Ngoobani Abakholelwa Kwimimoya Engendawo?
NGABA uyakholelwa ukuba imimoya engabonakaliyo inokubuchaphazela ubomi bakho? Abaninzi banokuphendula beqinisekile bathi hayi. Nangona bebuvuma ubukho bukaThixo, bayigqala njengentsomi emini ingcamango yokubakho kwabasebenzi bobungendawo abanamandla angaphezu kwawabantu.
Ukungakholelwa kwimimoya okusasazekileyo kumazwe aseNtshona ngokuyinxenye kubangelwa yimpembelelo yeNgqobhoko, kangangeenkulungwane eyayifundisa ukuba umhlaba usisazulu sendalo, uphakathi kwezulu nesihogo. Ngokutsho kwale mfundiso, izithunywa zezulu zinandipha uyolo lwasezulwini ngoxa iidemon zimaxhaphetshu yimicimbi yasesihogweni.
Njengokuba ukufunyaniswa kwezinto kwezenzululwazi kwakubangela abantu balahle iingcamango eziphosakeleyo ngendlela emi ngayo indalo, ukukholelwa kwizidalwa zomoya kwaphelelwa lixesha. IThe New Encyclopædia Britannica ithi: “Umphumo weenguqulelo zikaCopernicus zenkulungwane ye-16 (ezazisekelwe kwiingcamango zesazinzulu ngeenkwenkwezi sasePoland uCopernicus), ekwathi kuzo . . . uMhlaba awabi sajongwa njengesazulu sendalo kodwa, kunoko, njengesijikelezi-langa kwinkqubo yezijikelezi-langa eyinxalenye encinane gqitha yomnyele wesibhakabhaka okwindalo ebonakala ingenasiphelo—ingcamango yezithunywa zezulu needemon ayizange ibe sabonakala ifanelekile.”
Ngoxa uninzi lungakholelwa kwimimoya engendawo, kukho izigidi ezikholelwayo. Izithunywa zezulu ezonayo zinendima ebalulekileyo kwiinkonzo ezininzi, ezangaphambili nezikhoyo ngoku. Ukongezelela kwindima yazo yokonakalisa ubumoya, ezi zithunywa zezulu zingendawo zijongwa njengoothunywashe beentlekele, ezinjengemfazwe, indlala neenyikima, yaye zikwajongwa njengezikhuthaza ukugula, ukungalungelelani engqondweni, nokufa.
USathana uMtyholi, umoya ongendawo oyintloko kubuKristu nakubuYuda, ubizwa ngokuba nguIblis ngamaSilamsi. Kunqulo lwamandulo lwasePersi lwamaZoroastrian, wayenguAngra Mainyu. Kunqulo lwamaGnostiki, olwanda kakhulu ngenkulungwane yesibini neyesithathu yeXesha Eliqhelekileyo, kwakusithiwa nguDemiurge, igama elalinikwa uthixo onekhwele nongaphantsi uninzi lwabantu olwalumnqula lungazi.
Imimoya engendawo engaphantsi ibalasele kwiinkonzo zaseMpuma. AmaHindu akholelwa ukuba iiasura (iidemon) zichasa oodeva (oothixo). Ezona asura zoyikwa kakhulu ziirakshasa, izinto ezoyikekayo ezifumaneka emangcwabeni.
AmaBhuda akholelwa ukuba iidemon ngamandla anobuntu athintela abantu ekufumaneni iNirvana, imeko yokungeva zintlungu neyolonwabo. Oyena mhendi uphambili kuzo nguMara, kunye neentombi zakhe ezintathu uRati (uMnqweno), uRaga (uYolo), noTanha (Ukungabi nanzolo).
Abanquli abangamaTshayina basebenzisa imililo emikhulu, iitotshi, neziqhushumbisi ukuze bazikhusele kwikuei, okanye iidemon zemvelo. Nakwiinkonzo zaseJapan kukholelwa ukuba kukho iidemon ezininzi, kuquka iitengu ezoyikekayo, imimoya engena ebantwini de ikhutshwe ngabefundisi.
Kwiinkonzo zabangafundanga eAsia, eAfrika, kuMbindi noMzantsi Pasifiki, nakumazwe aseMerika, kukholelwa ukuba izidalwa zomoya zinokuba luncedo okanye zibe yingozi kuxhomekeka kwiimeko nemo ezikuyo ngelo xesha. Abantu bayayihlonela le mimoya ukuze baphephe intlekele baze bafumane uncedo.
Kuko konke oku ke yongeza umdla owandileyo kumlingo nasekusebenzelaneni nemimoya, kutsho kucace ukuba ukukholelwa kwimimoya engendawo kudala kukho yaye kusasazekile. Kodwa ngaba kusengqiqweni ukukholelwa ukuba izidalwa ezinjalo zikho? IBhayibhile ithi zikho. Noko ke, ukuba zikho, kutheni uThixo ezivumela zenzakalise abantu?