“Nkosi, Wawuthulele Ntoni?”

LA NGAMAZWI awathethwa nguPopu Benedict XVI, xa wayetyelele kwindawo eyayisakuba yinkampu yoxinaniso eAuschwitz, ePoland, ngoMeyi 28, 2006. Kwindawo apho amaNazi abulala khona amakhulu amawaka amaYuda nabanye, wongezelela wathi: “Le ndawo iphakamisa imibuzo engapheliyo! Abantu bahlala bezibuza oku: Wayephi uThixo ngaloo mihla? Wayethulele ntoni? Kwakutheni ukuze avumele ukubulawa kwabantu ngale ndlela, obunje bona ubungendawo? . . . Simele siqhubeke sikhala kuThixo ngokuthobeka singayeki sisithi: Nceda ukuphindezele oku! Sukubalibala abantu, izidalwa zakho!”

Le ntetho kapopu yabangela ukuwa kweentetho. Abanye baphawula ukuba upopu uye wayiphepha imibandela ethile, njengokuthiywa kwamaYuda okwabangela loo nkohlakalo yaseAuschwitz. Abanye bathi intetho yakhe yayisingela phantsi isicelo sikaPopu John Paul II sokuba kuxolelwe icawa ngezinto eyazenzayo. Intatheli yamaKatolika, uFilippo Gentiloni, yathi: “Babemele ke noko, abantu abaninzi ukuba xa bebuzwa umbuzo onzima wokuba wayephi uThixo—umbuzo ongaphendulekiyo—bakhethe ukufuna impendulo yombuzo olula othi: Wayephi uPius XII?” Xa besitsho babebhekisela kuPopu Pius XII owakhetha ukutya tyum ngoxa kwakubulawa abantu ngenkohlakalo.

Ukubulawa kwabantu ngenkohlakalo nezinye izenzo ezinjalo eziye zenzeka kwimbali yabantu kuye kwangqina ukuba xa ‘umntu elawula umntu iba kukwenzakala kwakhe.’ (INtshumayeli 8:9) Ngaphezu koko, uMdali wabantu ebengathulanga xa kusenzeka bonke obu bubi. EBhayibhileni, uye wachaza izizathu zokuba evumele ubungendawo. UThixo uye wasiqinisekisa ukuba akasilahlanga kwesinomhlwa. Enyanisweni, sele kumbovu ukuba liphele ixesha elivunyelwe nguThixo ukuba abantu bazilawule. (Yeremiya 10:23) Ngaba ungathanda ukwazi ngakumbi ngenjongo kaThixo ngathi? AmaNgqina kaYehova aya kukuvuyela ukukunceda ufumane impendulo zeBhayibhile kwimibuzo eyinkohla kuPopu Benedict XVI.

[Inkcazelo Ngomfanekiso okwiphepha 32]

Oświęcim Museum