“Ekugqibeleni Ndiyayazi Ingxaki Endinayo!”

LEYO yindlela eyavakalelwa ngayo enye indoda yaseTokyo xa yafunda ibali lobomi kwinkupho yeMboniselo kaDisemba 1, 2000. Elo nqaku lalinomxholo othi “Anikwazi Oko Ubomi Benu Buya Kuba Kuko Ngomso,” yaye lalibalisa amava omnye umzalwana owayekade engumvangeli wasemazweni onesifo esaziwa kwezonyango njengemanic-depressive psychosis (isifo sokuxinezeleka kwengqondo).

Kwileta eyayibhalela abapapashi beli phephancwadi le ndoda yaseTokyo yathi: “Iimpawu zesi sifo yaba zezi ndinazo. Ngoko ndaya kwisibhedlele sabagula ngengqondo ndaza ndafumanisa ukuba ndinesifo sokuxinezeleka kwengqondo. Ugqirha owayendihlola wathi khamnqa. Wathi, ‘Abantu abanesi sifo abafane bacinge ukuba bayagula.’ Ndancedwa ndasibona esi sifo ngaphambi kokuba sihambele phambili.”

Izigidi zabantu ehlabathini lonke zingenelwa ngeendlela ezahlukahlukeneyo ngokufunda inkupho nganye yeMboniselo nephephancwadi elihambisana nayo, uVukani! Zifumanisa ukuba amanqaku azo ayafundisa yaye ayanelisa. Ngoku iphephancwadi iMboniselo lishicilelwa ngeelwimi ezili-141, yaye uVukani! upapashwa ngeelwimi ezingama-86. Nawe uya kukunandipha ukufunda iMboniselo noVukani! rhoqo.