Uthando Lungundoqo
KUNGAKHATHALISEKI ukuba badala kangakanani na, banayiphi imvelaphi, bathetha luphi ulwimi, okanye baluluphi uhlanga, bonke abantu bayafuna ukuthandwa. Ukuba akukho mntu ubathandayo, abonwabi. Ugqirha othile wabhala: “Uthando lunokuyichaphazela ngokunzulu impilo yethu, ukuba asithandwa sisenokudandatheka yaye singonwabi, yaye ukuba siyathandwa sinokuhlala sonwabile yaye sisempilweni. Ukuba bekukho iyeza elitsha elinceda ngale ndlela phantse wonke ugqirha kwelo lizwe ebeya kulinika abo bagulayo. Bekuya kuba yinto embi ukungabaniki eli yeza.”
Sekunjalo, abantu namhlanje, ingakumbi ijelo leendaba nabantu abadumileyo, badla ngokugxininisa kakhulu kubutyebi, kwigunya, kudumo nakwisini kunemfuno yabantu yokuba nolwalamano olusenyongweni nabanye abantu. Ootitshala abaninzi badla ngokugxininisa kusukelo nakwimisebenzi yehlabathi, besithi ukuze umntu aphumelele ufanele aphumeze ezi zinto. Liyinyaniso elokuba, imfundo nokuphucula iziphiwo zikabani kubalulekile, kodwa ngaba zifanele zibaluleke kangako kangangokuba ubani angabi nalo ixesha lentsapho nabahlobo? Umbhali wamandulo owayesisifundiswa nowayeneliso elibukhali wafanisa umntu onesiphiwo kodwa ongenalo uthando ‘njengexina ehlokomayo okanye icangci elikhenkcezayo.’ (1 Korinte 13:1) Abantu abanjalo basenokuba zizityebi, bade badume, kodwa bangaze bonwabe ngokwenene.
UYesu Kristu, owayebaqonda kakuhle yaye ebathanda abantu, kwimfundiso yakhe wakubalaselisa ukuthanda uThixo nommelwane. Wathi: “Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela. . . . Uze umthande ummelwane wakho njengawe siqu.” (Mateyu 22:37-39) Ngabo babewathobela la mazwi kuphela ababeya kuba ngabafundi bakaYesu bokwenene. Kungoko ke wathi: “Ngako oko bonke baya kwazi ukuba ningabafundi bam, ukuba ninothando phakathi kwenu.”—Yohane 13:35.
Kodwa ke, umntu unokuluhlakulela njani uthando kweli hlabathi lanamhlanje? Yaye abazali banokubafundisa njani abantwana babo ukubonakalisa uthando? Inqaku elilandelayo liya kuphendula le mibuzo.
[Imifanekiso ekwiphepha 3]
Kunzima ukuhlakulela uthando kwihlabathi elizele kukunyoluka