“Uxolo lukaThixo, olugqithisele kuko konke ukuqonda”
UKUTYHUBELA imbali, abakhonzi bakaThixo abathembekileyo baye banyamezela amaxesha okubandezeleka ngokuqatha ngokweemvakalelo. Hayi indlela okuyinyaniso ngakumbi ngayo oku namhlanje, ekubeni siphila ‘kumaxesha anomngcipheko ekunzima ukuhlangabezana nawo’! (2 Timoti 3:1, NW) Umpostile uPawulos waluleka amaKristu ukuba alahlele amaxhala awo kuYehova ngomthandazo. Ngawuphi umphumo? “Uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.”—Filipi 4:7.
Luyintoni olu “xolo lukaThixo”? Yinzolo ebangelwa kukuba nolwalamano olusondeleyo noMdali. Ukusondelelana okunjalo kusinika ulweyiseko lokuba, kungakhathaliseki ukuba sibandezeleke njani, uYehova “akayi kubalahla abantu bakhe; akayi kubashiya abo bangabakhe.”—INdumiso 94:14, Today’s English Version.
Oku akuthethi kuthi sikhuseleke ngokupheleleyo kwinkxwaleko. Umdumisi wabhala: “Buninzi ububi obulihlelayo ilungisa.” (INdumiso 34:19) Kodwa uxolo lukaThixo lunokubangela isiqabu. Njani?
Uxolo lukaThixo ‘lugqithisele kuko konke ukuqonda,’ wabhala watsho uPawulos—okanye njengokuba inguqulelo yeConcordant Version isitsho, “luphakame kuyo yonke ingqiqo.” Ixhala linokusibangela sivakalelwe ngeendlela ezahlukahlukeneyo ezidandathekisayo. (INtshumayeli 7:7) Sekunjalo, uxolo lukaThixo lunokusomeleza, ngokukodwa xa sifuna “incamisa yamandla.”—2 Korinte 4:7; 2 Timoti 1:7.
Ngokubhekele phaya, uxolo lukaThixo luyasikhusela. Lunako ‘ukuzigcina iintliziyo zenu neengqiqo zenu,’ njengokuba uPawulos wabhalela abaseFilipi. Igama lesiGrike eliguqulelwe ngokuthi “ukuzigcina” libinzana elisetyenziswa emkhosini elisenokubangela ubani abe nomfanekiso-ngqondweni wabalindi belinde imini nobusuku. Ngokufanayo, uxolo lukaThixo lunokusebenza iiyure ezingama-24 njengomlindi weentliziyo neengqiqo zethu.—1 Korinte 10:13; thelekisa eyabase-Efese 4:26.
Xa siqwalasela ucelomngeni olunzima esijamelana nalo namhlanje, ngaba asimele sibe nombulelo ngoxolo lukaThixo?—INdumiso 18:2; thelekisa iEksodus 40:38.