“Njengengonyama Egqumayo”
NGABA uyakholelwa ukuba uSathana ukho? Namhlanje, abaninzi abakholelwa. Kubonakala ngathi bayijonga loo nkolelo “njengengahambisani nenzululwazi.” Kwanasemva phayaa ngowe-1911, iEncyclopædia Britannica yathi: “Inzululwazi iye yachaza okuninzi gqitha ngoko kwenzeka kwindalo engaphandle noko kwenzeka ngaphakathi kubomi bomntu kangangokuba ayibonakali inendawo engena kuyo impembelelo kaSathana.” Abafundi bezakwalizwi baqiqa ngelokuba uSathana uyinto nje engumfanekiselo, into eyintsomi. IThe World Book Encyclopedia ithi: “Abafundi bezakwalizwi abaninzi bezi mini bamcingela uMtyholi engumfanekiselo wamandla angendawo, wezona mpawu zimbi zendalo engabantu.”
Noko ke, zibonisa ntoni izibakala? Ukuba uyakholelwa eBhayibhileni, umele ukholelwe ukuba uSathana ungowokwenene. UYesu akazange akholelwe kukuba wayekho nje kuphela kodwa wambiza ngokuthi ‘ungumphathi weli hlabathi.’ (Yohane 14:30) Umpostile uPawulos wambiza uSathana ngokuthi ‘unguthixo weli phakade.’ (2 Korinte 4:4) Yaye umpostile uYohane owalupheleyo wathi: “Ihlabathi liphela lilele kongendawo.”—1 Yohane 5:19.
Ukuba akuvumelani noYohane, khawucinge ngembali yakutshanje. Cinga ngeqela lababulali nendlela yokungcungcuthekisa esetyenziswa ngoorhulumente. Khumbula iimfazwe nokubulawa kwabantu kwesi sizukulwana sethu ngenxa yokuba beluhlanga oluthile. Yaye kuthekani ngolwaphulo-mthetho olunogonyamelo oluba yimixholo ephambili kumaphephandaba ethu—ukubulawa kwenkitha yabantu, ukudlwengulwa kwabantu, ukubulawa komnye emva komnye, ukuxhatshazwa kwabantwana ngokwesini, xa sikhankanya nje izinto ezimbalwa? Ngaba kukho omnye ngaphandle kukaSathana onokuba unguthixo weli hlabathi?
Umpostile ongumKristu uPetros walumkisa esithi: “Phaphani, ngokuba ummangaleli wenu, uMtyholi, uhamba njengengonyama egqumayo, efuna ubani angamginyayo.” (1 Petros 5:8) Ukuba ingonyama ibizihambela nje ngokukhululekileyo elumelwaneni, ngaba ubuya kube uxubusha ngokubakho okanye ukungabikho kwayo? Okanye ngaba ubuya kusuka ubaleke ufuna indawo yokuzimela?
Qiniseka ukuba uSathana ukho. Akananceba yaye uneengcwangu, unamandla ngakumbi kunathi. Ngoko funa inkuselo yaLowo unamandla angakumbi. “Yinqaba ende eliqele igama likaYehova; ilungisa ligidimela kulo, libe sengxondeni.” (IMizekeliso 18:10) Yenza uYehova uThixo ikhusi lakho, yaye yazi ukuba kungekudala uluntu luya kukhululwa kwimpembelelo yongendawo, uSathana. Kuya kutsho kuthi qabu uNoqolomba efile nje!—ISityhilelo 20:1-3.