Ngubani Olawulayo?

“NGUBANI olawula ihlabathi?” Ukuba ubani wayenokukubuza lo mbuzo, ubuya kuphendula uthini? Inkoliso yabantu bonqulo isenokuthi “nguThixo” okanye “nguYesu.” Inqaku elikwiThe Freeport News, iphephandaba lakwiiBahamas, lanikela impendulo abambalwa ababeya kuyilindela.

“Ndafumana iphecana ngaphambi komnyango wam,” umbhali weli nqaku wavula ngala magqabaza. “Ngokuqhelekileyo bendingayinanzi into endiyifumana emnyango, kodwa eli xesha ndagqiba ekubeni ndiyifunde. Umxholo wawubuza lo mbuzo, ‘Ngubani Olawula Ihlabathi?’” Ngokufunda iphecana elisekelwe eBhayibhileni, eli bhinqa lafunda ukuba umlawuli weli hlabathi asingoThixo ingenguye noYesu kodwa nguSathana uMtyholi.—Yohane 12:31; 14:30; 16:11; 1 Yohane 5:19.

Eli phecana liyacacisa: “Khawucinge ngezenzo zolunya ezimanyumnyezi eziye zenziwa ngokungenalusini. Abantu baye basebenzisa amagumbi anegesi eyityhefu, iinkampu zoxinaniso, imijukujelwa yomlilo, iibhombu zepetroli, kwanezinye iindlela ezimasikizi ukuze bangcungcuthekisane baze babulalane ngokungenanceba. . . . Ngawaphi amandla ashukumisela abantu ekwenzeni izenzo ezikhohlakele ngolo hlobo okanye abashukumisela kwiimeko ezibenza bazive benyanzelekile ukwenza izenzo zenkohlakalo? Ngaba wakha wazibuza enoba amandla angendawo nangabonakaliyo aphembelela abantu ukuba benze izenzo zogonyamelo ezinjalo?” Ngaba kuyamangalisa ukuba iBhayibhile ibiza uSathana ngokuthi “uthixo wale nkqubo yezinto”?—2 Korinte 4:4.

Okuvuyisayo kukuba, lisondele ixesha laxa uSathana needemon zakhe beya kuba bengasekho. “Ihlabathi liyadlula yaye kunjalo nangomnqweno walo, kodwa lowo wenza ukuthanda kukaThixo uhleli ngonaphakade.” (1 Yohane 2:17) Ewe, iBhayibhile ithembisa ukuba abo benza ukuthanda kukaThixo baya kuba nethemba lokuphila ngonaphakade kwihlabathi elitsha lobulungisa. (INdumiso 37:9-11; 2 Petros 3:13; ISityhilelo 21:3, 4) Kuya kuthi qabu uNoqolomba efile nje xa iimpembelelo ezingendawo zikaSathana needemon zakhe ziya kube zishenxisiwe!

Emva kokushwankathela okuqulethwe leli phecana lincinane, umbhali weli nqaku elikwiThe Freeport News waqukumbela ngokuthi: “Ndivuya ngokwenene kuba ndilifundile ela phecana . . . ngenxa yokuba nam bendisoloko ndixhalabile ngemeko yehlabathi nokwazi lowo ulilawulayo.”