Izidubedube Szinakukunqumamisa Ukuvakalisa Iindaba Ezilungileyo
NGENYE imini ngoFebruwari odluleyo, imithetho emitsha yezoqoqosho ekwakukudala ilindelwe eVenezuela yavakaliswa. Amaxabiso kwizinto ezikukutya okusisiseko ezinjengobisi, umgubo nesonka anyuswa ngaphezu kokuphindwe kabini. Amaxabiso epetroli ayeza kunyuka ngama-90 ekhulwini. Kwakugunyaziswe ukuba amaxabiso ezothutho anyuswe ukufikelela kuma-30 ekhulwini. Abantu beli lizwe babothukile. Ngequbuliso, ngoMvulo, ngoFebruwari 27, abantu basabela ngokubangela izidubedube kulo lonke elo lizwe.
Kwintsasa elandelayo, izinto zazifikelele kumlinganiselo wentshabalaliso nokuphanga. Izithonga zemipu zazivakala kwiindawo eziliqela. Abaselula nabadala babezulazula kwizitrato zesi sixeko, bebangela intshabalaliso eyaba ngathi ngummandla wedabi owonakaliswe yimfazwe.
Ngaloo mvakwemini umongameli weli lizwe wamisela umthetho wonxunguphalo waza wakunqumamisa ukukhuselwa kwamalungelo abantu angokwasemthethweni kangangeentsuku ezilishumi. Kwamiswa umthetho wokuba abantu babe sezindlwini phakathi kweeyure ezisusela kwintsimbi yesi-6 matshona neyesi-6 kusasa. Ngosuku olulandelayo, umphathiswa wezokhuselo wavakalisa ukuba loo mthetho wawuya kuqhubeka de kuphinde kwaziswe. Umkhosi wasebenzisa igunya lawo lokulawula isitrato, ungena ezindlwini ungabhungisanga, umise uze uqwalasele oko abantu bakuphetheyo. Elinye iphephandaba lanikela ingxelo yokuba, “Abantu abangamakhulu amabini bafile yaye abaliwaka bangxwelerhekile kwiintsuku ezintathu zezidubedube.”
Amabandla amaNgqina kaYehova ayeqhuba njani ebudeni bale ntlekele? Abazalwana balulekwa: Phaphani nize niziphephe iindawo ezinenkathazo. Hlengahlengisani amaxesha eentlanganiso ukuze ahambelane nemithetho yokuvalwa kokuhamba kwabantu, nize nikuphephe ukushumayela ningamaqela amakhulu. Ukanti, ukushunyayelwa kweendaba ezilungileyo zoBukumkani bukaThixo kwaqhubela phambili.—Mateyu 24:14; 28:19, 20.
Ngenxa yokuba umyeni ongakholwayo womfazi othile ongumKristu wayenxunguphaliswe yimpilo-ntle yomfazi wakhe ukuba wayeza kuphuma endlwini aye kushumayela, wamalela ukuba ahambe. Lo mfazi wamxelela oku: “Akuyiqondi into yokuba ndinembopheleleko endimele ndiyiphumeze. Ngoko khawuz’ apha! Ndiza kufundisisa nawe iBhayibhile!”
Esi yayisisihlandlo sokuqala kwiminyaka engama-22 lo mfazi eliNgqina awathi umyeni wakhe wakuvuma ukufundisisa iBhayibhile. Sekunjalo le ndoda yalumkisa isithi: “Kulungile, ukuba nje undithembisa ukuba awuzukuphuma. Kodwa ungandibuzi mibuzo, ndifundele nje kuphela.” Lo dade wayefundisisa kunye naye kangangeyure enesiqingatha. Entywizisa iinyembezi lo dade wathi, “Sasisesona sifundo sibalaseleyo endakha ndasiqhuba kwiminyaka engama-22 ndisenyanisweni.”
Kwenye imeko, uvulindlela othe ngxi wayetshayela umchankcatho osecaleni kwekhaya lakhe xa kweza elinye inenekazi ngokuqhelekileyo elalingawaphulaphuli amaNgqina xa elityelele ekhayeni lalo. Eli bhinqa lathi: “Andisaniboni nishumayela nina maNgqina kwezi ntsuku. Ungandixeleli ukuba anisayi kuphinda nishumayele kwakhona!”
Lo dade walichazela ukuba babeyekile ukushumayela kwindlu ngendlu kuphela nje ebudeni bezidubedube. Lo dade wathi: “Kodwa kuza umhla esingayi kuphinda sishumayele ebantwini, yaye oko kuya kuthetha ukupheliswa kwehlabathi. Umele ulisebenzise ithuba olufumanayo ngoku uze wamkele isifundo seBhayibhile ekhayeni lakho.”
Elo nenekazi lakhawuleza labuza lisithi: “Sinokuwenza nini amalungiselelo?” Ngoko nangoko kwenziwa amalungiselelo okuqalisa isifundo seBhayibhile sekhaya.
Okuvuyisayo kukuba, izidubedube zaphela, zibuyisela imeko yeli lizwe kwindlela ebiyiyo ngaphambili. Kanti, kwiimeko ezinjalo zonxunguphalo, kuyathuthuzela ukwazi ukuba kungekudala kuya kubakho ihlabathi elizolileyo nelinqabisekileyo. ILizwi likaThixo lithembisa ukuba: “Thina ke ngokwedinga lakhe silinde elitsha izulu, nomtsha umhlaba, apho kumi ubulungisa.” (2 Petros 3:13) Yaye lo gama uThixo esavuma, amaNgqina kaYehova aya kuqhubeka eshumayela indaba ezilungileyo zoBukumkani.
[Imifanekiso ekwiphepha 31]
Izidubedube azizange zibanqumamise abavakalisi boBukumkani
[Inkcazelo]
Umfanekiso uthathwe yiPublicaciones Capriles, yaseCaracas, eVenezuela.