Yiba Nombulelo Uze Wonwabe

“UKUBA nombulelo yinto ebalulekileyo emntwini,” yatsho njalo iCalgary Herald, iphephandaba laseKhanada. Le Herald yacaphula abafundi besikolo samabanga aphantsi abaneminyaka esithoba ubudala abacelwa ngumfundisi-ntsapho wabo ukuba babhale ngazo zonke izinto ababenombulelo ngazo. Omnye oselula wathi wayenombulelo kwintsapho yakhe ‘kuba yayimnyamekela.’ Nenye intombazana eselula yayinombulelo kwintsapho yayo, isithi: “Bandigcina ndikhuselekile, ndisempilweni, bayandinyamekela, bayandithanda, bayandondla, yaye ukuba ibingengenxa yabazali bam, ngendingekho emhlabeni ngoku.”

Ukungabi nambulelo kubangela ukunganeliseki okukhulu. Ngokutsho kwesithandi sobulumko nomfundi wezakwalizwi uJ. I. Packer, “sadalelwa ukuze sixhomekeke kuThixo nakwabanye abantu.” Oku kusikhumbuza ngesiluleko sobulumko seBhayibhile esabhalwa kwiinkulungwane ezadlulayo, esithi: “Hlalani ninombulelo.” (Kolose 3:15) Amazwi ombulelo nokubonakalisa uxabiso olusuka entliziyweni kunceda ukuhlakulela ulwalamano olunenkathalo.

Ngaphezu koko, ngokuba nombulelo nokubaxabisa abanye, sikwabonisa ukuba sinombulelo kuYehova, yaye uyakubona oku. IBhayibhile ithi: “Amehlo [kaYehova] asingasinga emhlabeni wonke ukuba ababonise amandla abo bantliziyo ziphelele kuye.” (2 Kronike 16:9) UThixo uyasiqinisekisa ukuba uyalukhumbula yaye uyaluxabisa uthando abantu abalubonisa kwigama lakhe. (Hebhere 6:10) Ewe, sinezizathu ezintle zokubonisa ukuba sinombulelo kuba olu phawu lobuthixo, xa luboniswa imihla ngemihla, luyamkholisa uYehova yaye oko kongeza ulonwabo kuthi. Kunjengokuba IMizekeliso 15:13 isitsho: “Intliziyo evuyayo iba nomphumo omhle kwinkangeleko.”