Ngaba “Ukhaba Iimviko”?

NGAMAXESHA okubhalwa kweBhayibhile, uviko—uluthi olude, oludla ngokubazwa luze lube nesikhonkwane esibukhali ngaphambili—lwalusetyenziselwa ukuqhuba nokukhokela izilwanyana ezitsala imithwalo enzima. Kwakusenzeka ntoni xa ngenkani isilwanyana sixhathisa size sikhabe njengoko sinyolwa ngoviko? Kunokuba sifumane isiqabu, sasizivisa iintlungu.

UYesu Kristu ovusiweyo wathetha ngeemviko xa wabonakala kwindoda egama linguSawule, eyayisiya kubamba abanye babafundi bakaYesu. USawule waphandlwa kukukhanya okuqaqambileyo, waza weva uYesu esithi: “Sawule, Sawule, unditshutshiselani na? Wenzakala ukhaba iimviko nje.” Ngokuphatha kakubi amaKristu, uSawule wayesilwa noThixo, esenza into eyayinokumenzakalisa.—IZenzo 26:14.

Ngaba nathi singaqondanga ‘sinokukhaba iimviko’? IBhayibhile ifanisa “amazwi ezilumko” neemviko ezisikhuthaza ukuba sihambele phambili kwindlela efanelekileyo. (INtshumayeli 12:11) Isiluleko esiphefumlelweyo esikwiLizwi likaThixo sinokusikhuthaza size sisikhokele ngokuchanileyo—ukuba siyasivumela. (2 Timoti 3:16) Ukusigatya kunokusenzakalisa.

USawule wawaphulaphula amazwi kaYesu, waguqula ikhondo lakhe waza waba ngumpostile ongumKristu nothandekayo, uPawulos. Ukuphulaphula kwethu isiluleko sikaThixo ngokufanayo kuya kusizisela iintsikelelo ezingunaphakade.—IMizekeliso 3:1-6.

[Inkcazelo Ngomfanekiso okwiphepha 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers