Ubomi Nobulungiseleli BukaYesu

Ukubhencwa Ngemizekeliso Engesidiliya

UYESU usetempileni. Usandula nje ukudidekisa iinkokeli zonqulo ezazifuna ukwazi ukuba ebezenza ngagunya lini na izinto ebezenza. Ngaphambi kokuba zibuyele ezingqondweni, uYesu uyazibuza: “Nithini na ke nina?” Ibe wandula ke esebenzisa imizekeliso azibonise ukuba luhlobo luni lwabantu ezilulo ngokwenene.

UYesu ubalisa esithi: “Umntu wayenabantwana ababini; weza kowokuqala wathi, mntwana wam, yiya kusebenza namhla esidiliyeni sam. Waphendula ke yena wathi, andiyi; ke wabuya wazohlwaya, waya. Weza nakowesibini, wathetha kwangokunjalo. Waphendula ke yena wathi ndiyaya, nkosi; akaya. Nguwuphi na kwabo bobabini owenza ukuthanda kukayise?” UYesu ubabuza loo mbuzo.

Abachasi bakhe baphendula besithi “Ngowokuqala.”

Ngoko ke uYesu uyacacisa esithi: “Inene ndithi kuni, bayaniphangela ke ukungena ebukumkanini bukaThixo ababuthi berhafu namahenyukazi.” Ngokomphumo, ababuthi berhafu namahenyukazi ekuqaleni bakwala ukukhonza uThixo. Kodwa bandula ke, njengomntwana wokuqala, baguquka baza bamkhonza. Kwelinye icala, iinkokeli zonqulo, njengomntwana wesibini, zazibabaza zikhonza uThixo, ukanti, njengokuba uYesu esithi ngazo: “UYohane [uMbhaptizi] weza kuni ngendlela yobulungisa, anakholwa nguye; kodwa bakholwa nguye bona ababuthi berhafu namahenyukazi; ke nina, nakukubona oko, anibuyanga nizohlwaye, ukuze nikholwe nguye.”

Ngokulandelayo uYesu ubonisa ukuba ukusilela kwezi nkokeli zonqulo akungombandela nje wokungakukhathaleli ukukhonza uThixo. Hayi akunjalo, kodwa zingabantu ababi ngenene, abangendawo. UYesu uyabalisa esithi, “Bekukho umninindlu othile owatyala isidiliya, wasibiyela ngothango, wemba kuso isixovulelo seediliya waqeshisa ngaso kubalimi, wahambela kwelinye. Kuthe ke lakusondela ixesha leziqhamo wathuma abakhonzi bakhe kubalimi abo, ukuya kwamkela iziqhamo zaso. Besuka abalimi babathabatha abakhonzi bakhe, bathi omnye bamtyabula, omnye bambulala, nomnye bamgibisela ngamatye bambulala. Wabuya wathuma abanye abakhonzi, bebaninzi kunabokuqala, benjenjalo nakubo.”

“Abakhonzi” bangabaprofeti awathi “umninindlu,” uYehova uThixo, wabathumela ‘kubalimi’ ‘besidiliya’ sakhe. Aba balimi bangabameli abaphambili bohlanga lwakwaSirayeli, hlanga olo iBhayibhile elufanisa ‘nesidiliya’ sikaThixo.

Ekubeni “abalimi” bebaphatha kakubi baze bababulale “abakhonzi,” uYesu uyacacisa esithi: “Kuthe ke kamva [umnini wesidiliya] wathumela kubo unyana wakhe, esithi, Baya kumhlonela yena unyana wam. Bathe ke bakumbona unyana abalimi batshono ukuthi, lo yindlalifa; yizani simbulale, sihlale nelifa lakhe. Bamthabatha, bamkhuphela ngaphandle kwesidiliya, bambulala.”

Ngoku, ebhekisa kwiinkokeli zonqulo, uYesu uyabuza esithi: “Xa athe weza ngoko umnini sidiliya uya kwenza ntoni na kwabo balimi?”

Baphendula besithi, “Uya kubatshabalalisa kakubi abangendawo abo, aze isidiliya eso aqeshise ngaso kubalimi bambi, abomamkelisa iziqhamo ngamaxesha azo.”

Ngaloo ndlela iinkokeli zonqulo ngokungazi zivakalisa umgwebo phezu kwazo, ekubeni ziqukiwe phakathi ‘kwabalimi’ abangamaSirayeli ‘besidiliya’ sikaYehova sohlanga lwakwaSirayeli. Isiqhamo uYehova asilindeleyo kubalimi abanjalo lukholo kuNyana wakhe, uMesiya wokwenyaniso. Ukusilela kwabo ukubonakalisa isiqhamo esinjalo, uYesu uyabalumkisa esithi: “Anizange nilese na eZibhalweni [kwiNdumiso 118:22, 23] ukuthi, Ilitye abalicekisayo abakhi, lelona laba yintloko yembombo; kwavela eNkosini oku, kungummangaliso emehlweni ethu? Ngenxa yoko ndithi kuni, Ubukumkani bukaThixo buya kususwa kuni, bunikwe uhlanga oluzivelisayo iziqhamo zabo. Kanjalo lowo uwe phezu kweli litye uya kutyumka, ke lowo lithe lamwela liya kumcola.”

Ababhali nababingeleli abakhulu ngoku bayaqonda ukuba uYesu uthetha ngabo, ibe bafuna ukumbulala, ‘indlalifa’ eselungelweni. Ngoko ke ilungelo lokuba ngabalawuli eBukumkanini bukaThixo liza kususwa kubo njengohlanga, ibe kuza kuveliswa uhlanga olutsha ‘lwabalimi besidiliya’ olo luza kuvelisa iziqhamo ezifanelekileyo.

Ngenxa yokuba iinkokeli zonqulu zisoyika izihlwele, ezimgqala uYesu njengomprofeti, azizami ukumbulala ngaso esi sihlandlo. Mateyu 21:28-46; Marko 12:1-12; Luka 20:9-19; Isaya 5:1-7.

◆ Abantwana ababini kumzekeliso wokuqala kaYesu bamela oobani?

◆ Kumzekeliso wesibini ngubani omela “umninindlu,” “isidiliya” “abalimi,” “abakhonzi,” ‘nendlalifa?’

◆ Kuya kwenzeka ntoni ‘kubalimi besidiliya,’ ibe ngoobani abaya kuthabatha indawo yabo?