Ukhokelo Lokukhetha Izinxulumani Ezilungileyo

ABASELULA babuza koontanga babo kunokuba babuze kubazali babo ngempahla nangomculo, yatsho enye ingxelo ekwiReader’s Digest. Ngoko kubalulekile ukuba abazali babazi abantu abanxulumana nabantwana babo nendawo abadibana kuyo.

UEsmé van Rensburg, ongumhlohli omkhulu kwicandelo lenzululwazi ngengqondo kwiyunivesithi ekuMzantsi Afrika uthi: “Yimbopheleleko yakho ukuphanda.” Wongezelela athi: “Kunokwenzeka ukuba umntwana wakho uya kucaphuka koko, kodwa uya kuzola kamva.” Wandula ke abacebise abazali esithi. Imithetho imele ibe sengqiqweni yaye ibe nemigaqo esekelwe kuyo; mphulaphule umntwana wakho; ungasabeli ngendlela egqith’ emgceni kodwa yiba ngozolileyo, uze ukwazi oko ufuna ukukuthetha. Ukuba umntwana wakho sele enabahlobo abangalunganga, gxininisa kwindlela engalunganga obuye banayo obo buhlobo kunokuba umthintele ukuba aphinde anxulumane nabo.

Icebiso elisebenzisekayo kubazali kudala likho eLizwini likaThixo, iBhayibhile. Ngokomzekelo, ithi: “Umele akhawuleze ukuva, acothe ukuthetha, acothe ukuqumba.” (Yakobi 1:​19) Kwakhona iZibhalo zinikela icebiso ekukhetheni izinxulumani: “Ohamba nezilumko uba sisilumko naye; ke olikholwane lesidenge uya konakaliswa.” (IMizekeliso 13:​20) Le mizekelo ibonisa ubulumko obukhoyo kwabo bafundisisa iBhayibhile ngoxabiso baze bakusebenzise oko ikuthethayo kubomi babo bemihla ngemihla.