“Abo Behla Baye Elwandle Ngeenqanawa”

KWIZIBUKO laseGloucester, eMassachusetts, eUnited States, kukho umfanekiso oqingqiweyo wobhedu wendoda engumatiloshe, eyayibhexesha inqanawa yayo kulwandle olulwayo. Lo mfanekiso sisikhumbuzo samawaka abalobi balapho ekuthiwa bafel’ elwandle. Emazantsi alo mfanekiso nakwimbasa yelitye elikufuphi nawo kubhalwe amazwi eNdumiso 107:23, 24 athi: “Abo behla baye elwandle ngeenqanawa, besenza ishishini emanzini amaninzi, ngabo abayibonileyo imisebenzi kaYehova nemisebenzi yakhe emangalisayo enzulwini.”

Ukuloba kwinzonzobila yolwandle lweAtlantic kukubeka ubomi esichengeni. Ukutyhubela iminyaka kuqikelelwa ukuba afikelela kuma-5 368 amadoda afela elwandle eye kuloba aseGloucester, ngoku enabemi abamalunga nama-30 000. Esi sikhumbuzo sifundeka ngolu hlobo: “Abanye baqweqwediswa yimimoya ebhudlayo nangamaza aselwandle ayingozi avela emntla-mpuma. Abanye bafela emaphenyaneni ababeloba ngawo. Zimbi iinqanawa zangqubana ngenxa yoqhwithela zaza zazika.”

Esi sisikhumbuzo esibuhlungu esinikela ubungqina bokusebenza nzima neengozi abaye bagaxeleka kuzo abalobi ukutyhubela iinkulungwane. Khawuthelekelele isijwili esimele ukuba sasisenziwa ngenxa yabayeni, ootata, abantakwe noonyana abafela elwandle. Ukanti, uYehova uThixo akabalibali abahlolokazi, iinkedama okanye abo bafela elwandle. Umpostile uYohane wabhekisela kwesi siganeko sizayo wathi: “Ulwandle lwabakhupha abafileyo abakulo, kwathi ukufa neHadesi kwabakhupha abafileyo abalapho.” (ISityhilelo 20:13) Ngexesha lokuvuswa kwabo, abo “babeloba elwandle,” ngokwenene baya kubona “imisebenzi emangalisayo yeNkosi.”