Umntu Othobekileyo WaseAfrika Owathanda ILizwi LikaThixo

ABANTU abandwendwele eAfrika badla ngokumangaliswa yindlela ekulula ngayo ukuqalisa incoko ngemixholo yeBhayibhile nabantu basekuhlaleni. Kulula ukuba abantu baphulaphule imibuzo efana nothi, “Buyintoni uBukumkani bukaThixo?” okanye “Ngaba ziya kuze ziconjululwe ngonaphakade iingxaki ezifana nokunqongophala kokutya, izifo, iimfazwe nolwaphulo-mthetho?” Abaninzi bakwamkela ngezandl’ ezishushu ukuboniswa ngumntu abangamaziyo iimpendulo ezifumaneka eBhayibhileni. Ngokufuthi oku kukhokelela kwisifundo seBhayibhile esiqhutywa rhoqo. Ibe njengoko abafundi besenza inkqubela ngokomoya, baba ngamaKristu abhaptiziweyo.

KwiZenzo 8:26-40 iBhayibhile ithetha ngomntu wokuqala waseAfrika owasabela ngolo hlobo. WayengumTiyopiya owayesiya kunqula uThixo wenyaniso uYehova eYerusalem.

Njengoko kuboniswe kulo mfanekiso ungezantsi, le ndoda ingumTiyopiya ibuyela ekhaya ngenqwelo yayo, ifunda umqulu. Kuza kuyo umntu engamaziyo aze ayibuze: “Uyakwazi na okunene oku ukufundayo?” Ngokuzithoba, lo mTiyopiya uyavuma ukuba ufuna ukuncedwa aze ambongoze lo mntu, umKristu ongumvangeli uFilipu, ukuba akhwele enqweleni. Emva koko ucela uFilipu ukuba amcacisele intsingiselo yesi Sibhalo asandul’ ukusifunda. UFilipu uthi esi sisiprofeto esibhekisela ekufeni kukaMesiya, uYesu Kristu, okusandul’ ukwenzeka. Kwakhona uFilipu umxelela ngeminye imibandela ephathelele “iindaba ezilungileyo ezingoYesu,” ngokungathandabuzekiyo eziquka ukuvuka kukaYesu.

Emva kokuba eve ezi nyaniso zimangalisayo, lo mTiyopiya ufuna ukuba ngumfundi kaYesu yaye uyabuza: “Yintoni na endithintelayo ukuba ndibhaptizwe?” Emva kokuba ibhaptiziwe, le ndoda ithobekileyo yaseAfrika ibuyela ekhaya, yaye ayikho enye into ethethwayo ngayo eBhayibhileni.

Namhlanje, amaNgqina kaYehova anceda izigidi zabantu abasehlabathini lonke ukuba bafunde ngezi “ndaba zilungileyo.” Sithetha nje kuqhutywa izifundo zeBhayibhile ezimalunga nezigidi ezithandathu.