“Andizange Ndiyibone Into Enje!”

NGOWE-1993 iofisi yeWatch Tower Society eArgentina yacelwa ukuba ithumele iindwendwe eziliwaka eSantiago, eChile, kwiNdibano Yesithili “Yemfundiso Yobuthixo” yamaNgqina kaYehova yeentsuku ezine. Esi yayisisihlandlo sokuqala ukuba amaNgqina aseArgentina amenywe njengeqela elikhulu ukuba aye kwindibano ekwelinye ilizwe.a Asabela njani? Izicelo ezingaphezu kwama-8 500 zeza zithontelana, ekwathi kuzo kwakhethwa ezili-1 039.

Babeli-14 bebonke ooduladula ababeqeshelwe olu hambo lweekhilomitha ezili-1 400 ukusuka eBuenos Aires ukuya eSantiago. Olu hambo lweeyure ezingama-26 lwenziwa mnandi ngakumbi kukubona iindawo ezintle zelizwe. Xa zazinqumla iiNtaba zeAndes, iindwendwe zadlula kufutshane neAconcagua, ekubeni iziimitha ezingama-6 960, yeyona ndawo iphakamileyo kwisiqingatha Somhlaba sangaseNtshona. Eyona nto ikhumbuleka ngokukodwa yindlela emqengqelezi nenamajikojiko engena eChile. Abaqhubi baqhwatyelwa izandla kakhulu ngobuchule babo bokuqhuba kakuhle kwiindlela ekunzima ukuqhuba kuzo!

Noko ke, owona mbono mhle wawusendibanweni. Kwihlabathi elizaliswe yintiyo nengcinezelo yobuhlanga, hayi indlela ekwakuhlaziya ngayo ukubona isihlwele esasikho sabangama-80 000 esisuka kumazwe angama-24—ubuzalwana bezizwe ngezizwe ngokwenene! Emva kokulubona ngokoqobo umanyano oluphakathi kwabo babeze endibanweni, bambi kubaqhubi booduladula bathi babenomdla wokufunda okungakumbi ngamaNgqina kaYehova. Omnye wabo wathi: “Andizange ndiyibone into enje!”

[Umbhalo osemazantsi]