Uyakhumbula Na?
Ngaba iinkupho zakutshanje zeMboniselo uzifumanise ziluncedo kuwe? Ngoko kutheni ungavavanyi inkumbulo yakho ngale mibuzo ilandelayo:
▫ Kutheni amaNgqina kaYehova eqhubeka etyelela abamelwane bawo?
AmaNgqina kaYehova afuna iintsikelelo zikaThixo eziya kuza noBukumkani obuthenjisiweyo, yaye ngenxa yokuba ebathanda abamelwane bawo, afuna basikelelwe ngokufanayo. Ngaloo ndlela, elandela umzekelo kaYesu, aziva eqhutywa luthando lokungazingci ukuba atyelele abamelwane bawo. (Mateyu 6:9, 10; 22:37-39)—8/15, iphepha 8, 9.
▫ Kutheni ukukholelwa kwindaleko kungumbandela wokholo?
Izazinzulu azikaze zikubone ukuguquka ngequbuliso kweeseli zemfuza—kwanoko kuyingenelo—okuvelisa uhlobo olutsha lwezinto eziphilayo, ukanti izazi ngendaleko zithi leyo yindlela izinto eziphilayo ezavela ngayo. Izazi ngendaleko azizange zikubone ukuqalisa kobomi ngephanyazo buphuma kwizinto ezingaphiliyo, ukanti zimi ngelithi le yindlela ubomi obaqalisa ngayo.—9/1, iphepha 5.
▫ Yiyiphi eyona ndlela esinokukoyisa ngayo ukudimazeka okusenokubangelwa yimiqathango yobomi?
Enoba injani imeko yethu, ukuba sinikel’ ingqalelo koko sinako ukukwenza kunokuzikhathaza ngoko singenako ukukwenza, ubomi buya kuba bobanelisayo, yaye siya kufumana uvuyo enkonzweni kaThixo. (INdumiso 126:5, 6)—9/1, iphepha 28.
▫ Ziziphi iingenelo zokuxolela?
Ukubaxolela abanye kukhuthaza ulwalamano oluhle (Efese 4:32); akubangeli kubekho nje uxolo nabanye abantu kodwa kwanoxolo lwangaphakathi (Roma 14:19; Kolose 3:13-15); ukubaxolela abanye kuvula indlela yokuba nezethu izono zixolelwe (Mateyu 6:14); kwakhona, kuyasinceda sikhumbule ukuba nathi siyakufuna ukuxolelwa. (Roma 3:23)—9/15, iphepha 7.
▫ Umzekelo womprofeti uAmosi usinceda njani kumsebenzi wethu wokushumayela?
NjengoAmosi, asisiguquli yaye asisingxengi isigidimi sikaThixo. Kunoko, ngokuthobeka siyasivakalisa kungakhathaliseki ukuba injani na intsabelo yabo basivayo.—9/15, iphepha 17.
▫ Ziziphi iimpawu zikaThixo esifanele sizixelise?
Ezimbini neziphawulekayo bubuchule bukaYehova bokulungelelanisa izinto nolonwabo lwakhe. (1 Korinte 14:33; 1 Timoti 1:11) Ezi mpawu zikaThixo zilungelelene, ukuze olunye lwazo lungenziwa lubalasele ngoxa olunye lusilela.—10/1, iphepha 10.
▫ Ngawaphi amanye amanyathelo asebenzisekayo aye athatyathwa ngabazali ukunceda abantwana babo bakhonze uYehova?
Eyona nto ibalulekileyo kukuqalisa beselula. Oko kubethelelwayo nezifundo ezifundwe ngoxa beselula kakhulu ziya kuhlala ubomi bonke. (IMizekeliso 22:6) Kubalulekile ukubafundisa ukuthobela nokuhlonela uYehova nonqulo lwakhe kuzo zonke iintlanganiso. Abazali abaphumelelayo bafunda ukuqonda utyekelo olungafanelekanga, yaye bayabanceda abantwana babo balulungise. (IMizekeliso 22:15) Okokugqibela, qalisa eselula ukumbekela usukelo lobuthixo anokulufikelela ngokusengqiqweni umntwana wakho.—10/1, iphepha 27-8.
▫ Yiyiphi inkalo eyahlukileyo yokuxolela kukaYehova esifanele sizame ukuyisebenzisa?
UYehova uyaxolela aze alibale. (Yeremiya 31:34) Le yinto ekunzima ngezidalwa ezingabantu ukuyenza. Ukubaluleka kokwenza njalo kwagxininiswa nguYesu, njengoko kubhalwe kuMateyu 6:14, 15.—10/15, iphepha 25-6.
▫ Yiyiphi imiqobo emithathu esithintelayo ekubeni nemfesane?
Ngenxa yokuba singabantu abanesono, ukuba nomona kunokumila kuthi. Ukuba simonela umntu othile, sinokumphatha njani ngemfesane enkulu? Ukuzichanaba ngokungeyomfuneko kugonyamelo ngomnye umqobo. Oku kutyekela ekubeni kusenze singavakalelwa xa abanye bebandezeleka. Ngaphezu koko, umntu ozingcayo kulula ukuba angabi namfesane. (1 Yohane 3:17)—11/1, iphepha 19, 20.
▫ Ziziphi izifundo esinokuzifumana kwingxelo yeZibhalo engoYobhi?
Ingxelo kaYobhi isenza siwaqonde ngakumbi amacebo kaSathana yaye isinceda sibone indlela olunxibelelene ngayo ulongamo lukaYehova lwendalo iphela nengqibelelo yomntu. NjengoYobhi, bonke abamthandayo uThixo bamele bavavanywe. Nathi sinokunyamezela njengoko uYobhi wenzayo, singqine uSathana elixoki, size sinandiphe iintsikelelo zoBukumkani bukaThixo.—11/15, iphepha 20.
▫ Usihlalo wequmrhu labadala unokukubonisa njani ukumgqala ngokufanelekileyo umdala ngamnye?
Nanini na kunokwenzeka usihlalo ufanele alungiselele ucwangciso lwentlanganiso kusengaphambili ukuze abanye abadala babe nexesha lokuwuqwalasela ngenyameko nangomthandazo umbandela ngamnye oza kuxutyushwa. Kwintlanganiso yabadala, akasayi kuzama ukuphembelela iingcamango zabadala kodwa uya kubakhuthaza ukuba bathethe ‘ngokungafihlisi’ kwimibandela exutyushwayo. (1 Timoti 3:13)—12/1, iphepha 30.