Ngaba Kufanelekile Ukwenza Umabonwakude Impelesi Yomntwana Wakho?
MAXA WAMBI kunokubonakala kubangel’ umdla ukuyeka abantwana bakho babukele umabonwakude ukuze ubagcine bonwabile ngoxa usenza eminye imisebenzi. Kodwa oku kunokubachaphazela njani abantwana bakho?
IThe New York Times ithi, “Kwaneentsana zinokuchaphazeleka zizinto ezizibukela kumabonwakude.” Kuhlolisiso olwenziwe kutshanje, iintsana ezinonyaka ubudala ziye zaboniswa iziqendwana ezifutshane zomdlali kamabonwakude edlala ngento ethile yokudlala. ITimes ithi: “Xa umdlali esenza ngathi uyayoyika le nto, aba bantwana babengafuni ukudlala ngayo yaye babebonakala benxubile, bafing’ iintshiyi okanye bakhale. Xa umdlali edlala ngayo ngomdla nabo aba bantwana babekulangazelela ukudlala ngayo.”
Ngokucacileyo iintsana ziyachaphazeleka kukubukela umabonwakude. Ukubukela kweentsana umabonwakude kuba nawuphi umphumo ekuhambeni kwexesha? UGqr. Naoki Kataoka, oyingcali kwizigulo zabantwana eKawasaki Medical College eseKurashiki, eJapan, uye waphawula ukuba kukho abantwana abaninzi abathule ngendlela eyothusayo yaye aba bantwana bahlala bendwanyile nje. Bonke aba bantwana babebukela umabonwakude okanye iividiyo ixesha elide. Enye inkwenkwana eneminyaka emibini ubudala yayingakwazi ukuncokola yaye ayembalwa amagama eyayiwazi. Isenonyaka ubudala yayibukela iividiyo ukususela kusasa de kube ngorhatya yonke imihla. Yaqalisa ukufunda amagama angakumbi emva kokuba unina eye wacetyiswa ngugqirha ukuba ayiyekise ukubukela iividiyo, endaweni yoko adlale nayo. Ewe, abazali bafanele banxibelelane nabantwana babo.
UYehova uThixo, onguMsunguli welungiselelo lentsapho wachaza ukubaluleka konxibelelwano olunjalo. Mandulo phayaa wathi kubantu bakhe: “Uze uwabethelele [amazwi kaThixo] kunyana wakho yaye uthethe ngawo ekuhlaleni kwakho endlwini yakho, nasekuhambeni kwakho ngendlela, nasekulaleni kwakho, nasekuvukeni kwakho.” (Duteronomi 6:7) Abantwana bafanele bafundiswe ngabazali kungekhona umabonwakude, babafundise ngentetho nangehambo “ngokwendlela” efanele bona.—IMizekeliso 22:6.