Imisebenzi Emihle Izukisa UThixo
NGEHAMBO yawo entle nemisebenzi engumzekelo, amaKristu okwenyaniso azukisa uThixo. (1 Petros 2:12) Oku kusenokubonwa koko kwenzeka eItali kwiminyaka yakutshanje.
NgoSeptemba 1997, kwabakho inyikima enkulu kwiinxalenye ezahlukahlukeneyo kummandla waseMarche nowaseUmbria, isonakalisa phantse amakhaya angama-90 000. Amaqela amaNgqina kaYehova anikela uncedo kwangoko kubazalwana bawo nakwabanye. Kwanikelwa ngeenqwelana, iingxowa zokulala (sleeping bags), izitovu, oomatshini bokuvelisa umbane nezinye izinto eziyimfuneko. Abathile bayiphawula le migudu yokunikela uncedo.
Iphephandaba iIl Centro lathi: “Abantu bokuqala abeza kunikela uncedo kwiindawo ezichaphazelekileyo ngamaNgqina kaYehova aseRoseto [kwiphondo laseTeramo] . . . Phezu kwako nje ukuhlanganisana kwabo ngamathuba athile ukuze bathandaze, abo bathembekileyo kuYehova basebenza ngokoqobo, benceda abo babandezelekileyo, kungakhathaliseki unqulo abakulo.”
Usodolophu waseNocera Umbra, enye yeedolophu ezachaphazeleka kakhulu, wabhalela amaNgqina esithi: “Ndinibulela ngokusuka entliziyweni nangokobuqu ngokunikela uncedo kubantu baseNocera. Ndiqinisekile ukuba ndithethela bonke abemi balapho.” Ngaphezu koko, iSebe Lemicimbi Yezasekhaya lanika iCongregazione Cristiana dei Testimoni di Geova (Ibandla LamaKristu LamaNgqina KaYehova) isiqinisekiso somsebenzi omhle nembasa “yokungqinela umsebenzi owenziweyo nenkuthalo kwimisebenzi ephathelele nongxamiseko olwavela kwimimandla yaseUmbria naseMarche.”
Ngo-Oktobha wowama-2000, isikhukula esitshabalalisayo sabetha ummandla wasePiedmont kumntla weItali. Kwakhona, ngoko nangoko amaNgqina anikela uncedo. Le misebenzi mihle nayo yaphawulwa. UMmandla wasePiedmont wawanika ilitye eliyimbasa ngenxa “yomsebenzi wawo wokuzithandela oxabisekileyo ekuxhaseni abantu basePiedmont ababethwaxwe sesi sikhukula.”
UYesu Kristu wayalela abafundi bakhe esithi: “Malukhanye ngokunjalo ukhanyiselo lwenu phambi kwabantu, ukuze babone imisebenzi yenu emihle baze bazukise uYihlo osemazulwini.” (Mateyu 5:16) Ngovuyo amaNgqina kaYehova azukisa uThixo, kungekhona wona, ngokwenza “imisebenzi emihle” enceda abamelwane bawo ngokomoya nangezinye iindlela.