Banombulelo NgoVukani!

ABAFUNDI abangakumbi nangakumbi beli phephancwadi banombulelo ngokhanyiselo abalufumanayo kwimibandela emininzi. KwiFransi esemazantsi enye indoda nomfazi wayo abangamaNgqina kaYehova bafumana le leta ilandelayo eyayivela kwindoda ababeyishiyele umbhalo kaVukani!

“Mhlekazi nawe Nkosikazi endibathandayo:

“Ndazi kakuhle ukuba uThixo unezinye izinto azenzayo kunokukholiswa ziindlela zethu ezincinane nezingaqhelekanga zokubona ukungenelela kwakhe kwimeko nganye enokwenzeka. Nangona ndingayixhasi le ngcamango, ndeyisekile kukuba ukufika kwenu kanye njengokuba ndandiphuma endlwini kwakungaphezulu kunokudibana nje. Ndandinexesha nje lokwamkela inkupho ka-Agasti 8, 1990, kaVukani! Hayi indlela endandiya kuphoxeka ngayo ukuba yayindiphosile!

“Inkcazelo enobulumko kumanqaku alandelelanayo athi ‘Ulawulo Lomntu Lulinganisiwe Esikalini’ yandibangela umdla yaye yandimangalisa ngenene. Ndiyixhasa ngamandla indlela loo manqaku alandelelanayo abhalwe ngayo . . . Ngoko ke, ndicela ukuba nilungiselele ukuba ndifumane iinkupho ezilandelayo zikaVukani! Andingethandi ukuphoswa nayenye kwezi nkupho zilandelelanayo.”

AmaNgqina kaYehova ayintlangano yezizwe ngezizwe yabafundi beBhayibhile abangaphezu kwezigidi ezine abazinikele ekuncedeni abantu bafunde okungakumbi ngehlabathi elibangqongileyo nangeLizwi likaThixo nangenzaliseko yalo. Ukuba ungayivuyela inkcazelo engakumbi okanye isifundo seBhayibhile sekhaya sesisa, nceda ubhalele kwiWatch Tower, Private Bag X2067, Krugersdorp, 1740, okanye kwikhelingi efanelekileyo kwezidweliswe kwiphepha 5.