Isazela Esinyanisekileyo

NGOXA wayegoduka evela emsebenzini, uCharles, osebenza kwiyunivesithi yaseKenya, walahlekelwa yicellular phone. EKenya, ezi fowuni zisabiza imali eninzi.

UCharles uthi: “Ndandingalindelanga ukuba kubekho umntu oyibuyisayo.” Noko ke, kwiintsuku ezimbalwa kamva, wamangaliswa kukufumana umnxeba ovela kwiofisi yesebe yamaNgqina kaYehova eKenya. Akazange akukholelwe oko wayekuva xa wacelwa ukuba aze kuthabatha icellular phone yakhe! Wafumanisa ukuba umlungiseleli wexesha elizeleyo wamaNgqina kaYehova wayekhwele kwisithuthi esinye noCharles waza wachola le fowuni. Ezama ukufumana umniniyo, wayisa kwiofisi yesebe, yaye abasebenzi balapho abangamatsha-ntliziyo ekugqibeleni bamfumana uCharles ngokusebenzisa inombolo eyayibhalwe kule fowuni.

Kwileta awayibhalela iofisi yesebe uCharles wathi: “Ndiyixabisa gqitha imigudu eyenziweyo ukuze kuqhagamshelwane nam phezu kwazo nje iingxaki ebezibandakanyekile. Ndiwabulela ngokunyanisekileyo amalungu entlangano yenu aye achola le cellular phone, afumanisa ukuba yeyam, aza ayibuyisa. Akulula ukufumana umntu onyanisekileyo namhlanje, kodwa kuyakhuthaza ukuba nabathile abahlukileyo njengamaNgqina kaYehova uThixo anyanisekileyo.”

Kuyo yonke indawo amaNgqina kaYehova aziwa ngokunyaniseka. Axelisa umpostile uPawulos, owathi: “Siyathemba ukuba sinesazela esinyanisekileyo, njengoko sinqwenela ukuziphatha ngokunyaniseka kwizinto zonke.” (Hebhere 13:18; 1 Korinte 11:1) Ayaqonda ukuba ihambo enjalo izukisa uYehova uThixo, njengoko uYesu wathi: “Malukhanye . . . ukhanyiselo lwenu phambi kwabantu, ukuze babone imisebenzi yenu emihle baze bazukise uYihlo osemazulwini.”—Mateyu 5:16.