Isiqithi Esikwanti Nesincinane

NGOKUFUTHI isiqithi saseSt. Helena sichazwa ngokuthi “sikwanti” yaye “sincinane.” Oku kuyafaneleka, kuba esi siqithi, esiziikhilomitha ezili-17 ubude neekhilomitha ezili-10 ububanzi, sikwiikhilomitha ezili-1 950 ukusuka kowona mhlaba ukufutshane, kunxweme olukumazantsi-ntshona Afrika. Kulapha apho uNapoléon Bonaparte wathunyelwa khona njengomthinjwa owoyisiweyo ngowe-1815 ngaphambi kokufa kwakhe.

Kulwandlekazi esi siqithi sikhangeleka njengenqaba enkulu. Kanye kanye siyintaba-mlilo engasenamlilo enyuka iphuma kwiAtlantiki ngeemitha ezingama-500 ukuya kwezingama-700 ukuphakama. Kumbindi waso, kumi iNtaba iActaeon eziimitha ezingama-818 ubude nephakame kunaso sonke esi siqithi. Ngenxa yomoya opholileyo ovela kulwandlekazi loMzantsi Atlantiki nomsinga wolu lwandlekazi, ngokuqhelekileyo esi siqithi sinemozulu epholileyo nentle. Kodwa ukusuka kunxweme olusemazantsi ukusa kumbindi oneentaba, imozulu yahlukahlukene ngokunjalo nezityalo.

ISt. Helena ibisoloko iphantsi kweBritani ukusukela ekupheleni kwenkulungwane ye-17. Iqaqobana labantu balapha abangama-5 000 ngumxube wabantu abasuka eYurophu, eAsia naseAfrika. Kusetyenziswa isiNgesi kuso sonke esi siqithi, kodwa sithethwa ngemvakalozwi eyahlukileyo. Akukho sikhululo seenqwelo-moya apha; eyona ndlela yokufikelela kwezinye iindawo kukuhamba ngenqanawa, nabantu abaya rhoqo eMzantsi Afrika naseNgilani. Enyanisweni, kuye kwaqalisa ukubakho kweenkqubo zikamabonwakude kuphela ngeminyaka yee-1990, sikothulel’ umnqwazi ukubakho kwesatellite.

Ngasekuqaleni kweminyaka yee-1930, iindaba ezilungileyo zoBukumkani bukaThixo zafikelela kwesi siqithi okwesihlandlo sokuqala. (Mateyu 24:​14) Ukutyhubela iminyaka, abantu abaninzi abahlala kwesi siqithi baye babamkela obu butyebi obenza izinto eziphathekayo zibonakale zingabalulekanga. (Mateyu 6:​19, 20) Namhlanje, iSt. Helena ibalasele kuba inomlinganiselo weNgqina eli-⁠1 kubemi abangama-31, owona mlinganiselo unkqenkqeza phambili kwihlabathi lonke!

[Iimaphu ezikwiphepha 24]

(Ukuba ufuna inkcazelo ehlahlelwe kakuhle, yiya kwimpapasho)

St. Helena

JAMESTOWN

AFRICA

ATLANTIC

OCEAN

St. Helena

Levelwood