Ukuphindaphinda Ukuze Ugxininise

UKUFUNDISA ngempumelelo kubandakanya ukuphindaphinda. Xa ingongoma ebalulekileyo iphindwa kaliqela, abaphulaphuli baya kutyekela ngakumbi ekuyikhumbuleni. Xa loo ngcamango iphindwa ngendlela eyahluke kancinane, inokude ibacacele nangakumbi.

Ukuba abaphulaphuli bakho abayikhumbuli into oyithethayo, loo nto uyithethayo ayiyi kuyichaphazela into abayikholelwayo okanye indlela abaphila ngayo. Mhlawumbi baya kuqhubeka becinga ngeengongoma ozigxininisa ngokukhethekileyo.

UYehova, uMyaleli wethu Ozukileyo, usimisela umzekelo wokuphindaphinda. Wanika uhlanga lwakwaSirayeli iMithetho Elishumi. Esebenzisa isithethi esiyingelosi, wayidlulisela le mithetho kolo hlanga kwiNtaba yeSinayi. Kamva wayinika uMoses ibhaliwe. (Eks. 20:1-17; 31:18; Dut. 5:22) Esalathiswa nguYehova, uMoses wayiphinda le mithetho kolu hlanga ngaphambi kokuba lungene kwiLizwe Lesithembiso, yaye eqhutywa ngumoya oyingcwele, uMoses wayibhala loo ngxelo, efumaneka kwiDuteronomi 5:6-21. Phakathi kwemithetho eyanikwa uSirayeli kwakukho othi kufuneka amthande aze amkhonze uYehova ngentliziyo, ngomphefumlo nangamandla akhe ephela. Nawo lo waphindaphindwa kangangezihlandlo eziliqela. (Dut. 6:5; 10:12; 11:13; 30:6) Ngoba? Kuba, njengoko uYesu watshoyo, ‘wawungowona myalelo mkhulu nowokuqala.’ (Mat. 22:34-38) Esebenzisa umprofeti uYeremiya, uYehova wakhumbuza abantu bakwaYuda kangangezihlandlo ezingaphezu kwama-20 ngokubaluleka kokumthobela kuzo zonke izinto awayebayalela ngazo. (Yer. 7:23; 11:4; 12:17; 19:15) Yaye ngoHezekile, uThixo wayiphindaphinda kangangezihlandlo ezingaphezu kwama-60 into yokuba iintlanga ‘ziya kwazi ukuba ndinguYehova.’—Hez. 6:10; 38:23.

Nakwingxelo engobulungiseleli bukaYesu, siphawula ukuphindaphindwa kwamagama ngendlela ephumelelayo. Ngokomzekelo, kukho iincwadi zeVangeli ezine—nganye egubungela iziganeko eziphinde zibaliswe kwenye okanye kwezinye iincwadi zeVangeli kodwa zibaliswa ngabantu abaneembono ezahlukileyo. Kwimfundiso yakhe, uYesu wagubungela ingongoma esisiseko enye kangangezihlandlo ezingaphezu kwesinye yaye eyigubungela ngeendlela ezahlukileyo. (Marko 9:34-37; 10:35-45; Yoh. 13:2-17) Yaye xa wayekwiNtaba yeMinquma kwiintsuku ezimbalwa ngaphambi kokufa kwakhe, uYesu waphindaphinda ukuze agxininise esi siluleko sibalulekileyo: “Hlalani nilindile, ngenxa yokuba aniwazi umhla eza ngawo iNkosi yenu.”—Mat. 24:42; 25:13.

Kubulungiseleli Basentsimini. Xa unikela ubungqina ebantwini, uba nethemba lokuba baya kuyikhumbula loo nto uyithethayo. Ukuphindaphinda ngendlela ephumelelayo kunokukunceda ulufikelele olo sukelo.

Ngokuqhelekileyo, ukuphindaphinda into ngexesha exutyushwa ngalo kuyayibethelela engqondweni yomntu. Ngaloo ndlela, emva kokuba ufunde isibhalo, unokusibethelela ngokwalatha kwingongoma eyintloko yaso uze ubuze, “Ngaba uwaphawule amagama asetyenziswe kule ndinyana?”

Izivakalisi zokugqibela encokweni zinokusetyenziswa ngempumelelo. Ngokomzekelo, usenokuthi: “Eyona ngongoma endinethemba lokuba uya kuyikhumbula kwincoko yethu kukuba . . . ” Wandule ukuyichaza ngokufutshane. Mhlawumbi uthi: “Injongo kaThixo kukuba umhlaba uguqulwe ube yiparadesi. Ngokuqinisekileyo loo njongo iza kuzalisekiswa.” Okanye: “IBhayibhile ibonisa kakuhle ukuba siphila kwimihla yokugqibela yale nkqubo yezinto. Ukuba sifuna ukusinda xa ipheliswa, kufuneka sifunde oko uThixo akufunayo.” Okanye ke ithi: “Njengoko sele sibonile, iBhayibhile inikela isiluleko esisebenzisekayo ngendlela yokuhlangabezana neengxaki zobomi bentsapho.” Kwezinye iimeko unokuphinda ngokufutshane indinyana yeBhayibhile njengengongoma efanele ikhunjulwe. Kakade ke, ukuze wenjenjalo ngempumelelo kufuneka ucingisise kusengaphambili.

Kumabuyelo, nakwizifundo zeBhayibhile, ukuphindaphinda kwakho kunokuquka imibuzo yempinda.

Xa umntu ekufumanisa kunzima ukuqonda okanye ukusebenzisa isiluleko seBhayibhile, usenokuwuphakamisa kangangezihlandlo eziliqela loo mbandela. Zabalazela ukuwuvela kumacala ahlukahlukeneyo. Akuyomfuneko ukuba iingxubusho zibe nde kodwa zifanele zishukumisele umfundi ukuba acinge ngaloo mbandela. Khumbula, uYesu waphindaphinda ngendlela efanayo ukuze ancede abafundi bakhe boyise umnqweno wokuba kwindawo yokuqala.—Mat. 18:1-6; 20:20-28; Luka 22:24-27.

Xa Unikela Iintetho. Ukuba unikela iintetho eqongeni, injongo yakho asikokudlulisela inkcazelo nje kuphela. Ufuna ukuba abaphulaphuli bayiqonde, bayikhumbule yaye bayisebenzise. Ukuze wenze oko, yiphindaphinde kakuhle loo nto uyithethayo.

Noko ke, ukuba uziphindaphinda kakhulu iingongoma eziziintloko, usenokuphulukana nengqalelo yabaphulaphuli bakho. Zikhethe ngenyameko iingongoma ezifuna ukugxininiswa ngokukhethekileyo. Ezi zidla ngokuba ziingongoma eziziintloko esekelwe kuzo intetho yakho, kodwa zinokuquka ezinye iingcamango ezibaluleke ngokukhethekileyo kubaphulaphuli bakho.

Ukuze uphindaphinde, unokuqala ngokuzichaza iingongoma eziziintloko zakho kwintshayelelo. Yenjenjalo ngamagqabantshintshi ashwankathela oko uza kukugubungela, ngemibuzo okanye ngemizekelo emifutshane ebonisa iingxaki ezimele ziconjululwe. Unokuchaza ukuba zingaphi iingongoma eziziintloko ezikhoyo uze uzibize ngokulandelelana kwamanani azo. Emva koko xubusha ingongoma nganye entethweni yakho. Ugxininiso lunokongezelelwa kwintetho yakho ngokuphinda ingongoma nganye eyintloko ngaphambi kokuba udlulele kwelandelayo. Okanye lunokwenziwa ngokuchaza umzekelo obandakanya indlela esebenza ngayo loo ngongoma eyintloko. Ugxininiso olongezelekileyo lunokufakelwa kwintetho yakho ngokuphindaphinda iingongoma eziziintloko nakumqukumbelo, uzibalaselise ngokubonisa umahluko, ngokuphendula imibuzo ebiphakanyisiwe, okanye ngokuchaza izicombululo zeengxaki ebeziveziwe.

Ukongezelela koku kungasentla, isithethi esinamava sibaqwalasela ngenyameko abaphulaphuli baso. Xa abanye babo befumanisa ingcamango ethile kunzima ukuyiqonda, isithethi siyayibona loo nto. Ukuba loo ngongoma ibalulekile, siyayiphinda. Noko ke, ukuphinda kwaloo magama manye kusenokungayiphumezi injongo yaso. Ukuze ubani afundise kufuneka enze okungaphezulu kunoko. Umele abe bhetyebhetye. Kusenokufuneka afakelele nezinto abengazilungiselelanga kwintetho yakhe. Ukufunda kwakho ukuhlangabezana neemfuno zabaphulaphuli ngale ndlela kuya kubonisa umlinganiselo ophumelela ngawo njengomfundisi.