“Kutheni Silapha?”

UELIE WIESEL, owafumana iBhaso likaNobel nowasinda ekuBulaweni Kwabantu Ngenkohlakalo uthi, kukho “umbuzo obalulekileyo abantu abafanele bazibuze wona.” Uthini lo mbuzo? Uthi, “Kutheni silapha?”

Ngaba wakha wacingisisa ngalo mbuzo? Abantu abaninzi baye bacingisisa ngawo kodwa abakhange bayifumane impendulo. Kumzamo wakhe wokuchaza injongo yobomi, umbhali-mbali waseBritani uArnold Toynbee wabhala wathi: “Indima eyintloko ebomini bomntu kukuzukisa uThixo nokuziyolisa Ngaye ngonaphakade.”

Okubangel’ umdla kukuba, ngaphezu kweminyaka engamawaka amathathu eyadlulayo, indoda eyayinomdla ngobomi yayisele iyifumene impendulo. UKumkani osisilumko uSolomon wathi: “Ukuqosheliswa kombandela, emva kokuba yonk’ into iviwe, naku: Yoyika uThixo oyinyaniso uze ugcine imiyalelo yakhe. Kuba oku kuyimbopheleleko yomntu.”—INtshumayeli 12:13.

UYesu Kristu, uNyana kaThixo, wawuxhasa lo mgaqo usisiseko. Ngoxa wayesemhlabeni uYesu wenza konke okusemandleni akhe ukuze azukise uYise. Ukukhonza uMdali wakhe kwamvuyisa ebomini bakhe bonke. Kwamomeleza yaye wakwazi ukuthi: “Okwam ukutya kukuba ndenze ukuthanda kondithumileyo.”—Yohane 4:34.

Ngoko ke, kutheni silapha? NjengoYesu, uSolomon nabanye abakhonzi bakaThixo abaninzi, sinokuyifumana injongo yobomi size sonwabe ngonaphakade ukuba senza ukuthanda kukaThixo. Ngaba ungathanda ukwazi okungakumbi ngendlela onokumnqula ngayo uThixo “ngomoya nenyaniso?” (Yohane 4:24) AmaNgqina kaYehova akummandla okuwo angakuvuyela ukukunceda ufumane impendulo yombuzo othi, “Kutheni silapha?”