Ukufuna Elona Gcisa Libalaseleyo

Lowo yayingumbandela owawuxutyushwa kuVukani! kaNovemba 8, 1995. Lo mbandela wathandwa gqitha ngabafundi ehlabathini lonke.

UAmang wabhala oku eseDouala, eCameroon: “La manqaku andichukumisa gqitha ngenxa yokuba ndiyabuthanda ubugcisa, ingakumbi imizobo eyenziwe kakuhle. Ngoku ndiyaqonda ukuba kukho iGcisa elingaphezu kukaVan Gogh, uRembrandt, uDa Vinci nabanye—lowo nguYehova uThixo.”

EseSt. Barthélemy, kwiiFrench West Indies, uFrederick wathi: “Ndayifunda izihlandlo ezine, yaye sihlandlo ngasinye ndazaliswa ngumbulelo ngezinto ezintle esizinikwe nguMdali wethu.”

UAssunta wabhala oku eseItali: “Aye avuselela kum umnqweno wokuzoba. Alwenze nzulu ulangazelelo endinalo ngehlabathi elitsha likaThixo.” Yaye uIrena, okwiRiphabliki yaseCzech, wathi: “Xa sityelela iimyuziyam, kufuneka sihlawule ukuze sibone imisebenzi yobugcisa, logama uMdali wabo bonke ubuhle bendalo esibonisa simahla suku ngalunye.” UAline wabhala oku eseBrazil: “Nangona sisoloko sifumana amanqaku asinceda sibuxabise ubuntu bukaYehova, la andichukumisa intliziyo. Anikela iinkcukacha ezininzi ngendalo ezikhulisa uxabiso lwethu ngothando lukaYehova.”

Ekwingqele yasebusika eWisconsin, eUnited States, uAnne wabhala: “Andincede ngokwenene ndabuxabisa ubuhle bendalo. Maxa wambi ebusika kunzima ukubufumana. Ngosuku endafunda ngalo eli nqaku, ndaphuma phandle ndaza ndabona iqabaka esebeni, ndabona igqabi ligqunywe likhephu, nemizila yesilwanyana kwikhephu. Ndiyabulela kwakhona ngokukhunjuzwa ngendlela esinokubonisa ngayo uxabiso ‘Ngelona Gcisa Libalaseleyo.’”

Ukuba ungathanda ukufumana inkcazelo engakumbi ngendlela yokufumana rhoqo eli phephancwadi, nceda uqhagamshelane namaNgqina kaYehova aselumelwaneni okanye ubhalele kwikhelingi ekufuphi kuwe kwezidweliswe kwiphepha 5.