Ukubingelela Ngabantu Abaselula—Akuveli KuThixo
NGAPHANDLE kweendonga zaseYerusalem, mandulo kwakukho indawo eyayibizwa ngokuba yiTofete. Apho, amaSirayeli awexukileyo, kuquka uKumkani uAhazi noManase, babeqhele ukwenzela khona isiko eloyikekayo lokunikela ngabantwana. Ekugqibeleni, ukumkani othembekileyo uYosiya waluphelisa olu qheliselo ngokwenza iTofete ibe yindawo engayifanelanga imigidi yonqulo.—2 Kumkani 23:10; 2 Kronike 28:1-4; 33:1, 6.
Kwakungani ukuze le ndawo ibizwe ngokuba yiTofete? Kukho impikiswano ngemvelaphi yeli gama, kodwa kubangel’ umdla ukuphawula oko umphengululi ongumYuda uDavid Kimhi (owayephila malunga nowe-1160 nowe-1235) wakuthethayo ngale ndawo. Ethetha ngeyesi-2 yooKumkani 23:10, apho iTofete ikhankanywe khona, wabhala esithi: “Ligama lendawo apho babenikela ngoonyana babo [emlilweni] kuMoleki. Igama lale ndawo laliyiTofete, yaye bathi yathiywa ngaloo ndlela ngenxa yokuba ngexesha lokunqula babedla ngokungqungqa baze babethe iingqongqo [itup.pim ngesiHebhere] ukuze uyise angasiva isikhalo sonyana wakhe xa bemfaka emlilweni, nokuze intliziyo yakhe ingabi buhlungu de amthabathe ezandleni zabo. Yaye le ndawo yayingumfula wendoda egama linguHinom, yaye wabizwa ngokuba ‘nguMfula kaHinom’ nangokuthi ‘nguMfula woNyana kaHinom’ . . . UYosiya wayingcolisa loo ndawo, ngokuyiguqulela ekubeni yindawo engacocekanga, ekulahlelwa kuyo izidumbu nawo onke amabibi, ukuze kungaphindi kuthi qatha entliziyweni yomntu ukunikela unyana nentombi yakhe em lilweni kuMoleki.”
Kumaxesha angoku, kuyinto nje engokomdla ngokwasembalini ukuva ngothixo uMoleki, yaye abaninzi ngokungathandabuzekiyo bakufumanisa kunzima ukuqonda ukuba kungani abantu babulala abantwana babo ngenxa yakhe. Kanti, abantu abakhulu namhlanje basabonakala bekulungele ukubulala abantwana babo xa beziva befuna. Ebudeni bale nkulungwane, kuye kwanikelwa ngezigidi zolutsha kwisibingelelo semfazwe. Nyaka ngamnye, izigidi ezingabalekiyo zeentsana ezingekazalwa zibulawa ngabom ngokuqhomfa, abaninzi babo babulawa ngenxa yokuba ukukhawulwa kwabo kwakubangelwe ziintlobano zesini ezingacetywanga okanye ukuzalwa kwabo bekuya kuphazamisana nendlela yokuphila kwabazali babo. Ngaloo ndlela, aba bantwana baba ngumnikelo koothixo bovula zibhuqe ongokwesini nabezinto eziphathekayo.
UYehova wathi ukutshiswa kwabantwana njengomnikelo kuMoleki kwakulisikizi. (Yeremiya 7:31) Ngaba ukujonga ngokwahlukileyo ukubulawa ngenkohlakalo kwabantu abaselula kwisizukulwana sethu?
[Imifanekiso ekwiphepha 31]
Ukunikela ngabantwana kuthixo wobuxoki uMoleki, njengoko kwaboniswa kwiminyaka enokuba ngama-75 eyadlulayo kwi-“Photo-Drama of Creation”
Umfula kaHinom namhlanje, xa ujongwe ngasempuma