Balumkile Ngeyabo Indlela
“ABANTU abadala banobulumko, kodwa abantwana balumkile ngeyabo indlela,” litsho iqhalo laseNigeria. UEdwin, umdala ongumKristu eNigeria, wakufumanisa kuyinyaniso oku.
Ngenye imini, uEdwin wafumana ibhokisi yentsimbi phantsi kwedesika yakhe emzini wakhe.
“Yekabani le bhokisi?” UEdwin wabuza abantwana bakhe abathathu.
UEmmanuel oneminyaka esibhozo ubudala waphendula: “Yeyam.” Ngokukhawuleza wahlabela mgama echaza ukuba le bhokisi yentsimbi enomhlwa neziiskwesentimitha ezili-12 enomngxuma phezulu yayiyeyeminikelo yomsebenzi owenziwa ehlabathini lonke wamaNgqina kaYehova. Wacacisa esithi: “Ekubeni ndingayi yonke imihla kwiHolo yoBukumkani, ndiye ndagqiba kwelokuba ndenze ibhokisi ukuze nanini na ndingayisebenzisi imali yam yokuthenga amashwamshwam, ndikwazi ukuyifaka kule bhokisi.”
Utata kaEmmanuel wayenebhokisi ekhaya yokonga imali yokuya kwindibano yesithili yaminyaka le. Kodwa ngenxa yengxaki eyayingalindelekanga yentsapho, bayisebenzisa loo mali eyayilapho. Ukuze aqiniseke ukuba le mali ayisayi kusetyenziselwa enye injongo, uEmmanuel wasa itoti endala kumntu odibanisa izinto zentsimbi ukuze ayivale. Lo mntu udibanisa iintsimbi, xa efumanisa injongo yale toti, wenzela uEmmanuel le bhokisi ngeentsimbi ezindala. UMichael, umninawa kaEmmanuel oneminyaka emihlanu ubudala, naye wacela eyakhe ibhokisi.
Othuswe koko kwenziwe ngaba bantwana, uEdwin wababuza ngesizathu sokwenza ezi bhokisi. UMichael waphendula: “Ndifuna ukunikela!”
Abazali babo bengazi, uEmmanuel, uMichael noUchei, udade wabo oneminyaka esithoba ubudala, bebesoloko begcina inxalenye yemali yabo yamashwamshwam ngokuyifaka kwezi bhokisi. Balifumana phi eli cebo? Kungekudala emva kokuba aba bantwana bebadala ngokwaneleyo ukuba baphathe imali, abazali babo babafundisa ukuba bafake imali ethile kwibhokisi yomnikelo kwiHolo yoBukumkani. Ngokucacileyo, aba bantwana bafunda isifundo esihle.
Zathi zakuzala ezi bhokisi, zavulwa. Imali eyayilapho yafikelela kwii-R27,42—imali engencinane kwilizwe apho imali efunyanwa ngonyaka ingaphantsi kwee-R3 000. Iminikelo enjalo yokuzithandela ixhasa umsebenzi wokushumayela wamaNgqina kaYehova ngoku owenziwa kumazwe angama-235 ehlabathini lonke.