“Wasicenga Ukuba Siye”

UKUBUK’ IINDWENDWE yinto eyaziwayo kumazwe aseMpuma. Ngokomzekelo, eIndiya intsapho inokuxolela ukungatyi, ikuncamele undwendwe obelungalindelwanga ukutya kwayo. EIran iifriji zihlala zithe ntli kuba oomama balapho bafuna ukuhlala bekulungele ukutyisa iindwendwe ezinokufika zingalindelwanga.

Loo moya wokupha wawukho kubantu ethetha ngabo iBhayibhile. Omnye umzekelo obalaseleyo nguLidiya, osenokuba wayeguqukele ebuYudeni ehlala eFilipi, isixeko esiyintloko kwisithili saseMakedoni. Kolunye usuku lwesabatha, umpostile uPawulos nabo wayehamba nabo bafumana uLidiya nabanye abafazi besecaleni komlambo ngaphandle kweFilipi. UYehova wayivula intliziyo yakhe njengoko uPawulos wayethetha. Ngenxa yoko, wabhaptizwa kunye nabathile bentsapho yakhe. Emva koko, wacenga ooPawulos esithi: “Ukuba nindigwebe ndingothembekileyo kuYehova, ngenani endlwini yam.” Omnye owayehamba noPawulos uLuka uthi: “Wasicenga ukuba siye [endlwini yakhe].”—IZenzo 16:11-15.

NjengoLidiya, amaKristu namhlanje awenzela ububele amanye, njengabaveleli abahambahambayo nabafazi babo. Xa bewamkela ‘bavele bawacenge ukuba eze.’ Nabo abamkeli zindwendwe basikelelwa ngencoko eyakhayo nobudlelane bokomoya. Nakuba inkoliso yamaNgqina kaYehova ingathathi ntweni, ‘ilandela ikhondo lokubuk’ iindwendwe.’ (Roma 12:13; Hebhere 13:2) Umoya wokupha anawo uwenza onwabe. UYesu wayechan’ ucwethe xa esithi: “Kunoyolo ngakumbi ukupha kunokwamkela.”—IZenzo 20:35.