Phezu Kwabo Nje Ubunzima Nengozi, Beza
YAYINGUMHLA wesi-2 kuJanuwari, 1992. Indawo—eMaxixe, kwiPhondo lwaseInhambane. Izandi zasebusuku zaseAfrika eMozambique zaphazanyiswa kabukhali kukuvulelwa konomathotholo. Umsasazi wenza esi saziso, “AmaNgqina kaYehova aza kuba neNdibano yawo ‘Yabathandi Benkululeko’ kwiphondo lethu, injongo yawo kukufundisa abantu indlela inkululeko yokwenyaniso enokufunyanwa ngayo kwihlabathi lanamhlanje. Wonke ubani wamkelekile ukuba angeza.”
Apho kuloo mmandla waseAfrika ukude, kwakusenzeka into eya kuhlala ikhunjulwa ezimbalini! Okwesihlandlo sokuqala, kwakuqhutywa indibano yesithili yamaNgqina kaYehova, yaye abantu abali-1 024 babelapho ukuze bayinandiphe. Kwiminyaka embalwa edluleyo, isiganeko esinjalo sasingenakwenzeka ekuhleni eMozambique, ekubeni umsebenzi wamaNgqina kaYehova wawuvaliwe. Ngaba ungathanda ukuva ngenkalipho nokuzincama okwenziwayo ukuze kuyiwe kule ndibano?
IPhondo laseInhambane, njengeminye imimandla yaseAfrika, lihle ngokugqwesileyo. Izikhitshane zohlobo lwama-Arab ezineeseyile ezingoonxantathu zihla zinyuka elwandle cebu kuhle elunxwemeni. Amasundu ekokonathi maninzi. Kodwa kugquba okuthile okungathandekiyo kule ndawo yasemaphandleni: imfazwe yamakhaya!
Kwabo balele kwindlu yamagqabi esundu ekuseni, ayingommangaliso ukothuswa ngubhum-bhum-bhum otsholo phantsi woombayimbayi abakhulu kwiilali ezikufuphi njengoko umlo uqhubeka ehlathini ebudeni bobusuku. Ngokufuthi ngabemi abamsulwa ababa ngamaxhoba oku. Maxa wambi ubona abantwana bejingxela benamalungu omzimba angekhoyo okanye aqhawukileyo. Kwanabanye bamaNgqina kaYehova baneziva ebusweni nasemzimbeni ngenxa yokuhlaselwa ngenkohlakalo.
Phantsi kwezi meko iNdibano “Yabathandi Benkululeko” yaxatyiswa ngokunzulu ngabo bonke ababeyile kuyo. Phezu kokuba nje ayenokulalelwa aze ahlaselwe endleleni eya endibanweni, amaqela eentsapho amaninzi asemaphandleni ayezimisele ukuya. Ukuya apho kwakungemyoli nako, ekubeni uwonke wonke esebenzisa kakhulu ukukhwela kwiilori ezisisichenge. Maxa wambi abahambi abangama-400 baxinanisana kwilori enye! Iqela lezi lori liyalandelelana lize liphelekwe ngumkhosi oxhobileyo.
UNora kunye neentombi zakhe ezintathu, enye inonyaka, enye emithathu, yaye enye emithandathu, babeyenye yeentsapho ezabeka ubomi bazo emngciphekweni ngokuhamba ngale ndlela. Wagcina imali kuseziinyanga ezininzi ngaphambili elungiselela olu hambo. Ukungabikho kwamagumbi okulala alungiselelweyo endibanweni akuzange kumphazamise. Ekunye nabanye abaninzi, uNora nentsapho yakhe babepheka, batye, baze balale ebaleni kwindawo ekwakuqhutyelwa kuyo indibano.
Kwanobushushu oboyikekayo belanga obulandelwa zizikhukula zemvula babungenakulunciphisa uvuyo olungathethekiyo ababenalo aba bazalwana babenandipha isidlo sokomoya kunye. Babevakalelwa kukuba akukho nto eyayibaluleke kubo ngaphezu kokuba babelapho kuloo ndibano. Isimbuku sabantu abali-17 bafuzisela uzahlulelo lwabo kumanzi afudumeleyo olwandlekazi lwaseIndiya. Njengoko ubhaptizo lwaluqhubeka, isihlwele esikhulu sababukeli ababevuya, sashukunyiselwa ukuba simvumele iindumiso uYehova.
Eli qela labanquli lalikufumanise ngokwenene okuthethwa kukuba ngumthandi wenkululeko yobuThixo. UHans omnye owayeze esuka kwikomkhulu, eMaputo, wathi: “Sibone ukuqalisa kwesiqalo esitsha kumsebenzi wamaNgqina kaYehova kulo mmandla weAfrika.”