhakuva amancinci nje lawo angenabungozi. Loo mntu ucocekile.

40 “Ukuba indoda imkelwa ziinwele ize ibe nempandla, icocekile. 41 Ukuba imkelwa ziinwele ngaphambili entloko ize ibe nempandla, icocekile. 42 Kodwa ukuba kuvela isilonda esimhlophe-bubomvu ngaphambili empandleni yayo okanye ebunzi, liqhenqa elo. 43 Umbingeleli uza kuyihlolisisa loo ndoda. Ukuba eso silonda sidumbileyo singaphambili empandleni okanye ebunzi siba mhlophe-bubomvu yaye sibonakala ngathi liqhenqa elisentlonzini, 44 loo ndoda ineqhenqa. Ayicocekanga. Umbingeleli uza kuthi ayicocekanga ngenxa yesifo esisentloko. 45 Lowo unesifo seqhenqa, uza kunxiba iimpahla ezikrazuliweyo, ayiyeke idlaka-dlaka intloko yakhe. Uza kuzogquma emlonyeni* ngelaphu aze akhwaze athi, ‘Andicocekanga, andicocekanga!’ 46 Uza kuhlala engacocekanga ngalo lonke ixesha eneso sifo. Kuba engacocekanga, uza kuhlala yedwa. Uza kuhlala ngaphandle kwenkampu.+

47 “Ukuba isifo seqhenqa sosulela impahla, enoba yenziwe ngoboya okanye ngelinen, 48 enoba kusemisontweni yelinen okanye eyoboya, nokuba kusefeleni okanye kuyo nantoni na eyenziwe ngofele, 49 yaye ukuba impahla, ufele, imisonto okanye isiqwenga sofele ziba nebala eliluhlaza butyheli okanye elibomvu, yosulelwe liqhenqa, zimele ziboniswe umbingeleli. 50 Umbingeleli uza kusihlolisisa eso sifo, aze ayihlalise yodwa loo nto inesifo iintsuku ezisixhenxe.+ 51 Xa umbingeleli ehlola loo mpahla inesifo ngosuku lwesixhenxe yaye uyabona ukuba sinwenwile kuyo nakwimisonto okanye kufele (nokuba olo fele lusetyenziswa entwenini), liqhenqa eliqatseleyo elo yaye loo mpahla ayicocekanga.+ 52 Umbingeleli ufanele ayitshise loo mpahla okanye loo misonto yenziwe ngoboya okanye ngelinen okanye nasiphi na isiqwenga sofele esineso sifo, kuba sisifo seqhenqa eliqatseleyo. Ifanele itshiswe ngomlilo loo mpahla.

53 “Kodwa ukuba umbingeleli uthe xa ehlolisisa, wabona ukuba isifo asinwenwanga kuloo mpahla okanye kwimisonto okanye kwisiqwenga sofele, 54 uza kuyalela ukuba ihlanjwe loo nto inesifo aze ayihlalise yodwa ezinye iintsuku ezisixhenxe. 55 Umbingeleli uza kuphinda ayihlolisise emva kokuba ihlanjwe kakuhle. Ukuba kusabonakala ukuba ayitshintshanga inkangeleko yesifo, enoba asinwenwanga, loo mpahla ayicocekanga. Ufanele uyitshise ngomlilo kuba idlekile, enoba ngaphakathi okanye ngaphandle.

56 “Kodwa ukuba umbingeleli uye wayihlolisisa loo mpahla yaye indawo enesifo imbatshile emva kokuba ihlanjwe kakuhle, uza kuyikrazula ayisuse loo ndawo kuloo mpahla okanye kufele okanye kwimisonto. 57 Kodwa ukuba isifo sivela kwenye indawo kuloo mpahla okanye kuloo misonto okanye nakwisiphi na isiqwenga sofele, eso sifo siyanwenwa yaye ufanele uyitshise ngomlilo nayiphi na impahla enaso.+ 58 Kodwa ukuba isifo asisekho kuloo mpahla oye wayihlamba okanye kwimisonto okanye nakwesiphi na isiqwenga sofele, imele ihlanjwe okwesibini yaye iza kucoceka.

59 “Lo ngumthetho wesifo seqhenqa elisempahleni eyenziwe ngoboya okanye ngelinen, okanye eliba kwimisonto okanye efeleni, ochaza ukucoceka nokungacoceki.”

14 Waqhubeka uYehova esithi kuMoses: 2 “Nanku umthetho omele ulandelwe ngemini ayokubonwa ngawo ­enoba ucocekile na umntu oneqhenqa. Umele aziswe kumbingeleli.+ 3 Uza kuphuma umbingeleli aye ngaphandle kwenkampu aze amhlole. Ukuba loo mntu uphilile kwisifo seqhenqa, 4 umbingeleli uza kumyalela ukuba azise iintaka ezimbini eziphilayo nezicocekileyo, isihlahla somsedare, uboya obubomvu krwe nesihlahla sehisope ukuze acocwe.+ 5 Umbingeleli uza kuyalela ukuba enye intaka ixhelelwe esityeni sodongwe phezu kwamanzi amatsha. 6 Kodwa umbingeleli ufanele athathe intaka ehleliyo, isihlahla somsedare, uboya obubomvu krwe nesihlahla sehisope, aze azithi nkxu zonke egazini lentaka exhelelwe phezu kwamanzi amatsha. 7 Emva koko, uza kumtshiza ngelo gazi kasixhenxe loo mntu uzicocayo kwiqhenqa aze athi ucocekile, ayiyeke ke intaka ephilayo ihambe iye endle.+

8 “Loo mntu uzicocayo umele azihlambe iimpahla zakhe, achebe zonke iinwele zakhe, aze ahlambe umzimba emanzini, abe ucocekile ngolo hlobo. Emva koko, angangena enkampini kodwa uza kuhlala ngaphandle kwentente yakhe iintsuku ezisixhenxe. 9 Ngosuku lwesixhenxe, umele achebe zonke iinwele ezisentloko, ezisesilevini namashiya akhe. Emva kokuba ezichebe zonke iinwele, uza kuhlamba iimpahla zakhe, ahlambe nomzimba wakhe emanzini aze ke acoceke.

10 “Ngosuku lwesibhozo, uza kuthatha iinkunzi ezimbini zamatakane eegusha aphilileyo, ithokazi legusha eliphilileyo+ elinonyaka omnye nezishumi ezithathu ze-efa* yomgubo ocoliweyo, zibe ngumnikelo wokutya ogalelwe ioli+ neoli engaphezulu nje kwekota yelitha,*+ 11 aze umbingeleli othi loo mntu uzicocayo ucocekile, amzise kunye nezo zinto phambi koYehova emnyangweni wentente yokuhlangana. 12 Umbingeleli uza kuthatha itakane legusha eliyinkunzi, alizise libe ngumnikelo wetyala,+ kunye neoli engaphezulu nje kwekota yelitha* aze azitshangatshangise zibe ngumnikelo otshangatshangiswayo phambi koYehova.+ 13 Emva koko, uza kuxhelela itakane legusha kwindawo oqhele ukuxhelelwa kuyo umnikelo wesono nomnikelo otshiswayo,+ kwindawo engcwele, kuba njengomnikelo wesono, umnikelo wetyala ngowombingeleli.+ Uyeyona nto ingcwele.+

14 “Emva koko, umbingeleli uza kuthatha igazi kumnikelo wetyala, aliqabe kwindlebe yasekunene yaloo mntu uzicocayo, kubhontsi wesandla sakhe sasekunene nakubhontsi wonyawo lwakhe lwasekunene. 15 Akugqiba athathe enye kula oli ingaphezulu nje kwekota yelitha,*+ ayigalele esandleni sakhe sasekhohlo. 16 Uza kuwuthi nkxu umnwe wakhe wasekunene kwioli esesandleni sakhe sasekhohlo aze atshize kasixhenxe phambi koYehova. 17 Emva koko umbingeleli uza kuqaba inxalenye yeoli esele esandleni sakhe kwindlebe yasekunene yaloo mntu uzicocayo, kubhontsi wesandla sakhe sasekunene nakubhontsi wonyawo lwakhe lwasekunene phezu kwegazi lomnikelo wetyala. 18 Umbingeleli uza kuqaba ioli eshiyeke esandleni sakhe kwintloko yaloo mntu uzicocayo, aze amhlawulele kuYehova.+

19 “Umbingeleli uza kubingelela ngomnikelo wesono+ aze amhlawulele loo mntu uzicocayo ekungcoleni kwakhe, emva koko axhele umnikelo otshiswayo. 20 Uza kubingelela ngawo nomnikelo wokutya + esibingelelweni, yaye uza kumhlawulela loo mntu+ aze acoceke.+

21 “Kodwa ke, ukuba ulihlwempu yaye akanazinto zaneleyo, uza kuthatha itakane legusha eliyinkunzi, libe ngumnikelo wetyala otshangatshangiswayo wokumhlawulela, isishumi se-efa* yomgubo ocoliweyo ogalelwe amafutha sibe ngumnikelo wokutya, ioli engaphezulu nje kwekota yelitha,* 22 namahobe amabini asendle okanye amantshontsho amabini amahobe afuywayo, lawo akwaziyo ukuwafumana. Elinye liza kuba ngumnikelo wesono lize elinye libe ngumnikelo otshiswayo.+ 23 Ngosuku lwesibhozo,+ uza kuwazisa kumbingeleli kumnyango wentente yokuhlangana phambi koYehova, ukuze loo mntu acocwe.+

24 “Umbingeleli uza kuthatha itakane legusha eliyinkunzi yomnikelo wetyala+ neoli engaphezulu nje kwekota yelitha,* aze azitshangatshangise zibe ngumnikelo otshangatshangiswayo phambi koYehova.+ 25 Uza kuxhela itakane legusha eliyinkunzi yomnikelo wetyala, aze aqabe inxalenye yegazi lomnikelo wetyala kwindlebe yasekunene yaloo mntu uzicocayo, kubhontsi wesandla sakhe sasekunene nakubhontsi wonyawo lwakhe lwasekunene.+ 26 Uza kugalela inxalenye yeoli esandleni sakhe sasekhohlo,+ 27 aze ngomnwe wakhe wasekunene atshize kasixhenxe phambi koYehova. 28 Uza kuqaba inxalenye yeoli esesandleni sakhe kwindlebe yasekunene yaloo mntu uzicocayo, kubhontsi wesandla sakhe sasekunene nakubhontsi wonyawo lwakhe lwasekunene, kanye kweza ndawo ebeliqabe kuzo igazi lomnikelo wetyala. 29 Emva koko uza kuqaba ioli eshiyeke esandleni sakhe kwintloko yaloo mntu uzicocayo, ukuze amhlawulele phambi koYehova.

30 “Umbingeleli uza kubingelela elinye kumahobe asendle okanye kumantshontsho amahobe afuywayo, elo akwazileyo ukulifumana loo mntu uzicocayo,+ 31 libe ngumnikelo wesono lize elinye libe ngumnikelo otshiswayo+ kunye nomnikelo wokutya, yaye umbingeleli uza kumhlawulela loo mntu uzicocayo phambi koYehova.+

32 “Lowo ngumthetho omele ulandelwe ngumntu onesifo seqhenqa, ongenandlela yokuba nazo zonke izinto ezifunekayo ukuze acocwe.”

33 Emva koko wathi uYehova kuMoses noAron: 34 “Xa nifika kwilizwe lakwaKanan,+ endininika lona libe lilifa,+ ndize ndingcolise indlu ekwilizwe lenu ngesifo seqhenqa,+ 35 umnikazi waloo ndlu umele aye kumbingeleli, athi kuye, ‘Kukho into engathi kukungcola endlini yam.’ 36 Umbingeleli uza kuyalela ukuba kukhutshwe yonke into esendlini ngaphambi kokuba azokuhlola oko kungcola, ukuze angathi yonke into esendlini ayicocekanga. Emva koko uza kungena ayihlole loo ndlu. 37 Uza kuhlola loo ndawo ingcolileyo, yaye ukuba iindonga zaloo ndlu zinezibhaxu eziluhlaza-butyheli okanye bubomvurha, ibe zibonakala zingene nzulu eludongeni, 38 umbingeleli uza kuphuma kuloo ndlu aze ayivale iintsuku ezisixhenxe.+

39 “Uza kubuya ngosuku lwesixhenxe azokuyihlola. Ukuba ezo zibhaxu zinwenwile ezindongeni zayo, 40 umbingeleli uza kuyalela ukuba akhutshwe amatye anezibhaxu, aphoswe ngaphandle kwesixeko, kwindawo ekulahlwa kuyo izinto ezimdaka. 41 Emva koko, umele ayalele ukuba ixotyulwe yonke loo ndlu ngaphakathi, zize ezo zinto zixotyulweyo zilahlelwe ngaphandle kwesixeko, kwindawo ekulahlwa kuyo izinto ezimdaka. 42 Baza kufaka amanye amatye endaweni yalawo anezibhaxu ize loo ndlu ityatyekwe ngolunye udaka.

43 “Kodwa ke, ukuba izibhaxu ziphinde zavela emva kokuba ekhutshiwe amatye kwaza kwaxotyulwa nokutyatyekwa kwayo, 44 umbingeleli uza kungena ayihlole. Ukuba izibhaxu zinwenwile kuloo ndlu, liqhenqa elosulelayo elo.+ Loo ndlu ayicocekanga. 45 Uza kuyalela ukuba idilizwe loo ndlu, amatye ayo, amaplanga ayo, nazo zonke izinto ezixotyulwe kuyo zikhutshelwe ngaphandle kwesixeko, kwindawo ekulahlwa kuyo izinto ezimdaka.+ 46 Nabani na ongena kuloo ndlu kwiintsuku esavalwe ngazo,+ akazukucoceka kude kuhlwe.+ 47 Nabani na olala kuloo ndlu yaye nabani na otyela kuyo umele ahlambe iimpahla zakhe.

48 “Kodwa ke, ukuba umbingeleli uzile waza wabona ukuba isibhaxu asinwenwanga endlini emva kokuba iphinde yatyatyekwa, uza kuthi loo ndlu icocekile, ngenxa yokuba isibhaxu siphelile. 49 Ukuze ayicoce ekungcoleni,* umbingeleli uza kuthatha iintaka ezimbini, isihlahla somsedare, uboya obubomvu krwe nesihlahla sehisope.+ 50 Uza kuxhelela enye intaka esityeni sodongwe phezu kwamanzi amatsha. 51 Emva koko umbingeleli uza kuthatha isihlahla somsedare, isihlahla sehisope, uboya obubomvu krwe nentaka ephilayo, azithi nkxu zonke egazini lentaka exhelelwe phezu kwamanzi amatsha, yaye umele ayitshize loo ndlu kasixhenxe.+ 52 Uza kuyicoca loo ndlu ekungcoleni* ngegazi lentaka, ngamanzi amatsha, ngentaka ephilayo, ngesihlahla somsedare, ngesihlahla sehisope nangoboya obubomvu krwe. 53 Emva koko, uza kuyiyeka intaka ephilayo iye ngaphandle kwesixeko, endle. Ngaloo ndlela uza kususa ukungcola* endlini, ibe ke iyacoceka ngolo hlobo.

54 “Lowo ngumthetho waso nasiphi na isifo seqhenqa, ­isifo esisentlonzeni okanye ezindevini,+ 55 noweqhenqa eliba sempahleni+ okanye endlini,+ 56 nowokudumba, ukhwekhwe namabala,+ 57 ukuze kubonwe xa into ingacocekanga naxa icocekile.+ Lowo ngumthetho weqhenqa.”+

15 Waqhubeka uYehova wathi kuMoses noAron: 2 “Yithini kumaSirayeli, ‘Ukuba indoda iphuma ukungcola kwilungu layo lenzala,* oko kungcola kuyenza ingacoceki.+ 3 Ngenxa yoko kungcola, ayicocekanga, enoba oko kungcola kuqhubeka kuphuma kwilungu layo lenzala okanye livalekile ilungu lenzala ngenxa yoko kungcola, loo ndoda ayicocekanga.

4 “‘Nayiphi na ibhedi alala kuyo loo mntu uphuma ukungcola, ayizukucoceka, nayo nantoni na ahlala phezu kwayo ayizukucoceka. 5 Umntu ochukumisa ibhedi yaloo mntu umele ahlambe iimpahla zakhe, yaye ufanele ahlambe emanzini aze abe ngongacocekanga kude kuhlwe.+ 6 Nabani na ohlala phezu kwento ebehleli phezu kwayo umntu ophuma ukungcola, umele ahlambe iimpahla zakhe, ahlambe emanzini aze abe ngongacocekanga kude kuhlwe. 7 Nabani na ochukumisa umntu ophuma ukungcola ufanele ahlambe iimpahla zakhe, ahlambe emanzini aze abe ngongacocekanga kude kuhlwe. 8 Ukuba umntu ophuma ukungcola uye watshicela umntu ococekileyo, lowo ucocekileyo umele ahlambe iimpahla zakhe aze ahlambe emanzini, abe ngongacocekanga kude kuhlwe. 9 Nayiphi na isali ahlala phezu kwayo umntu ophuma ukungcola ayizukucoceka. 10 Nabani na ochukumisa nantoni na ebiphantsi kwakhe akazukucoceka kude kuhlwe, yaye nabani na oyithwalayo loo nto uza kuhlamba iimpahla zakhe, ahlambe emanzini aze abe ngongacocekanga kude kuhlwe. 11 Ukuba umntu ophuma ukungcola+ akazihlambanga izandla zakhe aze achukumise omnye umntu, loo mntu umele ahlambe iimpahla zakhe, ahlambe emanzini, abe ngongacocekanga kude kuhlwe. 12 Isitya sodongwe esichukunyiswa ngumntu ophuma ukungcola sifanele sikrotyozwe, yaye nasiphi na isitya somthi sifanele sihlanjwe ngamanzi.+

13 “‘Xa ukungcola kuyekile ukuphuma, loo mntu uza kubala iintsuku ezisixhenxe zokucocwa kwakhe, yaye umele ahlambe iimpahla zakhe, ahlambe emanzini amatsha, aze ke acoceke.+ 14 Ngosuku lwesibhozo, ufanele athathe amahobe amabini asendle okanye amantshontsho amabini amahobe afuywayo,+ eze phambi koYehova kumnyango wentente yokuhlangana, aze awanike umbingeleli. 15 Umbingeleli uza kubingelela ngawo, elinye libe ngumnikelo wesono lize elinye libe ngumnikelo otshiswayo, yaye uza kumhlawulela kuYehova ngenxa yokungcola kwakhe.

16 “‘Ukuba indoda iphuma amadlozi, ifanele ihlambe wonke umzimba wayo emanzini ize ibe yengacocekanga kude kuhlwe.+ 17 Imele iyihlambe ngamanzi nayiphi na impahla naso nasiphi na isikhumba esinamadlozi, yaye siza kuba sesingacocekanga kude kuhlwe.

18 “‘Xa indoda iye yalala nomfazi ize iphume amadlozi, bafanele bahlambe emanzini baze babe ngabantu abangacocekanga kude kuhlwe.+

19 “‘Ukuba umfazi uphuma igazi kwilungu lokuzala, uza kuhlala engcolile iintsuku ezisixhenxe ngenxa yokuba sexesheni kwakhe.+ Nabani na omchukumisayo akazukucoceka kude kuhlwe.+ 20 Nantoni na alala phezu kwayo xa engcolile ngenxa yokuba sexesheni, ayizukucoceka, yaye yonke into ahlala phezu kwayo ayizukucoceka.+ 21 Nabani na ochukumisa ibhedi yakhe ufanele ahlambe iimpahla zakhe, ahlambe emanzini aze abe ngongacocekanga kude kuhlwe. 22 Nabani na ochukumisa nantoni na ebehleli phezu kwayo loo mfazi ufanele ahlambe iimpahla zakhe, ahlambe emanzini aze abe ngongacocekanga kude kuhlwe. 23 Ukuba loo mfazi ungacocekanga uye wahlala ebhedini okanye phezu kwenye into aze umntu azichukumise ezo zinto, uza kuba ngongacocekanga kude kuhlwe.+ 24 Ukuba indoda ilala naye ize ingcoliswe ligazi lokuba sexesheni kwakhe,+ ayizukucoceka iintsuku ezisixhenxe, ibe nayiphi na ibhedi elala kuyo ayizukucoceka.

25 “‘Xa umfazi eye waphuma igazi iintsuku ezininzi,+ ingelilo ixesha lesiqhelo lokuba sexesheni kwakhe,+ okanye ukuba elo gazi liye laphuma ixesha elide kunelokuba sexesheni kwakhe, uza kungcola zonke iintsuku zokuphuma kwakhe igazi, njengeentsuku zokungacoceki kwakhe xa esexesheni. 26 Nayiphi na ibhedi alala kuyo ngeentsuku zokuphuma kwakhe igazi, ayizukucoceka kanye njengebhedi alala kuyo xa engcoliswe kukuba sexesheni,+ ibe nantoni na ahlala kuyo ayizukucoceka, njengokuba kudla ngokwenzeka xa engcoliswe kukuba sexesheni. 27 Nabani na ozichukumisayo ezo zinto akazukucoceka, yaye umele ahlambe iimpahla zakhe, ahlambe emanzini aze angacoceki kude kuhlwe.+

28 “‘Kodwa ke, xa eyekile ukuphuma igazi, uza kuzibalela iintsuku ezisixhenxe, aze emva koko acoceke.+ 29 Ngosuku lwesibhozo, uza kuthatha amahobe amabini asendle okanye amantshontsho amabini amahobe afuywayo,+ awazise kumbingeleli kumnyango wentente yokuhlangana.+ 30 Umbingeleli uza kwenza umnikelo wesono ngelinye ihobe aze ngelinye enze umnikelo otshiswayo, yaye umbingeleli uza kumhlawulela phambi koYehova ngenxa yokungcola okuphuma kuye.+

31 “‘Ngaloo ndlela nimele niwakhusele amaSirayeli ekungcoleni, ukuze angafeli ekungcoleni kwawo ngenxa yokungcolisa intente yam engcwele, ephakathi kwawo.+

32 “‘Lo ngumthetho ongendoda ephuma ukungcola, indoda engacocekanga ngenxa yokuphuma amadlozi,+ 33 umfazi ongcoliswa kukuba sexesheni,+ indoda okanye umfazi ophuma ukungcola kwilungu lenzala+ nendoda elala nomfazi ongacocekanga.’”

16 UYehova wathetha noMoses emva kokufa koonyana ababini baka-Aron ngenxa yokusondela kwabo kuYehova ngendlela engafanelekanga.+ 2 UYehova wathi kuMoses: “Chazela uAron umntakwenu ukuba angasuki nje aye nanini na ethanda endaweni engcwele,+ ngaphaya kwekhethini,+ phambi kweTyeya, ukuze angafi,+ kuba ndiza kubonakala efini+ phezu kweTyeya.+

3 “UAron ufanele eze nezi zinto xa esiza kwindawo engcwele: ithole lenkomo eliyinkunzi eliza kuba ngumnikelo wesono+ nenkunzi yegusha eza kuba ngumnikelo otshiswayo.+ 4 Ufanele anxibe isambatho esingcwele selinen,+ anxibe nebhulukhwe emfutshane yangaphantsi yelinen+ ukuze ogqume umzimba wakhe.* Akugqiba abhinqe ibhanti lelinen+ aze athwale iqhiya ekhethekileyo yelinen.+ Yimpahla engcwele leyo.+ Uza kuhlamba umzimba wakhe emanzini,+ aze ayinxibe.

5 “Uza kuthatha kumaSirayeli+ amatakane ebhokhwe aziinkunzi abe mabini, abe ngumnikelo wesono, nenkunzi yegusha, ibe ngumnikelo otshiswayo.

6 “Yena uAron umele azise inkunzi yenkomo yomnikelo wesono ongowakhe, ahlawulele yena+ nendlu yakhe.

7 “Uza kuzithatha iibhokhwe zombini azimise phambi koYehova kumnyango wentente yokuhlangana. 8 UAron uza kwenza amaqashiso ngezo bhokhwe zombini, elinye libe lelikaYehova lize elinye libe leleAzazele.* 9 UAron uza kuyisondeza ibhokhwe eye yawelwa liqashiso+ likaYehova ukuze ibe ngumnikelo wesono. 10 Kodwa ibhokhwe ewelwe liqashiso lokuba ibe yeyeAzazele, uza kuyisondeza iphila phambi koYehova ukuze kuhlawulwe ngayo, ize ithunyelwe entlango ekubeni iyeyeAzazele.+

11 “UAron uza kusondeza inkunzi yenkomo engumnikelo wesono ongowakhe, azihlawulele yena nendlu yakhe. Emva koko uza kuyixhela loo nkunzi engumnikelo wesono ongowakhe.+

12 “Uza kuthatha isitya somlilo+ esigcwele amalahle avuthayo awakhe esibingelelweni+ phambi koYehova, nesiqhumiso esiqholiweyo esigcwele izandla ezibini.+ Zonke ezo zinto uza kuzisa Kwelona Gumbi Lingcwele, ngaphaya kwekhethini.*+ 13 Isiqhumiso esiqholiweyo uza kusibeka phezu komlilo phambi koYehova,+ uze umsi wesiqhumiso esiqholiweyo wogqume isivalo seTyeya+ yesivumelwano,+ ukuze angafi.

14 “Uza kuthatha kwigazi lenkunzi yenkomo,+ alithontsizise ngomnwe wakhe phambi kweTyeya* ngakwicala elingasempuma. Uza kulithontsizisa ngomnwe wakhe kasixhenxe phambi kweTyeya.*+

15 “Emva koko uza kuxhela ibhokhwe yomnikelo wesono, ongowabantu,+ ase igazi layo+ ngaphaya kwekhethini*+ aze enze into efanayo naleyo ayenze ngegazi lenkunzi yenkomo, alithontsizise ngakwiTyeya* naphambi kwayo.*

16 “Umele acoce Elona Gumbi Lingcwele ngenxa yezenzo ezingacocekanga zamaSirayeli, ngenxa yezenzo zawo ezimbi nangenxa yezono zawo.+ Ufanele enze kwaloo nto kwintente yokuhlangana ekubeni eyenze ayacoceka ngenxa yezono zawo.

17 “Akakho omnye umntu omele abe sententeni yokuhlangana xa kungena umbingeleli ukuze acoce Elona Gumbi Lingcwele de aphume. Uza kuhlawulela yena nendlu yakhe+ nalo lonke ibandla lamaSirayeli.+

18 “Emva koko uza kuphuma aye esibingelelweni+ esiphambi koYehova aze asicoce, yaye uza kuthatha kwigazi lenkunzi yenkomo nakwigazi lebhokhwe, aqabe iimpondo zesibingelelo macala onke. 19 Uza kuthontsizisa kuso kwangelo gazi ngomnwe wakhe kasixhenxe, asicoce kwizenzo ezimbi zamaSirayeli aze asenze ngcwele.

20 “Akugqiba ukucoca+ Elona Gumbi Lingcwele, intente yokuhlangana nesibingelelo,+ uza kuzisa ibhokhwe ephilayo.+ 21 UAron uza kubeka izandla zakhe zozibini phezu kwentloko yaloo bhokhwe aze azivume phezu kwayo zonke iziphoso zamaSirayeli nazo zonke izenzo ezimbi nazo zonke izono zawo. Ngaloo ndlela, kuza kuba ngathi ubeka zonke ezo zono phezu kwentloko yaloo bhokhwe.+ Uza kuyithumela entlango ngesandla sendoda elungiselelwe loo nto.* 22 Yile bhokhwe eza kuzithwala zonke izono zamaSirayeli+ izise entlango,+ ibe uza kuyithumela khona.+

23 “UAron uza kungena ententeni yokuhlangana, akhulule iimpahla zakhe zelinen ebezinxibe xa ebengena kwindawo engcwele, azibeke khona. 24 Umele ahlambe umzimba wakhe* ngamanzi+ endaweni engcwele aze anxibe iimpahla zakhe.+ Emva koko uza kuphuma ayokubingelela ngomnikelo wakhe otshiswayo+ nangomnikelo otshiswayo wabantu,+ aze ahlawulele yena nabantu.+ 25 Uza kuqhumisa ngamanqatha omnikelo wesono esibingelelweni.

26 “Indoda eye yahambisa ibhokhwe yeAzazele,+ ifanele ihlambe iimpahla zayo, ihlambe nomzimba wayo emanzini, emva koko ingangena enkampini.

27 “Yona inkunzi yenkomo yomnikelo wesono nebhokhwe yomnikelo wesono, nelithe igazi lazo langeniswa kwindawo engcwele ukuze kuhlawulelwe isono, ziza kusiwa ngaphandle kwenkampu. Iimfele zazo, inyama yazo nomswane wazo ziza kutshiswa ngomlilo.+ 28 Lowo utshisa ezo zinto uza kuzihlamba iimpahla zakhe, ahlambe nomzimba wakhe emanzini, emva koko angangena enkampini.

29 “Nanku umthetho oza kuhlala uhleli kuni: Ngenyanga yesixhenxe, ngosuku lweshumi, nifanele nizixhwalekise,* yaye nimele ningenzi nawuphi na umsebenzi,+ enoba nini okanye ngumntu wasemzini ophakathi kwenu. 30 Kuba ngale mini niza kuhlawulelwa+ ukuze kuthiwe nicocekile. KuYehova niza kuba ngabacociweyo kuzo zonke izono zenu.+ 31 Yisabatha yokuphumla ngokupheleleyo kuni, yaye nifanele nizixhwalekise.+ Lowo ngumthetho oza kuhlala uhleli.

32 “Umbingeleli oye wabekwa*+ njengombingeleli+ omkhulu esikhundleni sikatata wakhe+ uza kuhlawulela izono aze anxibe impahla yelinen,+ impahla engcwele.+ 33 Uza kucoca Elona Gumbi Lingcwele,+ intente yokuhlangana+ nesibingelelo.+ Uza kuhlawulela ababingeleli nabantu bonke bebandla.+ 34 Lowo iza kuba ngumthetho wenu oza kuhlala uhleli+ wokuhlawulela amaSirayeli kanye ngonyaka ngenxa yazo zonke izono zawo.”+

Ngoko uMoses wenza kanye njengokuba wayeyalelwe nguYehova.

17 UYehova waqhubeka wathi kuMoses: 2 “Yithi kuAron noonyana bakhe nakuwo onke amaSirayeli, ‘Uthi uYehova:

3 “‘“Ukuba nayiphi na indoda kwaSirayeli ixhela inkunzi yenkomo okanye inkunzi yetakane legusha okanye ibhokhwe, enkampini okanye ngaphandle kwenkampu, 4 kunokuba iyizise kumnyango wentente yokuhlangana ukuze inikelwe kuYehova phambi kwentente kaYehova engcwele, loo ndoda iza kuba netyala legazi. Iye yachitha igazi, yaye imele ibulawe. 5 Oku kuza kwenza amaSirayeli ayeke ukubingelela endle, kodwa ayizise kuYehova imibingelelo yawo, ayinike umbingeleli kumnyango wentente yokuhlangana. Afanele abingelele ngezo zinto zibe yimibingelelo yobuhlobo eya kuYehova.+ 6 Umbingeleli uza kufefa igazi esibingelelweni sikaYehova kumnyango wentente yokuhlangana aze aqhumise ngamanqatha, abe livumba elimnandi kuYehova.+ 7 Ngoko afanele ayeke ukungathembeki+ ngokuthi abingelele kwiidemon ezifana neebhokhwe.*+ Lo uza kuba ngumthetho ohlala uhleli kuni nakwizizukulwana zenu.”’

8 “Uze uthi kuwo, ‘Nayiphi na indoda yakwaSirayeli okanye nawuphi na umntu wasemzini ohlala nani onyusa umnikelo otshiswayo okanye umbingelelo 9 aze angawuzisi kumnyango wentente yokuhlangana ukuze awunikele kuYehova, umele abulawe.+

10 “‘Ukuba nayiphi na indoda yakwaSirayeli okanye nawuphi na umntu wasemzini ohlala phakathi kwenu utya naliphi na igazi,+ ndiza kumchasa nakanjani loo mntu, ndimbulale. 11 Kuba ubomi bayo nantoni na ephilayo busegazini,+ yaye mna ndininike lona ukuze nizihlawulele esibingelelweni,+ kuba ligazi elinenza nihlawulelwe+ ngobomi obukulo. 12 Yiloo nto ndithe kumaSirayeli: “Makungabikho namnye umntu kuni otya igazi, yaye kungabikho namnye umntu wasemzini ohlala nani+ otya igazi.”+

13 “‘Ukuba omnye wamaSirayeli okanye omnye umntu wasemzini ohlala nani uyazingela aze abambise inyamakazi okanye intaka etyiwayo, umele alichithe igazi layo+ aze alogqume ngomhlaba. 14 Kaloku ubomi bayo yonke into ephilayo ligazi layo, kuba ubomi bukulo. Yiloo nto ndithe kumaSirayeli: “Nimele ningatyi igazi layo nantoni na ephilayo, kuba ubomi bayo ligazi. Nabani na olityayo uza kubulawa.”+ 15 Ukuba nabani na utya into efunyenwe seyifile okanye eqwengwe lirhamncwa,+ nokuba loo mntu ngumSirayeli okanye ngumntu wasemzini, umele ahlambe iimpahla zakhe ahlambe nomzimba wakhe emanzini, yaye akazukucoceka kude kuhlwe,+ aze emva koko acoceke. 16 Kodwa ukuba akazihlambanga iimpahla zakhe, akawuhlamba nomzimba wakhe, uza kuphendula ngesono sakhe.’”+

18 Waqhubeka uYehova wathi kuMoses: 2 “Yithi kumaSirayeli, ‘NdinguYehova uThixo wenu.+ 3 Ningaziphathi ngendlela abaziphatha ngayo abantu belizwe laseYiputa, enanihlala kulo, yaye ningenzi izinto abazenzayo abantu belizwe lakwaKanan, endinizisa kulo.+ Ningaphili ngemithetho yabo. 4 Nize niyenze imimiselo yam, niyigcine nemithetho yam, nihambe ngayo.+ NdinguYehova uThixo wenu. 5 Nimele niyigcine imithetho yam nemimiselo yam. Umntu ozenzayo ezo zinto uza kuphila ngenxa yazo.+ NdinguYehova.

6 “‘Makungabikho nayiphi na indoda kuni eya kuso nasiphi na isalamane sayo esisondeleyo ukuze ilale naso.*+ NdinguYehova. 7 Ungaze ulale notata wakho, yaye ungaze ulale nomama wakho. Ngumama wakho lowo, ibe ungaze ulale naye.

8 “‘Ungaze ulale nomfazi katata wakho.+ Uyamhlazisa utata wakho xa usenza loo nto.*

9 “‘Ungaze ulale nodadewenu, enoba yintombi katata wakho okanye yintombi kamama wakho, enoba uzalelwe ekhaya okanye uzalelwe emzini.+

10 “‘Ungaze ulale nentombi yonyana wakho okanye intombi yentombi yakho, kuba babubuze bakho.

11 “‘Ungaze ulale nentombi yomfazi katata wakho, inzala katata wakho, kuba ingudadewenu.

12 “‘Ungaze ulale nodadobawo wakho. Usisalamane segazi sikatata wakho.+

13 “‘Ungaze ulale nomakazi wakho, kuba usisalamane segazi sikamama wakho.

14 “‘Ungaze uhlaze umntakwabotata wakho ngokulala nomfazi wakhe. Sisalamane sakho eso.+

15 “‘Ungaze ulale nomolokazana wakho.+ Ngumfazi wonyana wakho lowo, yaye umele ungalali naye.

16 “‘Ungaze ulale nomfazi womntakwenu,+ kuba kukuhlaza umntakwenu oko.*

17 “‘Ungaze ulale nomfazi kunye nentombi yakhe.+ Ungalali nentombi yonyana wakhe kunye nentombi yentombi yakhe. Zizalamane zakhe zegazi ezo, linyala elo.*

18 “‘Ungaze uthathe udadebomfazi wakho ukuba naye abe ngumfazi wakho+ uze ulale naye ngoxa udadewabo esaphila.

19 “‘Ungaze uye emfazini ukuze ulale naye ngoxa esangcoliswe kukuba sexesheni.+

20 “‘Ungaze ulale nomfazi womhlobo wakho,* nto leyo eza kukwenza ungacoceki.+

21 “‘Uze ungavumeli namnye wenzala yakho ukuba anikelwe* kuMoleki.+ Ungalingcolisi igama loThixo wakho ngaloo ndlela.+ NdinguYehova.

22 “‘Ungaze ulale nendoda njengokuba ulala nomfazi.+ Yinto eyenyanyekayo leyo.

23 “‘Indoda ayimele ilale nesilwanyana ize ingacoceki ngenxa yaso, nomfazi akamele aye kwisilwanyana ukuze alale naso.+ Loo nto kukonakalisa indalo.

24 “‘Sanukuzenza ningacoceki ngayo nayiphi na kwezi zinto, kuba iintlanga endizigxothayo phambi kwenu zizenze azacoceka ngezi zinto.+ 25 Ngenxa yoko, eli lizwe alicocekanga, yaye ndiza kulohlwaya ngesiphoso salo, ibe liza kubahlanza abemi balo.+ 26 Kodwa ke nina nimele niyigcine imithetho nemimiselo yam,+ ningenzi nanye kwezi zinto zenyanyekayo, nokuba yinzalelwane okanye ngumntu wasemzini ohlala kunye nani.+ 27 Kaloku zonke ezi zinto zenyanyekayo bezisenziwa ngabantu belo lizwe, ababehlala kulo ngaphambi kwenu,+ yaye ngoku alicocekanga. 28 Ekubeni ningalingcolisanga nina ilizwe, alizukunihlanza njengokuba beliza kuzihlanza iintlanga ebezihlala kulo ngaphambi kwenu. 29 Ukuba nabani na wenza nayiphi na kwezi zinto zenyanyekayo, umele abulawe. 30 Nimele niyigcine imbopheleleko yenu kum ngokuthi ningenzi nalinye kumasiko enyanyekayo aye enziwa phambi kwenu,+ ukuze ningazenzi abangacocekanga ngawo. NdinguYehova uThixo wenu.’”

19 UYehova waphinda wathi kuMoses: 2 “Thetha kwibandla lamaSirayeli, uthi kuwo, ‘Nifanele nibe ngcwele kuba mna Yehova Thixo wenu ndingcwele.+

3 “‘Ngamnye kuni ufanele amhloniphe* umama wakhe notata wakhe,+ yaye nifanele nizigcine iisabatha zam.+ NdinguYehova uThixo wenu. 4 Sanukuphethukela kwizithixo ezingenaxabiso,+ okanye nizenzele oothixo abatyhidiweyo.+ NdinguYehova uThixo wenu.

5 “‘Xa nibingelela kuYehova umbingelelo wobuhlobo,+ nifanele niwunikele ngendlela eza kwenza uThixo avuyiswe nini.+ 6 Loo mnikelo ufanele utyiwe ngosuku obingelelwe ngalo nangemini elandelayo, kodwa into eshiyekileyo de yalusuku lwesithathu, ifanele itshiswe.+ 7 Kodwa ke, ukuba loo nto ishiyekileyo iye yatyiwa ngosuku lwesithathu, kuza kuba kwaphulwa umthetho, ibe ayizukwamkeleka. 8 Lowo uyityileyo uza kuphendula ngesiphoso sakhe kuba eyingcolisile into engcwele kaYehova, yaye loo mntu umele abulawe.

9 “‘Xa nivuna isivuno selizwe lenu, ningavuni yonke into ekupheleni kwamasimi enu, yaye ningachola-choli yonke into* eniyivunileyo.+ 10 Kwakhona, nimele ningazivuni iidiliya eziye zashiyeka, neediliya eziye zavuthuluka kumasimi enu eediliya, ningazicholi. Nifanele nizishiyele abantu abangathathi ntweni+ nomntu wasemzini. NdinguYehova uThixo wenu.

11 “‘Nize ningebi,+ ningaqhathi+ yaye ningenzelani maqhinga. 12 Nize ningafungi ngobuxoki egameni lam,+ ningcolisa igama loThixo wenu. NdinguYehova. 13 Uze ungamqhathi omnye umntu,+ yaye ufanele ungamtsotsi.+ Ufanele ungahlali kuwe ubusuku bonke kude kuse umvuzo womntu oqeshiweyo.+

14 “‘Umele ungamqalekisi umntu ongevayo yaye ungabeki phambi komntu ongaboniyo into anokukhubeka kuyo,+ ibe umele umoyike uThixo wakho.+ NdinguYehova.

15 “‘Nize ningenzi izinto ezingezozabulungisa xa nigweba. Uze ungabi namkhethe kwihlwempu, okanye ukhethe isityebi.+ Uze ugwebe ngobulungisa.

16 “‘Uze ungahambi ungcolisa igama lomntu kubantu bakowenu.+ Umele ungazami ukuthatha ubomi* bomnye umntu.*+ NdinguYehova.

17 “‘Uze ungamcaphukeli umzalwana wakho entliziyweni.+ Nakanjani ufanele umkhalimele,+ ukuze ungabi nesono kunye naye.

18 “‘Uze ungaziphindezeli+ okanye ube nenqala koonyana babantu bakowenu, yaye umele uthande omnye umntu ngendlela ozithanda ngayo nawe.+ NdinguYehova.

19 “‘Nize niyigcine imithetho yam: Umele ungenzi iintlobo ezimbini zezilwanyana zasekhaya zikhwelane. Umele ungatyali iintlobo ezimbini zembewu entsimini yakho,+ ungayinxibi nempahla eyenziwe ngeentlobo ezimbini zelaphu.+

20 “‘Ukuba indoda iye yalala nomfazi osisicakakazi esikhethelwe enye indoda, sibe singekahlawulelwa okanye singekanikwa nkululeko, mabohlwaywe. Kodwa mabangabulawa, kuba isicakakazi besingekakhululwa. 21 Indoda leyo imele ise umnikelo wayo wetyala kuYehova kumnyango wentente yokuhlangana, inkunzi yegusha yomnikelo wetyala.+ 22 Umbingeleli uza kuyihlawulela ngenkunzi yomnikelo wetyala phambi koYehova ngenxa yesono esenzileyo, yaye iza kuxolelwa ngesono esenzileyo.

23 “‘Xa nifikile elizweni nize nityale nawuphi na umthi ukuze nifumane ukutya, iziqhamo zawo mazibe zezingacocekanga* kuni, ningazityi. Anivumelekanga ukuba nizitye* kangangeminyaka emithathu. Mazingatyiwa. 24 Kodwa ngonyaka wesine zonke iziqhamo zawo ziza kuba ngcwele, yaye elo iza kuba lixesha lokuvuya phambi koYehova.+ 25 Ngonyaka wesihlanu ningazitya iziqhamo zawo ukuze nizongeze kwisivuno senu. NdinguYehova uThixo wenu.

26 “‘Nimele ningatyi nantoni na enegazi.+

“‘Nimele ningavumisi okanye nenze umlingo.+

27 “‘Nimele ningazitshevi* iituma zenu okanye nincwele iindevu zenu.+

28 “‘Nimele ningazisiki enyameni ngenxa yomntu ofileyo,*+ ningenzi nemizobo ngokuzikrwela enyameni. NdinguYehova.

29 “‘Uze ungayihlazi intombi yakho ngokuyenza ithengise ngomzimba,+ ukuze ilizwe lingangcoliswa ngabafazi abathengisa ngomzimba nangabantu abangakwazi kuziphatha.+

30 “‘Nimele nizigcine iisabatha zam,+ yaye niyihloniphe* indawo yam engcwele. NdinguYehova.

31 “‘Musani ukuphethukela emagqirheni,+ yaye ningabuzisi kwabo bachaza izinto kwangaphambili+ ukuze banganingcolisi. NdinguYehova uThixo wenu.

32 “‘Ufanele uyihloniphe ingwevu,+ ube nembeko kwindoda enkulu,+ umoyike uThixo wakho.+ NdinguYehova.

33 “‘Ukuba umntu wasemzini uhlala elizweni lenu, nize ningamphathi kakubi.+ 34 Nimele nimjonge njengenzalelwane yenu umntu wasemzini ohlala nani,+ nimthande njengokuba nizithanda, kuba nani naningabantu basemzini kwilizwe laseYiputa.+ NdinguYehova uThixo wenu.

35 “‘Nimele ningaqhathi xa nikala ubude, ubunzima okanye ubukhulu bento.+ 36 Nifanele nisebenzise izikali ezichanileyo, amatye okukala achanileyo nezikhongozelo zokukala ezichanileyo.*+ NdinguYehova uThixo wenu, onikhuphileyo kwilizwe laseYiputa. 37 Ngoko ke, nimele niyithobele imithetho yam nezigwebo zam yaye nimele niyenze.+ NdinguYehova.’”

20 UYehova waphinda wathi kuMoses: 2 “Yithi kumaSirayeli, ‘Nayiphi na indoda kwaSirayeli yaye nawuphi na umntu wasemzini ohlala kwaSirayeli, oye wasa omnye wabantwana bakhe kuMoleki, umele abulawe nakanjani loo mntu.+ Abemi bafanele bambethe ngamatye de afe. 3 Nakanjani ndiza kumlahla loo mntu ndize ndimbulale, ngenxa yokuba eye wasa omnye wabantwana bakhe kuMoleki, wayingcolisa indawo yam engcwele,+ wangcolisa negama lam elingcwele. 4 Ukuba abemi benza ngathi abambonanga loo mntu xa esisa inzala yakhe kuMoleki baze bangambulali,+ 5 ndiza kumlahla nakanjani loo mntu kunye nentsapho yakhe.+ Ndiza kumbulala kunye nabo bonke abo bamncedisayo ekukhonzeni uMoleki.*

6 “‘Umntu oye waphethukela kumagqirha+ nakwabo bachaza izinto kwangaphambili+ waza akathembeka kum,* ndiza kumlahla nakanjani loo mntu ndize ndimbulale.+

7 “‘Nimele nizingcwalise nize nibe ngcwele,+ kuba ndinguYehova uThixo wenu. 8 Nimele niyithobele imithetho yam nize niyenze.+ NdinguYehova onenza ngcwele.+

9 “‘Ukuba kukho nayiphi na indoda ethuka* utata wayo okanye umama wayo, imele nakanjani ibulawe.+ Ekubeni ithuke utata wayo okanye umama wayo, yiyo ezizisele ukufa.*

10 “‘Nantsi into efanele yenziwe ngendoda ekrexeze nomfazi wenye indoda: Loo ndoda ikrexeze nomfazi womnye umntu imele nakanjani ibulawe kunye naloo mfazi ikrexeze naye.+ 11 Indoda elala nomfazi katata wayo imhlazisile utata wayo.*+ Nakanjani bamele babulawe bobabini. Bazizisele ukufa ngokwabo. 12 Ukuba indoda ilala nomolokazana wayo, bamele nakanjani babulawe bobabini. Bonakalise indalo. Bazizisele ukufa ngokwabo.+

13 “‘Ukuba indoda ilala nendoda ngendlela ekulalwa ngayo nomfazi, bobabini benze into eyenyanyekayo.+ Nakanjani bamele babulawe. Bazizisele ukufa ngokwabo.

14 “‘Ukuba indoda ithatha umfazi kunye nomama wakhe, yenza into elinyala.*+ Imele itshiswe ngomlilo kunye nabo,+ ukuze kungaqhubeki kusenziwa amanyala phakathi kwenu.

15 “‘Ukuba indoda ilala nesilwanyana, nakanjani imele ibulawe kunye neso silwanyana.+ 16 Ukuba umfazi uya nakwesiphi na isilwanyana ukuze alale naso,+ nimele nimbulale kunye neso silwanyana. Nakanjani bamele bafe. Bazizisele ukufa ngokwabo.

17 “‘Ukuba indoda ilala nodadewayo, intombi katata wayo okanye intombi kamama wayo, yabubona ubuze bodadewayo, waza nodadewayo wabubona ubuze bayo, lihlazo elo.+ Bamele babulawe. Imhlazisile udadewayo.* Imele iphendule ngesono sayo.

18 “‘Ukuba indoda ilala nomfazi osexesheni, bobabini babonisa ukuba abalihlonelanga igazi laloo mfazi.+ Bobabini bamele babulawe.

19 “‘Uze ungalali nomakazi okanye udadobawo wakho, kuba loo nto iza kuba kukuhlazisa isalamane sakho segazi.+ Nobabini nifanele niphendule ngenxa yesono senu. 20 Indoda elala nomfazi womntakwabotata wayo imhlazisile umntakwabotata wayo.*+ Bafanele baphendule ngesono sabo. Bafanele bafe bengenamntwana. 21 Ukuba indoda ithatha umfazi womntakwayo,* yinto eyenyanyekayo leyo.+ Imhlazisile umntakwayo.* Bafanele bangabi namntwana.

22 “‘Nize niyithobele yonke imithetho nemimiselo yam,+ niyenze,+ ukuze ilizwe endinizisa kulo linganihlanzi.+ 23 Nize ningalandeli amasiko eentlanga endizigxothayo kuni,+ kuba zizenzile zonke ezi zinto yaye ndiyazenyanya.+ 24 Yiyo le nto ndithe kuni: “Niza kulithatha ilizwe lazo, ibe ndiza kuninika lona libe lelenu, ilizwe eligcwele ubisi nobusi.+ NdinguYehova uThixo wenu, onenze nahluka kwezinye izizwana.”+ 25 Nize nahlukanise phakathi kwesilwanyana esicocekileyo nesingacocekanga naphakathi kwentaka engacocekanga necocekileyo,+ ningazenzi nizotheke* ngesilwanyana okanye ngentaka okanye ngayo nantoni na enambuzelayo emhlabeni endiye ndayibekela bucala ukuba niyijonge njengento engacocekanga.+ 26 Nize nibe ngcwele kum, kuba mna Yehova ndingcwele+ yaye ndinenza nahluke kwizizwana ukuze nibe ngabam.+

27 “‘Nayiphi na indoda okanye umfazi oba ligqirha okanye ochaza izinto kwangaphambili, umele nakanjani abulawe.+ Abantu bamele bababethe ngamatye bafe. Bazizisele ukufa ngokwabo.’”

21 UYehova waphinda wathi kuMoses: “Thetha nababingeleli, oonyana baka-Aron, uthi kubo, ‘Makungabikho mbingeleli uzingcolisayo ngomntu ofileyo kubantu bakowabo.+ 2 Kodwa angayenza loo nto ngenxa yesalamane sakhe segazi esisondeleyo kuye, ngenxa kamama wakhe, utata wakhe, unyana wakhe, intombi yakhe, umntakwabo 3 nangenxa kadadewabo ukuba useyintombi engazange yalala nandoda, usondele kuye yaye akakatshati. 4 Akamele azingcolise aze azenze angabi ngcwele ngenxa yomfazi onomyeni wakhe kubantu bakowabo. 5 Bafanele bangazichebi inkqayi iintloko zabo,+ bangazincweli iindevu zabo ekugqibeleni, bangazisiki nasemzimbeni.+ 6 Bafanele babe ngcwele kuThixo wabo,+ bangalingcolisi igama loThixo wabo,+ kuba ngabo abazisa umnikelo kaYehova owenziwa ngomlilo, isonka soThixo* wabo, yaye bamele babe ngcwele.+ 7 Mabangatshati nomfazi othengisa ngomzimba,+ intombi ehluthwe ubuntombi bayo, okanye umfazi oqhawule umtshato nendoda yakhe,+ kuba umbingeleli ungcwele kuThixo wakhe. 8 Umele umngcwalise,+ kuba nguye ozisa isonka soThixo wakho. Umele abe ngcwele kuwe, kuba mna Yehova oningcwalisayo, ndingcwele.+

9 “‘Ukuba intombi yombingeleli iye yazingcolisa ngokuthengisa ngomzimba, ingcolisa igama likatata wayo. Imele itshiswe.+

10 “‘Umbingeleli omkhulu ophakathi kwabantakwabo, ekuza kugalelwa ioli yokuthambisa entlokweni yakhe,+ noye wabekwa* ukuba anxibe izambatho zababingeleli,+ umele angayiyeki ingalungiswanga intloko yakhe, angazikrazuli iimpahla zakhe.+ 11 Umele angayi nakumntu ofileyo.*+ Akamele azingcolise nangenxa katata okanye umama wakhe. 12 Umele angaphumi kwindawo engcwele yaye angayingcolisi indawo engcwele kaThixo wakhe,+ kuba ioli yokuthambisa kaThixo wakhe,+ ebonisa ukuzinikezela kwakhe, iphezu kwakhe. NdinguYehova.

13 “‘Makazithathele umfazi ongazange walala nandoda.+ 14 Akamele atshate umhlolokazi, umfazi oqhawule umtshato, intombi ehluthwe ubuntombi bayo, okanye umfazi othengisa ngomzimba, kodwa ufanele athathe intombi engazange yalala nandoda ebantwini bakowabo ukuba ibe ngumfazi wakhe. 15 Makangayingcolisi inzala* yakhe phakathi kwabantu bakowabo,+ kuba ndinguYehova omngcwalisayo.’”

16 Waqhubeka uYehova wathi kuMoses: 17 “Yithi kuAron, ‘Makungabikho ndoda enesiphene kwinzala* yakho, kuzo zonke izizukulwana zayo, esondelayo ukuze izise isonka soThixo wayo. 18 Ukuba kukho nayiphi na indoda enesiphene, ayimele isondele: indoda eyimfama okanye isiqhwala okanye enempumlo esikekileyo okanye esisilima, 19 indoda eyaphuke unyawo okanye eyaphuke isandla, 20 esisifombo okanye emfutshane* ngokungaqhelekanga, enesifo emehlweni ayo okanye enokhwekhwe okanye enesitshanguba okanye etyumke amasende.+ 21 Akukho ndoda inesiphene kwinzala ka-Aron umbingeleli emele izise iminikelo kaYehova eyenziwa ngomlilo. Ekubeni inesiphene, ayivumelekanga ukuzisa isonka soThixo wayo. 22 Ingasitya isonka soThixo wayo esivela kwizinto ezizezona zingcwele+ nakwizinto ezingcwele.+ 23 Kodwa ke, ayimele ize kufuphi nekhethini,+ yaye ayimele isondele esibingelelweni,+ kuba inesiphene. Ayifanele ingcolise ingcwele yam,+ kuba ndinguYehova obangcwalisayo.’”+

24 Ngoko uMoses wathetha noAron noonyana bakhe nawo onke amaSirayeli.

22 UYehova waphinda wathi kuMoses: 2 “Thetha kuAron nakoonyana bakhe, ukuba bafanele balumke xa bephatha izinto* ezingcwele zamaSirayeli ukuze bangalingcolisi igama lam+ xa bengcwalisa ezo zinto kum.+ NdinguYehova. 3 Yithi kubo, ‘Kuzo zonke izizukulwana zenu, nawuphi na umntu ongowenzala yenu, othi engacocekanga asondele kwizinto ezingcwele eziye ­zangcwaliswa ­ngamaSirayeli kuYehova, loo mntu uza kubulawa angabikho phambi kwam.+ NdinguYehova. 4 Akukho ndoda kwinzala ka-Aron, eneqhenqa+ okanye ephuma ukungcola kwilungu layo lenzala+ emayitye kwizinto ezingcwele de icoceke,+ nendoda echukumisa umntu ongacocekanga ngenxa yokuba echukumise umntu ofileyo,+ okanye indoda ephuma amadlozi,+ ayimele izitye, 5 nomntu ochukumisa isilwanyana esinyakazelayo nesingacocekanga+ okanye ochukumisa indoda engacocekanga ngenxa yaso nasiphi na isizathu, akamele azitye.+ 6 Umntu ochukumisa nawuphi kwaba bantu nezi zinto akazukucoceka kude kuhlwe, ibe akafanele atye nantoni na engcwele, kodwa ufanele ahlambe umzimba wakhe ngamanzi.+ 7 Lakutshona ilanga, uza kucoceka, yaye emva koko angazitya ezinye zezinto ezingcwele, kuba kukutya kwakhe.+ 8 Kwakhona umele angasityi nasiphi na isilwanyana esifunyenwe sifile okanye esiqwengwe zizilwanyana zasendle, kuba loo nto iza kumenza angacoceki.+ NdinguYehova.

9 “‘Mabawuthobele umyalelo wam ukuze bangenzi sono baze bafe ngenxa yokungawuthobeli. NdinguYehova obangcwalisayo.

10 “‘Makungabikho mntu ongafanelekanga* otya nantoni na engcwele.+ Akukho mntu wasemzini olundwendwe lombingeleli okanye ongumqeshwa wakhe omakatye nantoni na engcwele. 11 Kodwa ukuba umbingeleli uthenga umntu ngemali yakhe, loo mntu angayitya naye. Nawo amakhoboka azalelwe endlini yakhe, angakutya ukutya kwakhe.+ 12 Ukuba intombi yombingeleli itshatela kumntu ongengombingeleli,* ayinakutya emnikelweni wezinto ezingcwele. 13 Kodwa ukuba intombi yombingeleli iye yaba ngumhlolokazi okanye yaqhawula umtshato yaye ayi­nanzala, ize ibuyele endlini katata wayo njengasebutsheni bayo, ingakutya ukutya ­kukatata wayo,+ kodwa makungatyiwa ngumntu ongafanelekanga.*

14 “‘Ukuba indoda iye yatya into engcwele ngempazamo, imele yongeze isihlanu sexabiso laloo nto ize iwunike umbingeleli loo mnikelo ungcwele.+ 15 Ngoko ke, bafanele bangazingcolisi izinto ezingcwele ezinikelwa ngamaSirayeli kuYehova,+ 16 ngaloo ndlela bazibizele isohlwayo ngenxa yetyala abalenzileyo, ngokutya kwabo izinto zawo ezingcwele, kuba ndinguYehova obangcwalisayo.’”

17 UYehova waqhubeka wathi kuMoses: 18 “Thetha kuAron nakoonyana bakhe nakumaSirayeli onke uthi, ‘Xa umSirayeli okanye umntu wasemzini ohlala kwaSirayeli esizisa umnikelo otshiswayo+ kuYehova ukuze azalisekise isifungo sakhe okanye ukuze enze umnikelo wokuzithandela,+ 19 ukuze amkeleke, ufanele azise inkunzi yetakane legusha okanye lebhokhwe eliphilileyo+ alithathe emhlambini. 20 Animele nisondeze nantoni na enesiphene,+ kuba ayizukunenza namkeleke.

21 “‘Xa umntu esizisa umbingelelo wobuhlobo+ kuYehova ukuze enze njengokuba ebefungile, okanye esizisa umbingelelo wokuzithandela, ufanele anikele ngesilwanyana esiphilileyo esithathwe emhlambini weenkomo, weegusha okanye weebhokhwe, ukuze samkeleke. Masingabi nasiphene konke konke. 22 Makunganikelwa ngesilwanyana esiyimfama, esaphukileyo, esinentsumpa, esinokhwekhwe okanye esinesitshanguba. Ningazisi nanye yezi zinto kuYehova okanye nenzele uYehova umnikelo onjalo esibingelelweni. 23 Ningayizisa inkunzi yenkomo okanye igusha enomlenze omde kakhulu okanye omfutshane kakhulu ukuze nenze ngayo umnikelo wokuzithandela, kodwa ayizukwamkeleka xa isenzelwa umnikelo wesifungo. 24 Animele nisondeze kuYehova isilwanyana esinamasende onzakeleyo okanye atyunyuziweyo okanye aqhawuliweyo okanye anqunyuliweyo, ibe anifanele ninikele ngezilwanyana ezinjalo elizweni lenu. 25 Ningasondezi nasinye kwezi zilwanyana esivela kumntu wasemzini sibe ngumnikelo* kuThixo wenu, kuba sonakele yaye sinesiphene. Asizukunenza namkeleke.’”

26 UYehova waqhubeka wathi kuMoses: 27 “Ukuba kuye kwazalwa ithole lenkomo eliyinkunzi okanye itakane legusha okanye lebhokhwe eliyinkunzi, liza kuba kumama walo iintsuku ezisixhenxe,+ kodwa emva kosuku lwesibhozo ukuya phambili, liza kuba ngumnikelo owamkelekileyo, umnikelo otshiswa ngomlilo oza kuYehova. 28 Animele niyixhele inkomo nethole layo, okanye igusha netakane layo ngosuku olunye.+

29 “Ukuba nibingelela umbingelelo wombulelo kuYehova,+ nifanele niwubingelele ukuze namkeleke. 30 Ufanele utyiwe ngolo suku. Nimele ningashiyi nto kuwo kude kuse.+ NdinguYehova.

31 “Nimele niyigcine imiyalelo yam, niyenze.+ NdinguYehova. 32 Nimele ningalingcolisi igama lam elingcwele,+ kodwa ndimele ndenziwe ngcwele phakathi kwamaSirayeli.+ NdinguYehova onenza ngcwele,+ 33 lowo unikhuphayo kwilizwe laseYiputa ukuze ndinibonise ukuba ndinguThixo kuni.+ NdinguYehova.”

23 UYehova waqhubeka wathi kuMoses: 2 “Yithi kumaSirayeli, ‘Amatheko kaYehova amaxesha amisiweyo+ enifanele niwazise+ aziindibano ezingcwele. Ngamatheko am amaxesha amisiweyo:

3 “‘Ningasebenza iintsuku ezintandathu, kodwa usuku lwesixhenxe yisabatha yokuphumla ngokupheleleyo,+ indibano engcwele. Animele nenze naluphi na uhlobo lomsebenzi. Lumele lube yisabatha kaYehova naphi na apho nihlala khona.+

4 “‘Nanga amatheko kaYehova amaxesha amisiweyo, iindibano ezingcwele enifanele nizazise ngamaxesha azo amisiweyo: 5 Ngenyanga yokuqala, ngorhatya* kusuku lwe-14 enyangeni leyo,+ yiPasika+ kaYehova.

6 “‘Ngosuku lwe-15 lwale nyanga liTheko Lezonka Ezingenagwele elenzelwa uYehova.+ Kangangeentsuku ezisixhenxe nifanele nitye isonka esingenagwele.+ 7 Ngosuku lokuqala, niza kuba nendibano engcwele.+ Anifanele nenze nawuphi na umsebenzi onzima. 8 Kodwa nimele nizise umnikelo otshiswa ngomlilo oya kuYehova iintsuku ezisixhenxe. Ngosuku lwesixhenxe kuza kubakho indibano engcwele. Anifanele nenze nawuphi na umsebenzi onzima.’”

9 UYehova waqhubeka wathi kuMoses: 10 “Thetha kumaSirayeli uthi, ‘Xa ekugqibeleni nifika kwilizwe endininika lona yaye nivune isivuno salo, nimele nizise kumbingeleli isithungu sesivuno senu sokuqala.+ 11 Uza kusitshangatshangisa isithungu eso phambi koYehova ukuze namkeleke. Umbingeleli ufanele asitshangatshangise ngosuku olusemva kweSabatha. 12 Ngosuku lokutshangatshangiswa kwesithungu, nimele ninikele ngetakane legusha eliyinkunzi eliphilileyo elinonyaka omnye, libe ngumnikelo otshiswayo oya kuYehova. 13 Umnikelo wawo weenkozo uza kuba zizishumi ezibini ze-efa* zomgubo weflawa ocolekileyo oxutywe neoli, ube ngumnikelo otshiswayo oya kuYehova, ivumba elimnandi.* Umnikelo wawo oselwayo uza kuba sisahlulo sesine sehin* yewayini. 14 Nize ningatyi nasiphi na isonka, iinkozo ezigcadiweyo okanye iinkozo ezintsha de kube lolu suku, de nizise umnikelo kuThixo wenu. Lo ngumthetho oza kuhlala uhleli wazo zonke izizukulwana zenu, naphi na apho nihlala khona.

15 “‘Nimele nibale iisabatha ezisixhenxe ukususela kusuku olusemva kweSabatha, enizise ngalo isithungu somnikelo otshangatshangiswayo.+ Mayibe ziiveki ezipheleleyo. 16 Niza kubala iintsuku eziyi-50+ ukuya kusuku olusemva kweSabatha yesixhenxe, emva koko nizise kuYehova umnikelo omtsha weenkozo.+ 17 Kwiindawo enihlala kuzo nifanele nize nezonka ezibini eziza kuba ngumnikelo otshangatshangiswayo. Zifanele zenziwe ngezishumi ezibini ze-efa* yomgubo weflawa ocoliweyo. Zifanele zibhakwe zinegwele,+ njengesivuno sokuqala esiya kuYehova.+ 18 Ezo zonka nifanele nizizise kunye neenkunzi zamatakane egusha aphilileyo asixhenxe. Inkunzi yetakane nganye ifanele ibe nonyaka izelwe. Nifanele nizise nethole lenkomo eliyinkunzi elinye neenkunzi ezimbini zeegusha.+ Ziza kuba ngumnikelo otshiswayo oya kuYehova ohamba nomnikelo wokutya okuziinkozo nomnikelo oselwayo, zitshiswe njengomnikelo olivumba elimnandi* oya kuYehova. 19 Nimele ninikele netakane lebhokhwe libe linye njengomnikelo wesono,+ neenkunzi zamatakane egusha ezimbini, nganye ibe nonyaka izelwe, zibe ngumbingelelo wobuhlobo.+ 20 Umbingeleli uza kuzitshangatshangisa kunye nezonka zokuqala ezibhakiweyo, zibe ngumnikelo otshangatshangiswayo phambi koYehova, zona neenkunzi ezimbini zamatakane egusha. Zifanele zibe yinto engcwele kuYehova, zize zibe zezombingeleli.+ 21 Ngolu suku niza kwenza isaziso+ sokuba niza kuba nendibano engcwele. Animele nenze nawuphi na umsebenzi onzima. Lo ngumthetho oza kuhlala uhleli wazo zonke izizukulwana zenu, naphi na apho nihlala khona.

22 “‘Xa nivuna isivuno selizwe lenu, ningacokisi ukuvuna ekupheleni kwamasimi enu yaye ningacholacholi okuseleyo kwisivuno senu.+ Nifanele nishiyele ihlwempu*+ nomntu wasemzini.+ NdinguYehova uThixo wenu.’”

23 UYehova waqhubeka wathi kuMoses: 24 “Yithi kumaSirayeli, ‘Ngenyanga yesixhenxe, ngosuku lokuqala lwaloo nyanga, nifanele niphumle ngokupheleleyo, ibe sisikhumbuzo esiqala ngokuvuthelwa kwexilongo,+ indibano engcwele. 25 Animele nenze nawuphi na umsebenzi onzima, yaye nimele nizise kuYehova umnikelo otshiswa ngomlilo.’”

26 UYehova waqhubeka wathi kuMoses: 27 “Kodwa ke, usuku lweshumi kwakule nyanga yesixhenxe luza kuba luSuku Lokuhlawulela.+ Nifanele nibe nendibano engcwele, yaye nimele nizixhwalekise*+ yaye nizise kuYehova umnikelo otshiswa ngomlilo. 28 Animele nenze naluphi na uhlobo lomsebenzi ngolu suku kuba lusuku lokuhlawulela, ukuze nihlawulelwe+ kuYehova uThixo wenu. 29 Nabani na ongazixhwalekisiyo* ngolu suku uza kubulawa.+ 30 Ibe ndiza kumtshabalalisa kubantu bakowabo nabani na* owenza naluphi na uhlobo lomsebenzi ngolu suku. 31 Animele nenze naluphi na uhlobo lomsebenzi. Lo ngumthetho oza kuhlala uhleli wazo zonke izizukulwana zenu, naphi na apho nihlala khona. 32 Yisabatha eniza kuphumla ngokupheleleyo ngayo le, yaye niza kuzixhwalekisa*+ ngosuku lwesithoba lwaloo nyanga, ngokuhlwa. Nifanele niyigcine isabatha ukususela emva kokutshona kwelanga de liphinde litshone.”

33 UYehova waqhubeka wathi kuMoses: 34 “Yithi kumaSirayeli, ‘Ngosuku lwe-15 kule nyanga yesixhenxe liTheko Lamakhusi* leentsuku ezisixhenxe elenzelwa uYehova.+ 35 Ngosuku lokuqala kumele kubekho indibano engcwele, kwaye animele nenze nawuphi na umsebenzi onzima. 36 Kangangeentsuku ezisixhenxe nimele nizise kuYehova umnikelo otshiswa ngomlilo. Ngosuku lwesibhozo nifanele nibe nendibano engcwele,+ yaye nimele nizise kuYehova umnikelo otshiswa ngomlilo. Yindibano ekhethekileyo le. Animele nenze nawuphi na umsebenzi onzima.

37 “‘La ngamatheko kaYehova amaxesha amisiweyo+ enifanele niwachaze njengeendibano ezingcwele+ zokuzisa kuYehova umnikelo otshiswa ngomlilo: umnikelo otshiswayo,+ umnikelo wokutya okuziinkozo+ wombingelelo, neminikelo eselwayo+ ngokwamaxesha abekiweyo osuku. 38 Yongeza kwiminikelo eyenzelwa uYehova ngeesabatha,+ kwizipho,+ kwiminikelo yezifungo+ nakwiminikelo yokuzithandela,+ enifanele niyinike uYehova. 39 Kodwa ke, ngosuku lwe-15 kwinyanga yesixhenxe, xa niyiqokelele imveliso yelizwe, nifanele nenze itheko likaYehova iintsuku ezisixhenxe.+ Ngosuku lokuqala nangosuku lwesibhozo nifanele niphumle ngokupheleleyo.+ 40 Ngosuku lokuqala, niza kusebenzisa iziqhamo zemithi emikhulu, amagqabi emithi yesundu,+ namasebe emithi eshinyeneyo nemingcunube yasentlanjeni, yaye niza kuvuya+ phambi koYehova uThixo wenu iintsuku ­ezisixhenxe.+ 41 Eli theko niza kulenzela uYehova iintsuku ezisixhenxe ngonyaka.+ Lo ngumthetho oza kuhlala uhleli wazo zonke izizukulwana zenu, nifanele nilibhiyozele ngenyanga yesixhenxe. 42 Nifanele nihlale emakhusini* iintsuku ezisixhenxe.+ Yonke inzalelwane yamaSirayeli ifanele ihlale emakhusini,* 43 ukuze zazi izizukulwana zenu eziza kulandela+ ukuba amaSirayeli ndawahlalisa emakhusini* xa ndandiwakhupha elizweni laseYiputa.+ NdinguYehova uThixo wenu.’”

44 Ngoko uMoses wawaxelela amaSirayeli ngamatheko kaYehova amaxesha amisiweyo.

24 UYehova waphinda wathi kuMoses: 2 “Yalela amaSirayeli ukuba akuphathele ioli esulungekileyo yeminquma ecoliweyo, eyezibane, ukuze zihlale zikhanyisile izibane.+ 3 UAron ufanele alungiselele ukuba izibane eziphambi kwekhethini ekufutshane netyeya yesivumelwano zihlale zikhanyisile phambi koYehova, ukususela ngokuhlwa kude kube sekuseni. Lowo ngumthetho oza kuhlala uhleli kuzo zonke izizukulwana zenu. 4 Ufanele azimise kakuhle qho izibane esiphathweni sezibane+ segolide esulungekileyo phambi koYehova.

5 “Umele uthathe umgubo ocoliweyo, uwubhake ube ngamaqebengwana arawundi ayi-12. Iqebengwana ngalinye limele libe nezishumi ezibini ze-efa.* 6 Uza kuwabeka abe zizixa ezibini, isixa ngasinye sibe namaqebengwana amathandathu+ etafileni yegolide esulungekileyo phambi koYehova.+ 7 Umele ugalele intlaka yokuqhumisa esulungekileyo phezu kwesixa ngasinye. Eso ke sisonka esimela wonke umnikelo,*+ umnikelo otshiswa ngomlilo oya kuYehova. 8 Ngosuku ngalunye lweSabatha, umele asimise kakuhle qho phambi koYehova.+ Eso sisivumelwano sam namaSirayeli esiza kuhlala sihleli. 9 Eso sixa siza kuba sesika-Aron noonyana bakhe,+ yaye baza kusityela endaweni engcwele,+ kuba siyeyona nto ingcwele kuye evela kwiminikelo kaYehova etshiswa ngomlilo, ibe lowo iza kuba ngumthetho oza kuhlala uhleli.”

10 Phakathi kwamaSirayeli kwakukho unyana womfazi ongumSirayeli nendoda engumYiputa,+ waza lo nyana walwa nendoda engumSirayeli enkampini. 11 Lo nyana womfazi ongumSirayeli wathetha kakubi ngeGama,* walithuka.*+ Ngoko bamsa kuMoses.+ Kwathi kanti igama likamama wakhe nguShelomiti, intombi kaDibri wesizwe sakwaDan. 12 Bamvalela de sabacacela isigqibo sikaYehova ngento emayenziwe ngaye.+

13 Emva koko uYehova wathi kuMoses: 14 “Mkhupheleni ngaphandle kwenkampu lowo uthuke igama likaThixo, yaye bonke abo bamvileyo bamele babeke izandla phezu kwentloko yakhe, emva koko wonke umntu ambethe ngamatye.+ 15 Yaye ufanele uthi kumaSirayeli, ‘Ukuba nayiphi na indoda ithuka uThixo wayo, iza kuphendula ngesono sayo. 16 Umntu othetha kakubi ngegama likaYehova nakanjani makabulawe.+ Bonke abantu bafanele bambethe ngamatye. Umntu wasemzini nenzalelwane bamele babulawe ngokufanayo ngenxa yokuthetha kakubi ngeGama.

17 “‘Ukuba indoda ibulala umntu, ifanele nakanjani ibulawe.+ 18 Nabani na obetha aze abulale isilwanyana sasekhaya somnye umntu, ufanele ambuyekeze, ubomi ngobomi.* 19 Ukuba indoda yenzakalisa omnye umntu, loo nto iyenzileyo imele yenziwe nakuyo.+ 20 Ukwaphulwa ngokwaphulwa, ilihlo ngelihlo, izinyo ngezinyo. Indoda iza kwenzakaliswa kanye ngendlela eye yenzakalisa ngayo.+ 21 Indoda ebetha isilwanyana ize isibulale ifanele isibuyekeze,+ kodwa umntu obethe omnye umntu wambulala ufanele abulawe.+

22 “‘Masibe sinye isigwebo senu, enoba ngumntu wasemzini okanye yinzalelwane,+ kuba ndinguYehova uThixo wenu.’”

23 Emva koko uMoses wathetha namaSirayeli, amkhuphela ngaphandle kwenkampu loo mntu uthuke igama likaThixo, aza ambetha ngamatye.+ Ngaloo ndlela amaSirayeli enza kanye njengokuba uYehova wamyalelayo uMoses.

25 ENtabeni YaseSinayi uYehova waqhubeka wathi kuMoses: 2 “Yithi kumaSirayeli, ‘Xa nithe ekugqibeleni nafika kwilizwe endininika lona,+ nimele niliphumze ilizwe nize nibe nesabatha kuYehova.+ 3 Intsimi yakho uza kuyityala imbewu iminyaka emithandathu, uthene intsimi yakho yeediliya iminyaka emithandathu, uze uqokelele imveliso yelizwe.+ 4 Kodwa ngonyaka wesixhenxe, kufanele kubekho isabatha, ukuphumla okupheleleyo kwelizwe, isabatha kuYehova. Intsimi yakho ufanele ungayityali mbewu, nentsimi yakho yeediliya ungayitheni. 5 Umele ungasivuni isityalo esiye sazikhulela ngenxa yeenkozo eziye zasala xa bekuvunwa, neediliya zentsimi yakho engathenwanga uze ungaziqokeleli. Kufanele kubekho unyaka wokuphumla okupheleleyo kwelizwe. 6 Noko ke, ungakutya ukutya okuye kwavela elizweni xa bekuqhubeka isabatha, oko kutya kungatyiwa nguwe, ngamakhoboka namakhobokazana akho, ngumqeshwa wakho, abantu basemzini abahlala nawe, 7 nkqu nezilwanyana zakho zasekhaya nezilwanyana zasendle eziselizweni lakho zingatya. Yonke imveliso yelizwe ingatyiwa.

8 “‘Uza kubala iminyaka esixhenxe eziisabatha, iminyaka esixhenxe ephindwe kasixhenxe, zize iintsuku zaloo minyaka isixhenxe yeesabatha ziyokufikelela kwiminyaka eyi-49. 9 Emva koko, ngenyanga yesixhenxe ngosuku lweshumi enyangeni leyo, uza kuvuthela uphondo ngesandi esikhulu. Ngemini Yokuhlawulela,+ umele uluvuthele luvakale kulo lonke ilizwe lenu. 10 Nimele niwujonge unyaka we-50 njengongcwele kuThixo nize nazise bonke abahlali belizwe ukuba kukho inkululeko.+ Loo nyaka uza kuba nguNyaka Wenkululeko* kuni, yaye ngamnye uza kubuyela elifeni lakhe ibe ngamnye kuni ufanele abuyele kwintsapho yakhe.+ 11 Lo nyaka we-50 uza kuba nguNyaka Wenkululeko* kuni. Anizukutyala mbewu okanye nivune zityalo zizikhuleleyo ngenxa yembewu eye yasala yaye anizukuqokelela neediliya zamasimi eediliya angathenwanga.+ 12 Kuba lo nguNyaka ­Wenkululeko.* Ufanele ube ngcwele kuni. Ningatya kuphela izinto ezizikhulelayo.+

13 “‘Ngalo Nyaka Wenkululeko,* ngamnye kuni ufanele abuyele elifeni lakhe.+ 14 Ukuba uthengisela omnye umntu, okanye uthenga kuye, nize ningaqhathani.+ 15 Xa uthenga umhlaba komnye umntu, ufanele ubale iminyaka eye yadlula emva koNyaka Wenkululeko.* Yena ufanele alibeke ixabiso ngokweminyaka eshiyekileyo yokulima.+ 16 Ukuba kusashiyeke iminyaka emininzi, unokulinyusa ixabiso lawo, yaye ukuba kusele iminyaka embalwa, ufanele alihlise ixabiso lawo, kuba ukuthengisela izihlandlo oza kuvelisa ngazo izilimo. 17 Akukho mntu phakathi kwenu ufanele aqhathe omnye,+ yaye nifanele nimoyike uThixo wenu,+ kuba ndinguYehova uThixo wenu.+ 18 Xa niyenza imiyalelo yam nize nizigcine izigwebo zam, niza kuhlala nikhuselekile elizweni.+ 19 Ilizwe liza kuvelisa iziqhamo zalo,+ ibe niza kutya nihluthe nize nihlale kulo nikhuselekile.+

20 “‘Kodwa ukuba nithi: “Siza kutya ntoni ngonyaka wesixhenxe ukuba asimele sityale imbewu okanye siqokelele izilimo?”+ 21 Ndiza kuthumela intsikelelo yam ngonyaka wesithandathu, ibe umhlaba uza kuvelisa izilimo eziza kunithwala iminyaka emithathu.+ 22 Emva koko niza kuyityala imbewu ngonyaka wesibhozo, ibe niza kutya izilimo zexesha elidluleyo de kube ngunyaka wesithoba. Niza kutya izilimo zexesha elidluleyo zide zibe ziyafumaneka ezonyaka wesithoba.

23 “‘Umhlaba ungaze uthengiselwe umntu ube ngowakhe ngonaphakade,+ kuba umhlaba ngowam.+ Nina ningabantu basemzini nabahambi kum.+ 24 Wonke umhlaba olilifa lenu nifanele niwunike ilungelo lokuphinda uthengwe.

25 “‘Ukuba umntakwenu uye waba lihlwempu waza wathengisa inxalenye yelifa lakhe, umhlawuleli azalana naye ngokusondeleyo makeze aze ayithenge kwakhona loo nto ayithengisileyo umntakwabo.+ 26 Ukuba umntu akanamhlawuleli kodwa uba nezinto aze akwazi ukuphinda ayithenge, 27 loo mntu ufanele abale iminyaka eye yadlula ukususela oko walithengisayo ilifa, ukuze azi ixabiso lalo aze abuyisele imali eshiyekileyo kumntu alithengise kuye. Emva koko angabuyela elifeni lakhe.+

28 “‘Kodwa ukuba umntu akanandlela yakulithenga, ilifa awalithengisayo liza kuhlala likumntu owalithengayo de kufike uNyaka Wenkululeko.*+ Emva koko liza kubuyiselwa kuye ngoNyaka Wenkululeko* aze abuyele elifeni lakhe.+

29 “‘Ukuba umntu uthengise indlu esesixekweni esibiyelwe ngodonga, uza kuqhubeka kangangonyaka enalo ilungelo lokuphinda ayithenge ukususela ngexesha awayithengisa ngalo. Uza kuba nelungelo lokuphinda ayithenge+ kude kuphele unyaka. 30 Kodwa ukuba ayithengwanga kwakhona de waphela unyaka, loo ndlu isesixekweni esibiyelwe ngodonga iza kuqhubeka ililifa lomntu owayithengayo ngonaphakade kuzo zonke izizukulwana zakhe. Ayifanele ibuyiselwe ngoNyaka Wenkululeko.* 31 Kodwa izindlu ezikwiidolophana ezingabiyelwanga ngodonga zifanele zijongwe njengeziyinxalenye yentsimi yelizwe. Zifanele zihlale zinalo ilungelo lokuphinda zithengwe, yaye zifanele zibuyiselwe ngoNyaka Wenkululeko.*

32 “‘AbaLevi baza kuhlala benelungelo lokuphinda bazithenge izindlu zabo ezikwizixeko zabo.+ 33 Xa umLevi engaphindi ayithenge indlu yakhe eye yathengiswa kwisixeko sabo, iza kubuyiselwa ngoNyaka Wenkululeko,*+ kuba izindlu ezisezixekweni zabaLevi zililifa labo phakathi kwamaSirayeli.+ 34 Ngaphezu koko, umhlaba olidlelo+ ojikeleze izixeko zabo awunakuthengiswa, kuba ulilifa eliza kuhlala ilelabo.

35 “‘Ukuba umntakwenu ohlala kufutshane kuwe uba lihlwempu yaye akasakwazi ukuziphilisa, ufanele umhoye,+ kanye ngendlela ubuza kwenza ngayo kumntu wasemzini nomhambi.+ Loo nto iza kumgcina ephila. 36 Sukuthatha nzala kuye okanye wenze inzuzo ngaye.+ Umele umoyike uThixo wakho,+ ibe umntakwenu uza kuqhubeka ephila kunye nawe. 37 Umele ungayizalisi imali omboleke yona+ okanye ufune inzuzo ngokutya omnike kona. 38 NdinguYehova uThixo wenu, onikhuphe kwilizwe laseYiputa,+ ndaninika ilizwe laseKanan, ukuze nibone ukuba ndinguThixo wenu.+

39 “‘Ukuba umntakwenu ohlala kufutshane uba lihlwe­mpu kuze kufuneke azithengise kuwe,+ uze ungamnyanzeli ukuba asebenze njengekhoboka.+ 40 Ufanele aphathwe njengomqeshwa,+ njengomhambi. Ufanele akusebenzele de ibe nguNyaka Wenkululeko.* 41 Emva koko uza kukushiya, yena nabantwana* bakhe, abuyele kubantu bakowabo. Ufanele abuyele kwilifa lootatomkhulu bakhe.+ 42 Kuba bangamakhoboka am endiwakhuphe kwilizwe laseYiputa.+ Bafanele bangazithengisi ngendlela ekuthengiswa ngayo ikhoboka. 43 Uze ungamphathi kabuhlungu,+ yaye umele umoyike uThixo wakho.+ 44 Ikhoboka nekhobokazana lakho malivele kwiintlanga ezikufutshane nani. Ningalithenga kuzo ikhoboka nekhobokazana. 45 Kwakhona ningawathenga amakhoboka kubantu basemzini abahlala nani,+ nakwiintsapho zabo ezikunye nani yaye aza kuba lilifa lenu. 46 Ningawadlulisela koonyana benu ukuze ahlale elilifa labo. Ningawasebenzisa njengabasebenzi benu, kodwa abazalwana benu abangamaSirayeli nimele ningabaphathi kabuhlungu.+

47 “‘Kodwa ukuba umntu wasemzini okanye umhambi okunye nani uye wasisityebi waza umntakwenu ongumSirayeli walihlwempu, aze azithengise kumntu wasemzini okanye kumhambi osekuhlaleni, okanye kwilungu lentsapho lomntu wasemzini, 48 uza kuhlala enalo ilungelo lokuphinda athengwe nasemva kokuba ezithengisile. Omnye wabantakwabo unokumthenga,+ 49 okanye umntakwabotata wakhe, okanye unyana womntakwabotata wakhe, okanye nasiphi na isizalwana sakhe esisondeleyo,* nawuphi na umntu kubantu bakowabo, angamthenga kwakhona.

“‘Okanye ukuba uye wasisityebi, angazithenga ngokwakhe.+ 50 Ufanele abale kunye nom­thengi lowo, basusele kunyaka wokuzithengisa kwakhe bayokutsho kuNyaka Wenkululeko,*+ imali yokuzithengisa kwakhe iza kulingana nenani laloo minyaka.+ Iintsuku zokusebenza kwakhe ziza kujongwa ngokufanayo nezomntu oqeshiweyo.+ 51 Ukuba isemininzi iminyaka, ufanele abhatale imali elingana naloo minyaka ishiyekileyo. 52 Kodwa ukuba kushiyeke iminyaka embalwa ngaphambi kokuba kufike uNyaka Wenkululeko,* ufanele azibalele aze azibhatalele ngokweminyaka eshiyekileyo. 53 Ufanele aqhubeke engumsebenzi oqeshiweyo unyaka nonyaka, yaye ufanele uqiniseke ukuba akamphathi kabuhlungu.+ 54 Kodwa, ukuba akakwazi ukuzithenga kwakhona ngezi ndlela, uza kukhululeka ngoNyaka Wenkululeko,*+ yena nabantwana* bakhe abakunye naye.

55 “‘Kaloku amaSirayeli ngamakhoboka am. Angamakhoboka am endiye ndawakhupha kwilizwe laseYiputa.+ NdinguYehova uThixo wenu.

26 “‘Nize ningazenzeli oothixo abangenaxabiso,+ yaye ningazimiseli umfanekiso oqingqiweyo+ okanye nizenzele intsika engcwele, yaye ningabeki litye+ elizweni lenu ngenjongo yokuqubuda kulo,+ kuba ndinguYehova uThixo wenu. 2 Nimele nizigcine iisabatha zam, yaye niyihlonele indawo* yam engcwele. NdinguYehova.

3 “‘Ukuba niyaqhubeka niphila ngemiyalelo yam nize nithobele imithetho yam, niyenze,+ 4 ndiza kuninisela imvula eninzi ngexesha elifanelekileyo,+ lize ilizwe libe nemveliso,+ nemithi yentsimi ivelise iziqhamo zayo. 5 Niza kubhula kude kufike ixesha lokuba nivune iidiliya, nexesha lokuvuna iidiliya liza kuqhubeka de kube lixesha lokutyala, yaye niza kutya isonka senu nide nanele nize nihlale nikhuselekile elizweni lenu.+ 6 Ndiza kuzisa uxolo elizweni,+ niza kulala kungekho mntu unoyikisayo,+ ndize ndiwaphelise amarhamncwa enzakalisayo elizweni, yaye akukho mntu uza kulwa nani ngekrele elizweni lenu. 7 Nakanjani niza kuzileqa iintshaba zenu, nizoyise ngekrele. 8 Abahlanu kuni baza kuleqa abayi-100, abayi-100 baleqe abayi-10 000, nizoyise ngekrele iintshaba zenu.+

9 “‘Ndiza kunisikelela,* ndinenze niqhame, ndize ndinandise,+ ibe ndiza kusigcina isivumelwano endisenze nani.+ 10 Kuza kuthi kusekho isivuno sonyaka ophelileyo, kufuneke nisilahle ukuze nifake esitsha. 11 Ndiza kubeka intente yam engcwele phakathi kwenu,+ ibe andizukunilahla. 12 Ndiza kuba nani, ndibe nguThixo wenu,+ yaye nina niza kuba ngabantu bam.+ 13 NdinguYehova uThixo wenu, owanikhupha elizweni laseYiputa, ukuze niyeke ukuba ngamakhoboka awo, ndazaphula iidyokhwe zenu ndaza ndanenza abantu abahamba beziphakamisile iintloko zabo.*

14 “‘Kodwa, ukuba anizukundimamela okanye anizukuyithobela yonke le mithetho,+ 15 yaye ukuba niyayilahla* imiyalelo yam,+ ibe niyazenyanya izigwebo zam ukuze ningayithobeli yonke imiyalelo yam, nize nisaphule nesivumelwano sam,+ 16 nazi izinto endiza kuzenza kuni: ndiza kunohlwaya ngokunibangela intlungu, ngokunenza nibe nesifo sephepha nomkhuhlane otshisayo, amehlo angaboni kakuhle nize niphelelwe ngamandla. Akuzukuninceda nganto ukutyala imbewu, kuba iza kutyiwa ziintshaba zenu.+ 17 Ndiza kunichasa, yaye niza koyiswa ziintshaba zenu.+ Abo banizondayo baza kuninyathela,+ nibaleke kungekho mntu unileqayo.+

18 “‘Ukuba ezi zinto azinenzi nindimamele, ndiza kunibetha kasixhenxe kunakuqala ngenxa yezono zenu. 19 Ndiza kuliphelisa ikratshi nenkani yenu, izulu lenu ndilenze libe njengentsimbi+ nomhlaba wenu ube njengekopolo. 20 Niza kuwaqobela ilize amandla enu, kuba umhlaba wenu awuzukuninika imveliso yawo,+ nemithi yelizwe ayizukuninika ziqhamo.

21 “‘Kodwa ukuba aniyeki ukundichasa nize ningandimameli, ndiza kuphinda ndinibethe kasixhenxe ngokwezono zenu. 22 Ndiza kuthumela izilwanyana zasendle kuni,+ yaye ziza koxutha abantwana benu,+ ziqwenge nezilwanyana zenu zasekhaya zize zinciphise inani lenu, neendlela zenu zingahanjwa mntu.+

23 “‘Ukuba nasemva kwezi zinto anivumi ukulungiswa ndim,+ ibe aniyeki ukundichasa, 24 nam ndiza kunichasa, yaye mna lo ndiza kunibetha kasixhenxe ngenxa yezono zenu. 25 Ndiza kuphindisa ngekrele ngenxa yokwaphula kwenu isivumelwano.+ Ukuba nibalekela ezixekweni zenu, ndiza kuthumela izifo kuni,+ yaye niza kunikelwa esandleni sotshaba.+ 26 Xa ndisenza singafumaneki kuni isonka,*+ abafazi abalishumi baza kusibhaka isonka senu eontini enye baze basabe eso sonka,+ yaye niza kutya kodwa ninganeli.+

27 “‘Ukuba sekunjalo anindimameli yaye aniyeki ukundichasa, 28 ndiza kuqinisa apha ekunichaseni,+ ndize ndinibethe kasixhenxe ngenxa yezono zenu. 29 Kuza kufuneka nitye inyama yoonyana benu, nitye nenyama yeentombi zenu.+ 30 Ndiza kuzitshabalalisa iindawo zenu eziphakamileyo ezingcwele,+ ndizichithe iindawo zenu zokubeka isiqhumiso esiqholiweyo ndize ndifumbe izidumbu zenu phezu kwezithixo zenu ezingaphiliyo nezenyanyekayo,*+ yaye ndiza kuninikela umva ndinenyanye.+ 31 Izixeko zenu ndiza kuzinikela ekreleni+ ndize ndiziphanzise iingcwele zenu, ndingaweva namavumba amnandi* emibingelelo yenu. 32 Mna ngokwam ndiza kulenza liphanze ilizwe,+ neentshaba zenu eziza kuhlala kulo ziza kulijonga zimangale.+ 33 Ndiza kunichitha-chitha ezintlangeni,+ ndinileqe ngekrele,+ liphanziswe ilizwe lenu,+ nezixeko zenu zitshatyalaliswe.

34 “‘Ngelo xesha ilizwe liza kubuyekeza iisabatha zalo ngayo yonke imihla yokuphanza kwalo, ngoxa nina niza kube niselizweni leentshaba zenu. Ngelo xesha ilizwe liza kuphumla,* kuba limele libuyekeze iisabatha zalo.+ 35 Liza kuphumla ngayo yonke imihla yokuphanza ­kwalo, kuba liza kube lingazange liphumle ebudeni beesabatha zenu ngoxa nanihlala kulo.

36 “‘Abo bashiyekileyo kuni,+ ndiza kubenza boyike kumazwe eentshaba zabo, baza kubalekiswa kukurhashaza kwegqabi eliphetshethwayo, yaye baza kubaleka ngathi babaleka ikrele, bawe kungekho mntu ubaleqayo.+ 37 Ngamnye uza kukhubeka komnye ngokungathi ngabantu ababaleka ikrele, kube kungekho mntu ubaleqayo. Anizukukwazi ukumelana neentshaba zenu.+ 38 Niza kutshabalala phakathi kweentlanga,+ ibe liza kunigqiba ilizwe leentshaba zenu. 39 Abashiyekileyo kuni baza kushiywa baze babolele emazweni eentshaba zenu+ ngenxa yesono senu. Baza kubola nyhani ngenxa yezono zootata babo.+ 40 Emva koko baza kusivuma isono+ nokungathembeki kwabo, nesono sootata babo nokungathembeki kwabo kum, baze bavume ukuba baye abathembeka kum ngokundichasa kwabo.+ 41 Kuza kufuneka nam ndibachase+ ngokubazisa elizweni leentshaba zabo.+

“‘Mhlawumbi xa kunjalo iintliziyo zabo ezinenkani ziza kutsho zithambe,+ baze bahlawule ngenxa yesono sabo. 42 Ndiza kusikhumbula isivumelwano sam noYakobi,+ nesivumelwano sam noIsake,+ ndiza kusikhumbula nesivumelwano sam noAbraham,+ nelizwe ndiza kulikhumbula. 43 Ilizwe lashiyeka lihlawula iisabatha zalo ngoxa balishiyayo,+ lashiyeka lingenabantu, ngoxa babehlawulela isono sabo, kuba bayilahla* imithetho yam, baza bayenyanya.+ 44 Sekunjalo, andisoze ndibalahle ngokupheleleyo+ okanye ndibenyanye de ndibatshabalalise, nto leyo ibinokwaphula isivumelwano sam+ nabo, kuba ndinguYehova uThixo wabo. 45 Ngenxa yabo ndiza kusikhumbula isivumelwano endasenza nookhokho babo+ endabakhupha kwilizwe laseYiputa, iintlanga zijongile,+ ukuze ndizibonakalise ukuba ndinguThixo wabo. NdinguYehova.’”

46 Le yimiyalelo, izigwebo nemithetho eyabekwa nguYehova phakathi kwakhe namaSirayeli, ngoMoses, eNtabeni YaseSinayi.+

27 UYehova waqhubeka wathi kuMoses: 2 “Yithi kumaSirayeli, ‘Ukuba umntu wenza isifungo esikhethekileyo+ sokunikela kuYehova ngemali elingana nexabiso lomntu* elibekiweyo, 3 ixabiso elibekiweyo lendoda esusela kwiminyaka eyi-20 ukuya kweyi-60, liza kuba ziishekele* eziyi-50 zesilivere ngokweshekele yendawo engcwele.* 4 Kodwa ukuba libhinqa, ixabiso elibekiweyo liza kuba ziishekele eziyi-30. 5 Ukuba iminyaka yaloo mntu isusela kweyi-5 ukuya kweyi-20, ixabiso elibekiweyo loyindoda liza kuba ziishekele eziyi-20, lize elebhinqa libe ziishekele eziyi-10. 6 Ukuba loo mntu ususela kwinyanga enye ukuya kwiminyaka emihlanu, ixabiso elibekiweyo loyinkwenkwana liza kuba ziishekele ezintlanu zesilivere lize elentombazana libe ziishekele ezintathu zesilivere.

7 “‘Ukuba iminyaka yakhe iyi-60 nangaphezulu, ixabiso elibekiweyo loyindoda liza kuba ziishekele eziyi-15, lize elebhinqa libe ziishekele eziyi-10. 8 Kodwa ukuba lowo wenza isifungo uhlwempuzeke kakhulu ukuba angalifikelela ixabiso elibekiweyo,+ umntu ekunikelwa ngaye uza kumiswa phambi kombingeleli, yaye umbingeleli uza kubeka ixabiso lakhe. Umbingeleli uza kubeka ixabiso anokulifikelela+ lowo wenza isifungo.

9 “‘Ukuba isifungo sibandakanya isilwanyana ekunokunikelwa ngaso kuYehova, nantoni na ekunokunikelwa ngayo kuYehova iza kuba yinto engcwele. 10 Akanakuzisa esinye endaweni yaso okanye atshintshe esilungileyo ngesingalunganga okanye esingalunganga ngesilungileyo. Kodwa ukuba uzisa isilwanyana endaweni yesinye, zombini ezo zilwanyana, esokuqala neso atshintshise ngaso, ziza kuba ngcwele. 11 Ukuba sisilwanyana esingacocekanga+ nekungenakunikelwa ngaso kuYehova, uza kusimisa phambi kombingeleli. 12 Umbingeleli uza kubeka ixabiso laso, ngokomgangatho waso.* Ixabiso elibekwe ngumbingeleli liza kuma. 13 Kodwa ukuba ufuna ukuphinda asithenge, umele ongeze isihlanu kwixabiso laso elibekiweyo.+

14 “‘Ukuba umntu unikela ngendlu yakhe kuYehova njengento engcwele, umbingeleli uza kubeka ixabiso layo, ngokomgangatho wayo.* Loo ndlu iza kubiza elo xabiso libekwe ngumbingeleli.+ 15 Kodwa ukuba lowo unikela ngendlu yakhe ufuna ukuphinda ayithenge, umele ongeze isihlanu kwixabiso layo elibekiweyo, ize emva koko ibe yeyakhe.

16 “‘Ukuba umntu unikela ngomhlaba wakhe kuYehova njengento engcwele, ixabiso lawo liza kulinganiselwa ngokwembewu eza kutyalwa kuwo: ihomere* yembewu yerhasi iza kuba ziishekele eziyi-50 zesilivere. 17 Ukuba unikela ngentsimi yakhe ngoNyaka Wenkululeko,*+ ixabiso elibekiweyo liza kuma. 18 Ukuba unikela ngomhlaba wakhe emva koNyaka Wenkululeko,* umbingeleli uza kumbalela ixabiso lawo ngokweminyaka eshiyekileyo ukuya kuNyaka Wenkululeko* olandelayo, kuze kuphungulwe kwixabiso elibekiweyo.+ 19 Kodwa ukuba lowo unikele ngomhlaba uye waphinda wawuthenga, umele ongeze isihlanu kwixabiso lawo elibekiweyo, uze loo mhlaba uhlale ungowakhe. 20 Ukuba akaphindi awuthenge umhlaba uze uthengiselwe omnye umntu, awunakuba sathengwa kwakhona. 21 Xa umhlaba ukhululwa ngoNyaka Wenkululeko,* uza kuba yinto engcwele kuYehova, kuba ungumhlaba onikelwe kuye. Uza kuba ngowababingeleli.+

22 “‘Ukuba umntu unikela kuYehova umhlaba awuthengileyo, ongeyonxalenye yelifa lakhe,+ 23 umbingeleli uza kumbalela ixabiso lawo ukuya kuNyaka Wenkululeko,* yaye uza kulibhatala ngolo suku elo xabiso libekiweyo.+ Liyinto engcwele kuYehova. 24 NgoNyaka Wenkululeko,* umhlaba uza kubuyela kulowo awuthenge kuye, lowo ungowakhe.+

25 “‘Onke amaxabiso mawabekwe ngokweshekele yendawo engcwele. Ishekele imele ibe ziigera* eziyi-20.

26 “‘Kodwa ke, akukho mntu umele anikele ngezibulo lesilwanyana, kuba lizalwa lilelikaYehova.+ Sele ilelikaYehova kakade, enoba liyinkunzi yenkomo okanye yegusha.+ 27 Ukuba lelesilwanyana esingacocekanga yaye ulikhulula ngexabiso elibekiweyo, umele ongeze isihlanu kwelo xabiso.+ Kodwa ukuba aliphindanga lathengwa, liza kuthengiswa ngexabiso elibekiweyo.

28 “‘Kodwa akukho nanye into umntu ayithathe ezintweni zakhe waza wayinikela kuYehova ngokupheleleyo,* emele ithengiswe okanye iphinde ithengwe, nokuba ngumntu okanye sisilwanyana okanye ngumhlaba wakhe. Yonke into enikelweyo iyeyona nto ingcwele kuYehova.+ 29 Akukho namnye umntu ogcinelwe intshabalalo omele aphinde athengwe.+ Ufanele nakanjani abulawe.+

30 “‘Sishumi ngasinye+ somhlaba, enoba sesemveliso yomhlaba okanye seseziqhamo zo­mthi, sesikaYehova. Siyinto engcwele kuYehova. 31 Ukuba umntu ufuna ukuphinda asithenge isishumi sakhe, ufanele ongeze isihlanu kwixabiso laso. 32 Isilwanyana seshumi ngasinye kumhlambi weenkomo, oweegusha noweebhokhwe, esidlula phantsi kwentonga yomalusi, siza kuba yinto engcwele kuYehova. 33 Akamele ahlole ukuba umgangatho waso mhle okanye mbi na, yaye angasitshintshi afake esinye. Kodwa ukuba uye wasitshintsha wafaka esinye, zombini ezo zilwanyana, esokuqala neso asifake endaweni yaso, ziza kuba yinto engcwele.+ Azimele ziphinde zithengwe.’”

34 Yiyo leyo imiyalelo uYehova awayinika uMoses eNtabeni YaseSinayi+ ukuba ayinike amaSirayeli.