Ubuhle Bangaphakathi Bunexabiso Elihlala Lihleli

“UMFANA UDLA NGOKUGQALA UBUHLE NJENGENTO ELINGANA NOKULUNGA,” WATSHO OMNYE UMKRISTU OTHEMBEKILEYO NOSELE EKHULILE.

Ewe, kudala umntu egxininisa kubuhle benkangeleko, nto leyo edla ngokubangela ukuba zingaqondwa kakuhle iimpawu zangaphakathi. Noko ke, uMdali wethu ukhangela oko sikuko ngaphakathi, kungakhathaliseki ukuba inkangeleko yethu injani na. Ngale ndlela umisele owona mzekelo mhle wokujonga izinto ngeliso eliqolileyo. Ngokutsho kweBhayibhile, uThixo uthi: “Indlela abona ngayo umntu asiyondlela abona ngayo uThixo, ngenxa yokuba umntu nje ubona okubonakalayo emehlweni; kodwa uYehova yena, ubona oko ikuko intliziyo.”—1 Samuweli 16:7.

UThixo unguMthombo wobuhle bokwenene ebantwini, yaye iLizwi lakhe lithi xa ehlola ukufaneleka kukabani, iimpawu zokomoya ziba zezona zibalulekileyo. IBhayibhile ithi: “Umtsalane usenokuba yinkohliso, nobuhle busenokuba lilize; kodwa ngumfazi owoyika uYehova oya kudunyiswa.” (IMizekeliso 31:30) Okunene, ubuhle benkangeleko bunokufihla ubungxathu bangaphakathi. (Estere 1:10-12; IMizekeliso 11:22) Nangona ubuhle bomzimba bunokuphela ekuhambeni kwexesha, ubuhle bangaphakathi—iimpawu zentliziyo—bunokukhula buze buhlale buhleli.

Ngoko, hayi indlela ekububulumko ngayo ukuhlakulela iimpawu ezinjengothando, uvuyo, uxolo, ukuzeka kade umsindo, ububele, ukulunga, ukholo, ubulali nokuzeyisa! (Galati 5:22, 23) Ngaloo ndlela sinako ukubufumana ubuhle bangaphakathi, eneneni obuhlala buhleli.—1 Petros 3:3, 4.