“Kugqityiwe”

NGOWAMA-2002, amaNgqina kaYehova aba nendibano yesithili kwisixeko saseMbandaka, kumntla-ntshona weDemocratic Republic of Congo. Xa kwakhululwa INguqulelo Yehlabathi Elitsha YeZibhalo ZesiGrike ngesiLingala kulo ndibano, abantu ababekho baxhuma ngokoqobo yimincili, yaye zehla iinyembezi kwabanye. Kamva, baya eqongeni ukuze bayibonele kufutshane le Bhayibhile intsha, besithi: “Basuki, Basambwe,” oko kuthetha ukuthi: “Kugqityiwe! Badanile!”

Yintoni eyayibenza bavuye kangaka, yaye babethetha ukuthini ngaloo mazwi? Kwezinye iindawo zaseMbandaka, amaNgqina kaYehova ebengakwazi ukufumana iiBhayibhile ngesiLingala. Ngoba? Kuba iicawa zazingafuni ukuthengisela amaNgqina kaYehova. Kwakufuneka acele omnye umntu ongelilo iNgqina ukuba awathengele. Ngoku avuya gqitha kuba iicawa zazingenakuphinda ziwathintele ekufumaneni iiBhayibhile.

Le nguqulelo intsha ayizukunceda amaNgqina kaYehova kuphela kodwa iza kunceda bonke abantu. Indoda eyakwaziyo ukuva olu cwangciso ngoxa isemzini wayo ngenxa yezandisi-lizwi ezazikuloo ndibano, yabhalela iofisi yesebe lamaNgqina kaYehova yathi: “Ndikuvuyela gqitha ukukhululwa kwale Bhayibhile. Iza kusikhanyisela kwizinto ezininzi. AndiloNgqina likaYehova, kodwa ndiyilindele ngolangazelelo le Bhayibhile nisandul’ ukuyipapasha.”

INguqulelo Yehlabathi Elitsha YeZibhalo Ezingcwele ngoku ifumaneka ngeelwimi ezingama-33, yaye INguqulelo YeZibhalo ZesiGrike, ifumaneka ngeelwimi ezili-19 ezongezelelekileyo, kuquka nesiLingala. Ukuba ungathanda ukufumana umbhalo wayo, nceda ucele omnye wamaNgqina kaYehova akuxelele indlela onokuyifumana ngayo le nguqulelo isemagqabini.