Indlela Abamelana Ngayo Nengcinezelo Yoontanga

UKUFUNA ukwamkeleka kuphembelela abaninzi ukuba benze ngokuvumelana neengcinga nezenzo zoontanga babo. Abantu abaselula kufuneka bakwazi ngakumbi ukwala ukubandakanyeka kwimikhwa eyingozi, njengokusebenzisa kakubi iziyobisi nokuziphatha kakubi ngokwesini. Banokumelana njani nengcinezelo yoontanga?

Kutshanje amantombazana amabini akwishumi elivisayo ePoland abhale oku: “Umoya wehlabathi ubonakala ngokucacileyo phakathi koontanga bethu abaninzi. Bayaqhatha kwizifundo zabo, bathetha izinto ezingcolileyo, yaye bayazithanda izinxibo zezimbo ezithile nezigqith’ emgceni, nomculo othob’ isidima. Hayi indlela esivuya ngayo kuba sinamanqaku abhekiswe kuthi bantu abaselula nasikhuselayo kwimpembelelo yabakwishumi elivisayo abanganelisekiyo nabavukelayo!

“Hayi indlela esinombulelo ngayo ngamanqaku eMboniselo aye asibonisa ukuba thina bantu baselula siyafunwa yaye siyaxatyiswa. Isiluleko seBhayibhile esiye sasifumana siye sasinceda ukuba sihambe ngendlela efanelekileyo ukuze siqhubeke simkholisa uYehova uThixo. Siqinisekile ukuba ukukhonza uYehova ngokuthembeka yeyona ndlela ilungileyo ebomini.”

Ewe, abantu abaselula banako ukumelana nengcinezelo yoontanga. Ngokuqeqesha ‘amandla alo okuqonda,’ ulutsha olungamaKristu lufunda ukwenza izigqibo zobulumko ezingabonakalisi “umoya wehlabathi” kodwa kunoko ezibonakalisa, “umoya ovela kuThixo.”—Hebhere 5:14; 1 Korinte 2:12.