“Good News for People of All Nations”

LE NCWADANA ilapha ngasentla yakhululwa kwiNdibano Yesithili YamaNgqina KaYehova ‘Yokuhamba NoThixo’ yowama-2004/05. Olunye uhlelo lwale ncwadana lunamaphepha angama-96 luqulethe isigidimi esifutshane ngeelwimi ezingama-92, ezisusela kwisiBhulu ukusa kwisiZulu, yenzelwe ukusasaza iindaba ezilungileyo zoBukumkani kubantu abaninzi kangangoko kunokwenzeka. (Mateyu 24:14) La mava alandelayo abonisa imiphumo yokusetyenziswa kwale ncwadana.

• Emva kokufumana le ncwadana kwindibano yesithili, enye intsapho yamaNgqina yatyelela imizi yokugcina izilwanyana emithathu. Apho yadibana nabantu abavela eIndiya, eNetherlands, ePakistan nakwiPhilippines. Umyeni wathi: “Nangona bonke abo bantu babekwazi ukuthetha isiNgesi ngomlinganiselo othile, babechukumiseka gqitha xa beboniswa isigidimi ngolwimi lwabo, kuba babekude kakhulu kumakhaya abo. Umsebenzi wethu wokushumayela owenziwa ehlabathini lonke nokumanyana kwethu kwacaca gca okwekat’ emhloph’ ehlungwini.”

• Elinye iNgqina labonisa ugxa walo emsebenzini owayevela eIndiya le ncwadana. Wayechukumiseke gqitha kukubona zonke iilwimi ezikule ncwadana waze wafunda isigidimi ngolwimi lwakhe. Oku kwaphumela ekubeni babe neengxubusho ezingakumbi ngeBhayibhile. Omnye umntu awayesebenza naye owayevela kwiPhilippines wasala ebamb’ ongezantsi akubona ulwimi lwakhe kule ncwadana waze wanomdla wokufunda okungakumbi ngamaNgqina kaYehova.

• EKhanada, inenekazi laseNepal lavuma ukufundisisa iBhayibhile ngomnxeba kodwa lalingafuni eze ekhayeni lalo lo dade. Noko ke, xa lo dade walichazela ngencwadana equlethe isigidimi ngolwimi lwesiNepali, lammema ngehlombe ukuba aze kulibona. Lalifuna ukuzibonela ngokwalo esi sigidimi solwimi lomthonyama! Ukususela ngoko beliqhutyelwa isifundo seBhayibhile ekhayeni lalo.