Intuthuzelo Kwababandezelekileyo
XA AMADODA namabhinqa athembekileyo ayebandezelekile, athandaza kuThixo ngokunyaniseka ecela ukhokelo. Kwakhona, athabatha amanyathelo afunekayo ukuze anciphise ukubandezeleka, njengokusebenzisa ubulumko ukuze abaleke kwabo babatshutshisayo. Ngokomzekelo, ukuthembela kukaDavide kuYehova kuquka nemigudu awayenzayo kwamenza wakunyamezela ukubandezeleka. Kuthekani ngathi namhlanje?
Xa ubandezelekile, kusenokwenzeka ukuba uye uthabath’ amanyathelo ukucombulula ingxaki yakho. Ngokomzekelo, ukuba akusebenzi, ngaba akwenzi mgudu wokufumana umsebenzi ofanelekileyo oya kukuxhasa wena nentsapho yakho? (1 Timoti 5:8) Okanye ukuba unesigulo esithile, ngaba akuzami ukufumana unyango olufanelekileyo? Kubangela umdla ukuba uYesu, owayenikwe nguThixo amandla okuphilisa zonke iintlobo zezifo, avume ukuba ‘abagulayo bafuna ugqirha.’ (Mateyu 9:12) Sekunjalo, iingxaki zakho zisenokungapheli zonke; kusenokufuneka uzinyamezele ukusa kwinqanaba elithile.
Kutheni ungathandazi kuYehova uThixo ngalo mbandela? Ngokomzekelo, xa sifuna umsebenzi, ukuthembela kuThixo nokuthandaza kuye kuya kusinceda sixhathise nasiphi na isilingo sokwamkela umsebenzi ongqubana nemigaqo yeBhayibhile. Kwakhona siya kukuphepha ‘ukulahlekana nokholo’ ngenxa yokubawa okanye ukuthanda imali. (1 Timoti 6:10) Eneneni, xa sisenza izigqibo ezibalulekileyo eziphathelele umsebenzi wempangelo, intsapho okanye iingxaki zempilo, sinokulandela isibongozo sikaDavide esithi: “Umthwalo wakho wulahlele kuYehova, yaye yena wokuxhasa. Akayi kuliyekela ilungisa lishukunyiswe.”—INdumiso 55:22.
Umthandazo osuka entliziyweni nawo uya kusinceda sihlale sinesimo sengqondo esilungeleleneyo ukuze ukubandezeleka kungasongameli. UmKristu wokwenyaniso, umpostile uPawulos wabhala: “Ezintweni zonke zaziseni izibongozo zenu kuThixo ngomthandazo nesikhungo nombulelo.” Yiyiphi indlela onokusithuthuzela ngayo umthandazo onyanisekileyo? “Uxolo lukaThixo olungaphaya kokuqonda luya kuzilinda iintliziyo zenu namandla enu engqondo ngoKristu Yesu.” (Filipi 4:6, 7) Uxolo lukaThixo “lungaphaya kokuqonda.” Ngoko ke, lunokusomeleza xa sithwaxwa ziingcinezelo. Luya ‘kuzilinda iintliziyo zethu namandla ethu engqondo,’ ngaloo ndlela lusinceda ukuba siphephe ukwenza izinto ngokungxama nangobudenge, nto leyo enokusenza sibandezeleke ngakumbi.
Umthandazo usenokuba negalelo elikhulu kwindlela izinto eziza kwenzeka ngayo. Xa umpostile uPawulos wayesentolongweni eRoma, ngokuthobeka wacela amanye amaKristu ukuba amthandazele. Kwakutheni ukuze uPawulos enze esi sicelo? Wawabhalela esithi: “Ndinibongoza ngokukodwa ngakumbi ukuba nenze oku, ukuze ndibuyiselwe kuni kamsinya.” (Hebhere 13:19) Ngamany’ amazwi, uPawulos wayesazi ukuba xa uYehova esiva imithandazo ezingisileyo yamanye amakholwa, oko kwakuza kuba negalelo kwixesha awayeya kukhululwa ngalo.—Filemon 22.
Ngaba umthandazo unokukuguqula oko kunokubangelwa kukubandezeleka? Usenokwenjenjalo. Sekunjalo, sifanele siqonde ukuba uYehova uThixo usenokungayiphenduli ngendlela esifuna ngayo imithandazo yethu. UPawulos wathandaza izihlandlo eziliqela ‘ngeliva elisenyameni’ yakhe, mhlawumbi isigulo esithile. Noko ke, kunokuba aphelise oko kubandezeleka, uThixo wathi kuPawulos: “Ububele bam obunganifanelanga bukulingene; kuba amandla am enziwa agqibelele kubuthathaka.”—2 Korinte 12:7-9.
Ngoko ke, ukubandezeleka kwethu kusenokungapheli ngokukhawuleza. Kodwa siya kuba nethuba lokubonisa ukuba sithembele ngoBawo wethu wasezulwini. (Yakobi 1:2-4) Qiniseka ukuba enoba uYehova uThixo akakuphelisi ukubandezeleka, unako ‘ukwenza indlela yokuphuma ukuze sikwazi ukukunyamezela.’ (1 Korinte 10:13) Kuphawuleka ukuba uYehova ubizwa ngokuba ‘nguThixo wentuthuzelo yonke, osithuthuzelayo kuyo yonke imbandezelo yethu.’ (2 Korinte 1:3, 4) UThixo unokusinika oko sikufunayo ukuze sinyamezele, yaye sinethemba lobomi obungunaphakade.
ILizwi likaThixo, iBhayibhile, lisithembisa ukuba uYehova “uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona.” (ISityhilelo 21:3, 4) Ngaba kuvakala kuyinto enzima ukukholelwa ukuba lingaze libekho ihlabathi elingenakubandezeleka? Kusenokuba njalo ukuba usoloko uthwaxwa ziinzima. Sekunjalo, uThixo uthembisa ukukhululeka kuloyiko nakwiintlekele, yaye ngokuqinisekileyo injongo yakhe iya kuzaliseka.—Isaya 55:10, 11.
[Imifanekiso ekwiphepha 9]
Wayenxunguphele waza wafumana isiqabu