Asingomdlalo Nje

ABANTWANA bayakuthanda ukudlala. Kodwa incwadi ethi The Developing Child ithi “oku akunto nje elilize. Kulapho umntwana aqalisa khona ukufunda ngezinto ezimngqongileyo.” Ngokudlala, abantwana bafunda ukusebenzisa izivamvo zabo, ukuqonda oko kubangqongileyo nokusebenzisana nabanye.

Beseneminyaka emine okanye emihlanu ubudala, abantwana baxelisa izinto ezenziwa ngabantu abadala xa bedlala. UYesu wakhe wathetha ngabantwana abadlalayo. Abanye babefuna ukudlala “umtshato,” abanye befuna ukudlala “umngcwabo” yaye kanye njengabantwana, babephikisana kuba abanye bengafuni ukudlala. (Mateyu 11:16, 17) Ukudlala ngolu hlobo kunokubethelela ubuchule obubalulekileyo kwingqondo yomntwana osakhulayo.

Abantwana abakule mifanekiso badlala bexelisa umfundisi weBhayibhile nomfundi. Abaqhubi sifundo seBhayibhile sokwenene, kodwa ukuthetha ngesigidimi seBhayibhile nabanye kucacile ezingqondweni zabo. Yaye esi sifundo sibaluleke kakhulu, kuba uYesu wayalela abalandeli bakhe ukuba benze abafundi baze bafundise abantu ukuba benze zonke izinto abafundise zona.—Mateyu 28:19, 20.

Abazali abanabantwana abadlala ngokuqhuba izifundo zeBhayibhile, ngokunikela iintetho, okanye ngokushumayela kwindlu ngendlu bafanele babe neqhayiya. Ngokuqhelekileyo, abantwana baxelisa oko babona abantu abadala bekwenza. Imidlalo yabantwana yeBhayibhile ibonisa ukuba bakhuliswa “ngemfundo nangesiluleko esikholisa iNkosi.”—Efese 6:4, Charles B. Williams.

UYehova ufuna ukuba abantwana babe nenxaxheba kunqulo lokwenyaniso. Waxelela uMoses ukuba “abantwana” baqukwe xa kufundwa uMthetho. (Duteronomi 31:12) Xa abantwana abaselula bevakalelwa kukuba babandakanyekile, oku kuya kubonakala kwindlela abadlala ngayo. Yaye xa umntwana edlala ngokuba ngumlungiseleli kaThixo uthabatha inyathelo lokuqala ekubeni abe nguye.