Sinjani Isiseko Owakha Phezu Kwaso?

UKOMELELA kwesakhiwo ubukhulu becala kuxhomekeke ekomeleleni kwesiseko saso. Maxa wambi iBhayibhile isebenzisa lo mgaqo ngendlela efuziselayo.

Ngokomzekelo, umprofeti uIsaya, ubhekisela kuYehova uThixo njengalowo ‘ubeka isiseko somhlaba.’ (Isaya 51:13) Esi siseko simela imithetho kaThixo engenakuguqulwa elawula ukushukuma komhlaba neyenza ukuba uhlale kwindawo yawo. (INdumiso 104:5) Kwakhona iLizwi likaThixo, iBhayibhile, lithetha ‘ngeziseko’ abantu abathembele kuzo. Ezi ziseko kukubakho kokusesikweni, umthetho nocwangco. Xa “zichithwa,” okanye zingakhathalelwa ngenxa yokungabikho kokusesikweni, ubuqhetseba nogonyamelo, luyaphela ucwangco ekuhlaleni.—INdumiso 11:2-6; IMizekeliso 29:4.

Lo mgaqo uyasebenza nakumntu ngamnye. Xa wayequkumbela iNtshumayelo yakhe yaseNtabeni edumileyo, uYesu Kristu wathi: “Wonk’ ubani owevayo la mazwi am aze awenze uya kufaniswa nendoda eyingqondi, eyakha indlu yayo phezu kolwalwa. Yagaleleka imvula, zafika nezikhukula, yavuthuza nemimoya, yabetha kuloo ndlu, kodwa ayizange idilike, kuba yayisekwe phezu kolwalwa. Ngapha koko, wonk’ ubani owevayo la mazwi am aze angawenzi uya kufaniswa nendoda esisidenge, eyakha indlu yayo phezu kwentlabathi. Yagaleleka imvula, zafika nezikhukula, yavuthuza nemimoya, yabetha kuloo ndlu yaza yadilika, kwaba kukhulu ukuwohloka kwayo.”—Mateyu 7:24-27.

Ubakhela phezu kwasiphi isiseko ubomi bakho? Ngaba ubakhela phezu kwentlabathi engazinzanga eyimfundiso yabantu abangahlonel’ uThixo, nto leyo enokubangela ukuba isakhiwo sidilike? Okanye ngaba wakha phezu kolwalwa oluqinileyo olukukuthobela amazwi kaYesu Kristu, nto leyo eya kukunceda usinde kwizaqhwithi zokomfuziselo zobomi?