Kutheni AmaNgqina KaYehova Esoloko Ekutyelela?

EHLABATHINI lonke, iyaziwa indlela amaNgqina kaYehova azingisa ngayo kumsebenzi wawo wokushumayela kwindlu ngendlu. Abanye abantu bazibuza ngesizathu sokuba amaNgqina eqhubeka ebatyelela, ingakumbi ukuba ngaphambili baye ababonakalisa mdla ungako kwisigidimi sawo. Iileta ezimbini ezivela eRashiya zicacisa isizathu soko.

UMasha, intombazana eneminyaka eli-19 ubudala yaseKhabarovsk, uyavuma esithi: “Enyanisweni, kwiminyaka edluleyo bendisoloko ndizama ngazo zonke iindlela ukuwaphepha amaNgqina kaYehova.” Noko ke emva kokufunda amaphephancwadi aliqela apapashwe ngamaNgqina, watshintsha isimo sakhe sengqondo. UMasha ubhala esithi: “Konke endiye ndakufunda kuwo kubangela umdla yaye kuyafundisa, kodwa okubaluleke ngakumbi kukwenza ulijonge ngendlela eyahlukileyo ihlabathi. Ngokuthe ngcembe ndiye ndayiqonda injongo yobomi.”

USvetlana ohlala kwisixeko saseUssuriysk, malunga neekhilomitha ezingama-80 kumntla weVladivostok, wabhala: “Kutshanje ndiye ndaqalisa ukufunda IMboniselo noVukani! La maphephancwadi ayafuneka kule mihla yethu. Ndiyawanandipha onke la manqaku. Abangel’ umdla yaye ayafundisa ngokwenene. Enkosi! Ndibulela ngokungazenzisiyo ngokuba nibe kweli hlabathi nokwenza umsebenzi wobubele nobaluleke ngolu hlobo.”

AmaNgqina kaYehova ehlabathini lonke awuthabatha nzulu umbuzo kampostile uPawulos obangel’ umdla othi: “Baya kuva njani na [abantu] kungekho bani ushumayelayo?” (Roma 10:14) Kutheni ungaziphi ixesha elincinane ukuze uwaphulaphule amaNgqina xa ekutyelele kwakhona? Nawe unokufumana isigidimi esithuthuzelayo esifumaneka kwiLizwi likaThixo, iBhayibhile.