“Ungumfazi Obalaseleyo”

La mazwi okuncoma abhekiselwa kumMowabhikazi oselula. Wayengumhlolokazi ogama linguRute, umolokazana womfazi ongumSirayeli, uNahomi. URute owayehlala kwaSirayeli malunga neminyaka engama-3 000 eyadlulayo, ngexesha lokulawula kwabagwebi, wazenzela igama elihle. (Rute 3:11) Walufumana njani olu dumo luhle? Ngoobani abanokuzuza kulo mzekelo wakhe?

URute wayengasidli “isonka sobuvila,” wayesebenza ixesha elide yaye ezibhokoxa njengombhikici emasimini, wanconywa ngokukhuthala kwakhe. Naxa wathenjiswa ngokwenziwa lula komsebenzi wakhe, waqhubeka esebenza nzima, esenza okungaphezu koko kwakulindelekile. Wayefana nqwa nomfazi ofanelekileyo nokhutheleyo onconywa eBhayibhileni.—IMizekeliso 31:10-31; Rute 2:7, 15-17.

Eyona nto yayimenza ukuba uRute anconywe ngabantu yayiziimpawu awayenazo zokomoya—ukuthobeka kwakhe, isimo sengqondo sokuzincama nothando lwakhe olunyanisekileyo. Eshiya abazali bakhe nelizwe lakhe lokuzalwa, engenathemba lokufumana unqabiseko olunokufumaneka emtshatweni, wanamathela kuNahomi. Kwangaxeshanye, uRute wavakalisa umnqweno wakhe wokukhonza uYehova, uThixo kaninazala. Ibalaselisa indlela awayexabiseke ngayo, ingxelo yeZibhalo ithi ‘wayelunge ngakumbi [kuNahomi] kunoonyana abasixhenxe.”—Rute 1:16, 17; 2:11, 12; 4:15.

Nangona ihambo kaRute yayinconywa zizinxulumani zakhe, okona kubaluleke gqitha yayikukuxabiseka kweempawu zakhe kuThixo, nokumvuza kwakhe ngelungelo lokuba ngukhokhokazi kaYesu Kristu. (Mateyu 1:5; 1 Petros 3:4) URute ungoyena mzekelo mhle kungekuphela nje kubafazi abangamaKristu kodwa kubo bonke abo bazibanga benqula uYehova!