Abavakalisi BoBukumkani Bayabalisa

‘Ukuvuna’ EVenezuela

Ngesinye isihlandlo uYesu wafanisa umsebenzi wokushumayela nesivuno sanyaka ngamnye. (Mateyu 9:36-38) INkosi yesivuno nguYehova uThixo, yaye isivuno sininzi ngokwenene emhlabeni jikelele. Oku kuquka ummandla ongafan’ usetyenzwe eVenezuela.

Iofisi yesebe yeWatch Tower Society yaseVenezuela ichaza oko kwenzekayo xa iqela lamaNgqina lasebenza ummandla waseSabana Grande, kwiLizwana laseGuárico. La maNgqina abalisa esithi: “Indlu esasiza kuhlala kuyo yayiyindawo efanelekileyo ukuba singaqhubela iintlanganiso kuyo ngoko zibekwa nje saqalisa ukumemela abantu kwiintlanganiso apho. Abantu balapho babengawazi amaNgqina kaYehova. Nangona kuloo dolophu kwakukho amaqela amane eecawa zobuProtestanti, abantu balapho babenomdla wokufunda iBhayibhile.

“Sasebenza iiyure ezintathu kusasa neeyure ezintathu emva kwemini, sityelela izindlu ngezindlu yaye simemela abantu kwiintlanganiso zobusuku obulandelayo. Sasingenazo izihlalo, ngoko sabacela ukuba beze nezihlalo zabo. Xa kwakusondela ixesha lokuba kuqalise iintlanganiso, abantu baqalisa ukufika, ingulowo ephethe isihlalo. Emva kweentlanganiso, sabaxelela ukuba sasingathanda ukubhala phantsi amagama abo babenqwenela ukuqhutyelwa isifundo seBhayibhile sekhaya sasimahla. Bonke abo bangama-29 ababezile bafuna ukuba amagama abo abhalwe.

“Njengokuba sasivala ucango emva kondwendwe lokugqibela, sabona amadoda amathathu emi kwimbombo yale ndlu. Malunga nentsimbi yesithoba, sasilungele ukuhlala phantsi size sitye xa ankqonkqoza emnyango. Abuza imibuzo enjengale: ‘Kukushumayela kwantoni oku nikwenzayo kule dolophu? Siyintoni isizathu sokuba nibe nentlanganiso apha ngale ngokuhlwa?’

“Sawabuza enoba sasaphule nawuphi na umthetho. Aphendula ngokuthi hayi yaye athi ayengabefundisi beecawa ezintathu zobuProtestanti kuloo dolophu. Ayephazamisekile kuba iicawa zawo zazingenabantu ngaloo ngokuhlwa. Sawamemela ngaphakathi saza sacacisa umsebenzi wethu. Sawahambisela noncwadi saza sawacela ukuba abuye ngoLwesine olandelayo.

“NgoLwesine olandelayo abefundisi babuya nabanye abangama-22 ababefuna ukuva oko sasiza kukuthetha. Aba befundisi bacinga ukuba, kuba singamabhinqa, sasingenakumelana nabo engxubushweni. Sekunjalo, ngokwembono yethu ezo ntlanganiso zaba nempumelelo. Ekuqukumbeleni sacacisa ukuba sasibhalisa abo babefuna ukufunda okungakumbi eBhayibhileni. Amaqabane aliqela abefundisi afuna ukuba amagama awo ongezelelwe kolo ludwe, yaye abanye bada bathi babefuna ukuhamba nathi emsebenzini wokushumayela!

“Sabacacisela ukuba babeya kufuna ulwazi olungakumbi lweBhayibhile baze baqeqeshwe ngaphambi kokuba bahambe nathi. Ntsuku zonke abantu babesiza kule ndlu, besicela ukuba sibacacisele iBhayibhile. Maxa wambi, xa sithethe kwada kwasebusuku gqitha, kwakufuneka sibacele ukuba bagoduke. Xa ekugqibeleni kwafuneka ukuba sihambe kuloo mmandla, baba buhlungu gqitha yaye basixelela ukuba xa sibuya, babeya kuhamba nathi emsebenzini wokushumayela. Bathembisa ukuba ngoko baya kuba benze inkqubela efunekayo.”

Xa loo maNgqina awushiyayo loo mmandla, yayingabantu abangama-40 ababefuna ukufundisisa iBhayibhile. Amagama aba bantu banomdla anikwa elona bandla likufutshane, elimalunga neekhilomitha ezingama-50. Kamva, amaNgqina athile awayesuka kwesinye isixeko aye afudukela kule dolophu, yaye kuye kwasekwa iqela elinenzondelelo labashumayeli beendaba ezilungileyo.