Ngaba Abantu Abasele Bekhulile Banekamva Elimfiliba?
UKUMKANI uDavide wathi: “Ndakha ndamtsha, kungokunje ndimdala.” (INdumiso 37:25) Kumaxesha okubhalwa kweBhayibhile abantu abakhulileyo babeliqaqobana elihlonelwayo. Noko ke, ukuba iimeko zangoku ziyaqhubeka, abantu abakhulileyo kungekudala banokungabi liqaqobana yaye banokungabi ngabahlonelwayo.
EUnited States kuphela, kuqikelelwa ukuba kukho abantu abangama-26 ezigidi abangaphezu kwama-65 eminyaka ubudala. Malunga nonyaka wama-2040 eli nani linokuphantse liphindaphindeke kathathu! Ngokutsho kwephephancwadi iAsiaweek, amazwe athile aseAsia “alindele ukuba inani labantu bawo abakhulileyo liphindaphindeke kabini kwishumi leminyaka elizayo.” Noko ke, ulindelo lokuba inani labantu abakhulileyo liza kuphantse lilidlule inani labo baselula lubonisa ukuba abantu abasele bekhulile bajongene nengxaki. Abaninzi gqitha kubo sele bezifumana bengamalolo yaye bengenamakhaya. Abanye bashiywa ezibhedlele okanye kumakhaya okunyamekela ukuze bafele apho—bebodwa, bengatyelelwa yaye benganyanyekelwa. Kunikelwa iingxelo zeziganeko ezothusayo zokungakhathalelwa nezokuphathwa kakubi kwabazali kwanakumazwe apho kwakulisiko ukuhlonelwa kwabo.
UG. M. Ssenkoloto kwiphephancwadi iWorld Health wathi: “Ngokwesithethe kwinkoliso yamazwe aseAfrika, yaye nakwinkoliso yamazwe Asakhasayo, ntsapho nganye yayiwanyamekela amaxhegokazi akuyo. Umfazi owayengenabantwana bokuba bamnyamekele wayenyanyekelwa ngabamelwane okanye yilali iphela.” Noko ke, uthi: “Izinto ezazixatyiswa mandulo azisaxatyiswa. Imeko embi yezoqoqosho, ukungabiwa kakuhle kobuncwane, ukulangazelela izinto eziphathekayo, ukulwela ukuhlonelwa nesikhundla—zonke ezi zinto zigqwesa imigaqo yesithethe emihle mayela nokuxhasa abantu abasele bekhulile.”
Ngaloo ndlela amazwi ombhali weBhayibhile uAgure angqineka eyinyaniso kakhulu: “Kukho isizukulwana esitshabhisa uyise, singamsikeleli unina.” (IMizekeliso 30:11) Ewe, abantu abakhulileyo bayakhiqwa kwisikhundla sembeko ababeyinandipha kumaxesha angaphambili. Abaninzi babajonga njengabangumqobo ebantwini kunokuba luncedo. Ubukhulu becala, ithemba labo libonakala limfiliba.
Noko ke, amaKristu abajonga njani abantu abalupheleyo? Ngaba ayayilondoloza “imigaqo yesithethe emihle” mayela nabo?