Isiqhamo Esilubhelu SaseArmenia
● Sekudlule amawaka eminyaka eAsiya naseYurophu kuvunwa iApilkosi. Abantu baseYurophu babekholelwa ukuba ialpilkosi ivela eArmenia baza ke bayibiza ngokuba liapile laseAmernia.
Namhlanje, zimalunga nama-50 iintlobo zeapilkosi ezilinywa eArmenia. Zivunwa phakathi kuJuni ukusa ekupheleni kuka-Agasti. Ngenxa yomhlaba ochumileyo emva kwentaba-mlilo nokukhanya kwelanga eArmenia, iiapilkosi zalapho ziba switi ngendlela engaqhelekanga kangangokuba abaninzi bathi zezona zigqwesileyo ehlabathini.
Eziqhelekileyo zidla ngokulingana neplam encinane yaye ziyahluka ngombala ukususela kwezithande ukuba lubhelu ukusa kweziorenji. Zigudile yaye zibuqinarha, azinamanzi kangako, yaye zinokuba switi okanye zithande ukuba muncwana. Abanye bathi incasa yezo zithandwayo ibupesika buplam.
Abalimi beapilkosi baye bavelisa iapilkosi “emnyama,” kodwa asiyoapilkosi ngokwenene. Bavelise umxube weapilkosi neplam. Inombala omfusa—othande ukuba bumnyama—inoboyana yaye imthubi ngaphakathi. Esi siqhamo sibizwa ngeendlela ezahlukeneyo kuthiwa yipluot, iplumcot, okanye iaprium.
Imithi yeapilkosi idubula ngaphambi kokuba kuhlume amagqabi, ikhuphe ivumba elimnandi nentyatyambo ezimhlophe. Ezi ntyatyambo ziyafana nezomthi wepesika, iplam necherry. Le mithi ikhula bhetele kwiindawo ezinobusika obubandayo nehlobo elishushu, ukuze ivelise iintyatyambo neziqhamo. Injalo kanye ke imozulu yaseArmenia!
Iapilkosi ezisandul’ ukuvunwa zineengenelo ezininzi kwimpilo. Ngokomzekelo, siyifumana kuzo ibeta-carotene nevithamini C. Abaninzi baqhele ukuzifumana ziqwayitiwe. Kungenxa yokuba ezisandul’ ukuvunwa zityumka zize zonakale lula. Ngenxa yoko, kwezinye iindawo, iiapilkosi eziqwayitiweyo zezona zixhaphakileyo kunezo zisandul’ ukuvunwa. Okuvuyisayo kukuba, nezo ziqwayitiweyo zinesondlo yaye zisinika ifiber neiron. Ukongezelela, kwenziwa ngazo igrangqa, ijam nesiselo.
Enye into, imikrolo emihle yenziwa ngomthi weapilkosi, njengeduduk, isixhobo sokucula esithandwayo eArmenia, maxa wambi kuthiwe ngumbhobho weapilkosi. Kwiivenkile neemarike zaseYerevan, ikomkhulu laseArmenia, abakhenkethi banokufumana izinto ezintle ezenziwe ngemithi yeapilkosi.
Ukuba uhlala kwilizwe efumanekayo kulo iapilkosi esandul’ ukuvunwa kutheni ungakhe uzivise nje. Uya kusithanda nakanjani esi siqhamo silubhelu.