Usuku Lokugqibela LukaYesu Etempileni

Ngosuku lokugqibela lukaYesu etempileni, uqhubeka egxeka ababhali nabaFarisi, ude athi ngabahanahanisi. Uthi xa ethetha ngabo: “Niyihlamba ngaphandle indebe nesitya, kodwa ngaphakathi zigcwele kukunyoluka nokubawa. MFarisindini oyimfama, qala uyihlambe ngaphakathi indebe nesitya, ukuze zicoceke nangaphandle.” (Mateyu 23:25, 26) Nangona abaFarisi besaziwa ngokucoceka ngaphandle, abakuhoyanga ukucoca umntu wangaphakathi okanye iintliziyo zabo.

Enye into ebonisa ukuba bazenza amalungisa, yindlela abakukhuthalele ngayo ukuhombisa amangcwaba abaprofeti. Kodwa ngokutsho kukaYesu, ‘bangoonyana babo babulala abaprofeti.’ (Mateyu 23:31) Kuyacaca ukuba yinyani leyo kuba kudala bezama ukubulala uYesu.​—Yohane 5:18; 7:1, 25.

Emva koko uthetha ngento eza kwenzeka kwezi nkokheli ukuba aziguquki. Uthi: “Zinyokandini, nzalandini yamarhamba, niza kuwubaleka njani umgwebo weGehena?” (Mateyu 23:33) Igama elithi Gehena lithetha iNtlambo kaHinom. Le ntlambo yindawo ekutshiselwa kuyo inkunkuma, ibe ibonisa ukuba ababhali nabaFarisi abenza izinto ezimbi baza kutshatyalaliswa ngokupheleleyo.

Abafundi bakaYesu baza kuba ‘ngabaprofeti namadoda azizilumko nalawo afundisa abantu.’ Baza kuphathwa njani? UYesu uthetha nezi nkokheli athi: ‘Abanye abafundi bam niza kubabulala nize nibabethelele ezibondeni, abanye nibakatse kanobom kwizindlu enikhonzela kuzo, nize abanye nibatshutshise kwizixeko ngezixeko. Ngoko ke ninetyala ngegazi lamalungisa elaphalalayo emhlabeni, ukususela kwigazi lika-Abheli olilungisa ukuyokutsho kwigazi likaZekariya enambulalayo.’ Emva koko uyazilumkisa athi: “Ndiyaniqinisekisa ukuba, esi sizukulwana siza kuphenduliswa ngazo zonke ezi zinto.” (Mateyu 23:34-36) Iyenzeka nyhani le nto ngo-70 C.E. xa umkhosi wamaRoma utshabalalisa iYerusalem namaYuda amaninzi.

Xa uYesu ecinga ngale nto imbi, uyakhathazeka. Uthi: “Yerusalem, Yerusalem, wena ubulala abaprofeti nobabetha ngamatye abo bathunyelwa kuyo, kunini ndifuna ukuqokelela abantwana bakho, oku kwesikhukukazi siqokelela amantshontsho aso phantsi kwamaphiko aso! Kodwa anizange nivume. Jonga! Iza kushiyelwa kuwe itempile yakho.”​—Mateyu 23:37, 38.

Emva koko uYesu uthi: “Ndithi kuni, anisoze nindibone de nithi, ‘Usikelelwe lowo uza egameni likaYehova!’” (Mateyu 23:39) Uthetha ngamazwi esiprofeto akwiNdumiso 118:26, athi: “Usikelelekile lowo uza egameni likaYehova; thina basendlini kaYehova sithi sikelelekani.” Kuyacaca ukuba emva kokuba itempile itshatyalalisiwe, akekho umntu oza kuphinda eze kuyo ezokukhonza uThixo.

UYesu ngoku etempileni uya kwindawo ekunikelwa kuyo. Kule ndawo kukho into efakwa kuyo iminikelo nevuleke kancinci apha ngaphezulu. Ubona abantu besenza kanye loo nto, nezityebi “zifaka imali eninzi.” Emva koko ubona umhlolokazi olihlwempu efaka “iisentana ezimbini ezinexabiso elincinci kakhulu.” (Marko 12:41, 42) Siqinisekile ukuba uYesu uyayazi indlela uThixo avuyiswa ngayo ngumnikelo walo mhlolokazi.

Ubiza abafundi bakhe aze athi kubo: “Ndiyaniqinisekisa ukuba, lo mhlolokazi ufake imali eninzi ngaphezu kwabo bonke aba abantu.” Kutheni esitsho? Uthi: “Bonke bathathe kwimali eshiyekileyo, kodwa yena, ehlupheka enjalo, unikele ngayo yonke imali anayo, imali yakhe yokugqibela.” (Marko 12:43, 44) Indlela lo mhlolokazi acinga nazenza ngayo izinto, yahluke kakhulu kweyeenkokheli zenkonzo yamaYuda.

Njengoko uNisan 11 eqhubeka, uYesu uyemka okokugqibela etempileni. Omnye wabafundi bakhe uthi: “Mfundisi, jonga indlela amahle ngayo la matye nezi zakhiwo!” (Marko 13:1) Amanye amatye eyakhiwe ngawo le tempile makhulu kakhulu ibe abonisa indlela eyomelele ngayo. Inoba uyothuka xa esiva uYesu esithi: “Uyazibona na ezi zakhiwo zikhulu? Akukho nelinye ilitye eliza kushiyeka apha lingadilizwa.”​—Marko 13:2.

Emva kokuba uYesu ethethe ezi zinto, yena nabapostile bakhe banqumla iNtlambo iKidron baze banyuke bayokuhlala kwiNtaba YemiNquma. Ekuhambeni kwexesha uYesu uba kunye nabapostile abane, uPetros, uAndreya, uYakobi, noYohane. Xa belapho bayibona kakuhle le tempile imangalisayo.