Ngaba Iinkonzo Zehlabathi Zisondele Ekupheleni?
NGUMBHALELI KAVUKANI! ESWEDEN
NGABA lo mxholo ukwenza uzibuze ukuba: ‘Kunokwenzeka njani oko? Ngaba iinkonzo zehlabathi azomelelanga gqitha yaye ngaba aziliphembelelanga lonke ihlabathi lanamhlanje?’
Ewe, phezu kwawo nje amanzithi-nzithi, zibonakala zinempembelelo. Kule nkulungwane yama-20, iinkonzo ziye zathandatyuzwa zaza zabhencwa ngendlela engazange ibonwe ngaphambili kwimbali yoluntu. Izazi ngeenkwenkwezi ziye zasinga-singa indalo iphela ngeeteleskopu zazo yaye oosomajukujuku baye baxananaza esibhakabhakeni; yaye njengokuba usomajukujuku waseSoviet esitsho, “ababonanga Thixo okanye zingelosi.” Izazi ngendalo ziye zenza olwazo uphando ngokukhangela izinto eziphilayo zazenza zangamasuntswana amancinane kodwa azibufumananga ubungqina obungokobuthixo obubonisa ngokuqalisa kobomi. Izazi ngebhayoloji nezazi ngezilwanyana zamandulo ngokuxhasa indaleko, ezibanga ukuba ubomi buyilwa ngokutsha ngamabonandenzile, baqala ngendaleko ukususela ekubeni yiamoeba baza baba ngumntu, kuwo onke loo matile-tile azo azifumanga nobuncinane ubungqina bokungenelela komyili kolo ludwe.
Noko ke, ubulumko behlabathi nengcamango yokuthanda izinto eziphathekayo ziye zasilela ukuphelisa iimvakalelo ezingokonqulo, ukususela kwesi sijikelezi-langa, yaye igunya lezobupolitika elingakholelwayo kubukho bukaThixo neentanda-bulumko zitsho phantsi. Ngaphezu kweminyaka engama-70, ulawulo lobuzwilakhe, ubuKomanisi obungakholelwayo kubukho bukaThixo olwaluziphathele igqudu iinkonzo lusithi ziinkolo nje yaye “sisiyobisi sabantu,” lwaye lwazirhoxisa iinkokeli zeenkonzo ezaziphethe kwizikhundla zazo laza lavala imisebenzi yazo, latshabalalisa okanye laphanga iicawa neetempile yaye luye lwamfamekisa iingqiqo laza labulala nabanquli bazo. Sekunjalo, alukwazanga ukuyishenxisa imvakalelo yokunqula. Ngokukhawuleza nje bakubhukuqwa abo rhulumente, zavuka phantsi iinkonzo ngokungathi zihlaziywe ngamandla. Kumazwe awayefudula ephantsi kobuKomanisi, abantu kwakhona bagxalathelana kwiitempile zabo zamhlamnene, baguqe bazinikele ekukhonzeni njengoko babesenza okhokho babo ntlandlolo.
Iimvakalelo zonqulo ziseshushu nakwezinye iindawo zehlabathi. Nyaka ngamnye isixeko saseMecca, eSaudi Arabia, samkela inyambalala yezigidi zamaSilamsi ahambel’ unqulo kulo lonke ihlabathi. ISt. Peter’s Square ekwiVatican isoloko izele imi ngeembambo ngamakholwa angamaKatolika afuna ukumthi tshe nje upopu ngethemba lokuba uza kuwasikelela. Izigidi zabazinikele kubuHindu zisaqhubeka zingumsinga ukuya kumakhulu-khulu eendawo zokunqula kumanxweme emilambo “engcwele” yaseIndiya. AmaYuda anentlonelo aba yinkungu nelanga ukuya kuthandaza kuDonga Olungcwele lwaseYerusalem aze ashiye imithandazo yawo ebhaliweyo kwiintanda zolo donga.
Ewe, kubonakala kungenakwenzeka ukuphelisa imvakalelo yonqulo kuluntu. “Umntu sisidalwa esidalelwe ukunqula,” yatsho njalo indwalutho yaseburhulumenteni uEdmund Burke enkaba yayo iseIreland. Ngokwamanani aqikelelwayo, ngabantu aba-5 kwaba-6 emhlabeni abanokunxulunyaniswa nonqulo oluthile. Ngokwamanani akutshanje, bamalunga nama-4700 ezigidi ababambeleleyo kwiinkonzo ezimileyo ehlabathini, ngoxa kukho abangaphezu nje kwewaka lesigidi labantu abangakhonziyo nabangabukholelwayo ubukho bukaThixo.a
Ngenxa yale mbono, ngaba kusengqiqweni ukukholelwa ukuba iinkonzo zehlabathi zisondele ekupheleni? Yaye ukuba oku kunjalo, ziza kuphela nini yaye njani? Ngaba zikho iinkonzo eziya kusala? Masiqwalasele le mibuzo kula manqaku mabini alandelayo.
[Umbhalo osemazantsi]
a “Abangakhonziyo” baquka: “Abantu abathi abakhonzi, abangakholwayo, abathi uThixo akanakwaziwa, abaluthandabuzayo unqulo, abangalufuniyo yaye beluchasa naluphi na uhlobo lonqulo.”
[Umfanekiso okwiphepha 3]
ISt. Peter’s Square, eVatican City