Ngaba Le Nkulungwane Ibilawulwa NguSathana?

“INDLELA izinto eziye zambi ngayo, eneneni le nkulungwane iye yalawulwa nguSathana. Kunanini na ngaphambili, abantu baye balungela baze bafuna ukubulala abantu abaninzi gqitha ngenxa yobuhlanga, unqulo, okanye isikhundla.”

Isikhumbuzo sama-50 sokukhululeka kwabantu abamsulwa ababevalelwe kwiinkampu zoxinaniso zamaNazi sakhokelela ukuba iphephandaba iThe New York Times kaJanuwari 26, 1995 lithethe la mazwi engasentla. UkuBulawa Kwabantu Ngenkohlakalo—eyona ndyikitya yokufa yakhe yakho embalini—kwasuba imiphefumlo yamaYuda enokuba zizigidi ezithandathu. Phantse abemi basePoland abanokuba zizigidi ezintathu abangengomaYuda bafa koko kuye kwakubizwa ngokuthi yi-“Forgotten Holocaust.”

Kwincwadi yakhe ethi Humanity—A Moral History of the Twentieth Century uJonathan Glover uthi: “Kuqikelelwa ukuba ukususela ngowe-1900 ukusa kowe-1989 kuye kwabulawa abantu abazizigidi ezingama-86 ezimfazweni.” Uhlabela mgama esithi: “Kwiimfazwe zenkulungwane yamashumi amabini kuye kwafa abantu abaninzi ngendlela engathethekiyo. Naluphi na uqikelelo lwabantu abafayo aluchananga, ekubeni abantu ababini kwabathathu (izigidi ezingama-58) babulawa kwiimfazwe ezimbini zehlabathi. Kodwa, ukuba bekusifa inani labantu elilinganayo suku ngalunye ukususela ngelo xesha, oko ngekuthetha ukuba iimfazwe zibulele abantu abanokuba ngama-2 500 suku ngalunye, nto leyo ethetha ukuba kwiyure nganye kufa abantu abangaphezu kwe-100, imini nobusuku, kangangeminyaka engamashumi asithoba.”

Ngenxa yoko, inkulungwane yama-20 iye yabizwa ngokuba yeyona nkulungwane eye yachitha elona gazi lininzi embalini. UNadezhda Mandelstam kwincwadi ethi Hope Against Hope uthi: “Kuye kwakho ububi obuninzi emva kokuwohloka kwemigaqo yabantu yokuziphatha.” Kumlo phakathi kokulungileyo nokubi, ngaba ngokwenene ububi buye boyisa?

[Inkcazelo Ngomfanekiso okwiphepha 2]

COVER: Mother and daughter: J.R. Ripper/SocialPhotos

[Inkcazelo Ngomfanekiso okwiphepha 3]

U.S. Department of Energy photograph